މަޖިލީހުގެ ރިޔާސަތުގައި އިންނަވައިގެން ޤާނޫނާއި ޤަވާއިދާއި ޚިލާފަށް ލޮލު ފިޔައެއްވެސް ނުޖަހާނެކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ޖީއެސްޓީއާއި ޓީޖީއެސްޓީ ބޮޑުކުރުމަށް ޤާނޫނަށް ހުށައަޅާފައިވާ އިޞްލާހު މުޅި މަޖިލީހުގެ ކޮމިޓީން ދިރާސާކުރަމުން އަންނައިރު، ތިނަދޫ ދެކުނު ދާއިރާގެ މެންބަރު ޢަބްދުލްމުޣުނީ ވަނީ ކޮމިޓިން ވަގުތު ކަނޑައެޅުމަށް އެދިވަޑައިގެންފައެވެ. އެ ވާހަކަތަކާއި ގުޅިގެން ރައީސް ނަޝީދު ވިދޅުުވީ ކޮމިޓީގެ ފަރާތުން ގޮތް ނިންމާނެގޮތެއް ނެތް ކަންކަމުގައި އެމަނިކުފާނު ނިންމާނީ އެންމެ އިންސާފުވެރިކޮށްކަމަށެވެ.
އިއްޒަތްތެރި މެންބަރުން ޔަޤީންކުރަންވީ އަޅުގަނޑު މިތާ އިނދެގެނެއް ޤަވާއިދާއި ޚިލާފަކަށް ކަންކަން ކުރަމަކުން ނުދާނެ. އަޅުގަނޑު މިތަނުގައި އިނދެކުރާ ހުރިހާ މަސައްކަތެއްވެސް، ލޮލުފިޔައެއްވެސް އަޅުގަނޑު މިތަނުގައި ނުޖަހާނެ ދިވެހިރާއްޖޭގެ ޤާނޫނު އަސާސީއާއި ދިވެހިރާއްޖޭގެ ޤާނޫނުތަކާއި، މިތަނުގެ ޤަވާއިދުތަކާއި، ޑިމޮކްރަސީގެ އުސޫލުތަކާއި، އިސްލާމްދީނުގެ މަތިވެރި ރިވެތި އިސޫލުތަކުގެ މަތިން ނޫނީ. އެ ޔަޤީންކަން އަޅުގަނޑު އިއްޒތްތެރި މެންބަރުންނަށް ވަރަށް ބޮޑަށް އަރުވަން ބޭނުން.
– ރައީސް ނަޝީދު ވިދާޅުވިއެވެ.
ރައީސް ނަޝީދު މިހެން ވިދާޅުވެފައިމިވަނީ، އައްޑޫ މީދޫ ދާއިރާގެ މެންބަރު ރޮޒައިނާ އާދަމް، ރައީސް ނަީިދަކީ މަޖިލީހުގެ ތާރީޚުގައި އެންމެ ހުދުމުހުތާރު ރައީސްކަމަށް ވިދާޅުވެފައިވަނިކޮށެވެ.ރޮޒައިނާގެ އިތުރުން މަޖިލިހުގައި ތިއްބަވާ ރައީސް ސާލިހުގެ ފެކްޝަނަށް ތާއީދުކުރައްވާ މެމްބަރުންގެ ފާޑުކިއުން ނަޝީދަށް އަމާޒުވެގެން ދިޔައީ މަޖިލިހަށް ހުށަހެޅިފައިވާ ޓެކްސްގެ ބިލާ ގުޅޭގޮތުން ބަހުސްކުރުމަށް މުޅި މަޖިލިސް ކޮމިޓީ ނަޝީދު ކުރިޔަށް ގެންދެވި ގޮތާމެދު ހިންހަމަ ނުޖެހިގެންނެވެ.
މުޅި މަޖިލިސް ހިމެނޭ ކޮމިޓީ ކުރިޔަށްދިޔައިރު ނަޝީދުވަނީ ކޮމިޓީގެ ވޯޓަކާއިހަމައަށް ނުގޮސް މިނިސްޓަރު އިބްރާހިމް އަމީރުގެ އިތުރުން ޓެކްސްގެ ދާއިރާއާއި ގުޅުންހުރި އެހެން ފަރާތްތައްވެސް މަޖިލިހަށް ހާޒިކުރުމަށް ނިންމާފައެވެ. ނަޝީދު ނިންމަވާފައިވަނީ، މި ފަރާތްތައް ހާޒިރު ކުރުމުގެ ބައްދަލުވުން މާދަމާ ބޭއްވުމަށެވެ.
ހަމައެއާއެކު މިއަދުގެ މުޅި މަޖިލިސް ކޮމިޓީގެ ވަގުތު އިތުރު ކުރުމަށް ހުށަހަޅާ އެ ހުހަށެޅުމަށް ތާއީދުވެސް ލިބިފައިވަނިކޮށް ނަޝީދުވަނީ ވޯޓަކާއި ހަމައަށް ނުގޮސްފައެވެ. އަދި މެމްބަރުންގެ ނިންމެވުމެއް ނެތި ނަޝީދު އަމިއްލަފުޅަށް އެ ނިންމެވުން ނިންމެވުމުން މަޖިލިހުގައި ތިއްބެވި، ރައީސް ސާލިހަށް ތާއީދުކުރާ މެމްބަރުންގެ ފާޑުކިއުން ނަޝީދަށް އަމާޒުވެގެން ދިޔައެވެ. ރޮޒައިނާ ވިދާޅުވި ގޮތުގައި ކޮމިޓީގެ ވަގުތު އިތުރުކުރުމަށް މެމްބަރަކު ހުށަހަޅާ ތާއީދު ލިބިގެން ދިއުމުން އެ ހުށަހެޅުމަކަށް ވޯޓަށް އަހަން ޖެހޭނެކަމުގައެވެ.
މަޖިލިހުގެ ގަވައިދަކީ މިހާރު މިތާ ކަރުދާހެއްގައި ލިޔެވިފައި އޮތް އެއްޗެއް. މަޖިލިހުގެ ރިޔާސަތުގެ މޭޒު މަތީގައި އޮތް ގަވައިދާ މަޖިލިހުގެ މެމްބަރުންގެ މޭޒުމަތީގައި އޮތް ގަވައިދު އެއީ ދޭއްޗެއް ހެން އަޅުގަނޑުމެންނަށް ބައެއް ފަހަރު އެބަ ހީވޭ.
މަޖިލިހުގައި ކުރެވޭ ބަހުސްތަކުގައި ނަޝީދު ބައިވެރިވެވަޑައިގަންނަވަމުން ގެންދަވާތީ ފާޑުވިދާޅުވަމުން ރޮޒައިނާ ވިދާޅުވެފައި ވެއެވެ.
އަޅުގަނޑުމެންނަށް މިހާރު މި ފެނިގެން މިދަނީ މަޖިލިހުގެ ތާރީހުގައި އެންމެ ހުދުމުހުތާރުކޮށް މަޖިލިސް ހިންގަވާ ރައީސް. އަޅުގަނޑު ވަރަށް ހިތާމަ ކުރަން މި ވާހަކަ ދައްކަން ޖެހޭތީ.
ރޮޒައިނާ ވިދާޅުވެފައި ވެއެވެ. ރޮޒައިނާގެ ވާހަކައަށް އެވަގުތު މަޖިލިސް ފްލޯގައި ތިއްބެވި ގިނަ މެމްބަރުން އަތް ޖައްސަވާ ތަރުހީބު ދީފައި ވެއެވެ.
