ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކަރަންޓު ބިލު ބޮޑުވީ ހަމަ ހުރަފައި ނޫންކަމަށާއި، އެއީ ބޭނުންކުރުމުން ބޮޑުވެފައިވާ ބިލުކަމަށް ވިދާޅުވެ، ސްޓެލްކޯގެ މެނޭޖިންގ ޑިރެކްޓަރ އަޙްމަދު ޝަރީފް އެފްއޭއެމަށް ރައްދު ދެއްވައިފިއެވެ.
6 މިލިއަނަށްވުރެ ގިނަ ރުފިޔާގެ ކަރަންޓު ބިލު ނުދައްކައިގެން އެފްއޭއެމް އިން ކަރަންޓު ކަނޑާލި މައްސަލާގައި އެފްއޭއެމް އިން ވަނީ ބަޔާނެއް ނެރެފައެވެ. އޭގައި ވަނީ ސްޓެލްކޯއިން އެ އިދާރާއާ ދޭތެރޭ އެޅި ފިޔަވަޅަކީ ޒިންމާދާރުކަން ކުޑަ އަމަލެއްކަމަށް ބުނެފައެވެ.
އެފްއޭއެމް އިން ނެރުނު ބަޔާނަށް ރައްދު ދެއްވާ ސްޓެލްކޯގައި އޮތް ރަސްމިއްޔާތެއްގައި ވާހަކަފުޅު ދައްކަވަމުން މެނޭޖިންގ ޑިރެކްޓަރ އަޙްމަދު ޝަރީފް ވިދާޅުވީ، ބޮޑެތި ޢަދަދުތަކުން ބިލު ނުދައްކާތީ ސްޓެލްކޯއަށް ދަތިވަމުން އަންނަކަމަށް ވިދާޅުވެފައެވެ. ބަޔާންތައް ނުނެރެ އެފްއޭއެމް އިން އަވަހަށް ކަރަންޓު ބިލުތަކުގެ ފައިސާ ދެއްކުމަށް ގޮވާލައްވާ ޝަރީފް ވިދާޅުވީ، ކަރަންޓު ދޭނީ ފައިސާ ދައްކާ ޚަލާސްކުރުމުންކަމަށެވެ. އޭނާ ވިދާވީ ކަރަންޓު ވިލަށް 6 މިލިއަން ރުފިޔާ އެރީ ހަމަ ހުރެފަކައިނޫންކަމަށެވެ.
އެފްއޭއެމް އިން ކަރަންޓު ކަނޑާލާ ސްޓެލްކޯއިން ބުނީ އެފްއޭއިމް އިން އެމިކުންފުންޏަށް ދައްކަންޖެހޭ 6.5 މިލިއަން ރުފިޔާ ދެެއްކުމަށް އެކި ފަހަރުމަތިން އަންގާ، އެ ފައިސާދެއްކޭނެ ގޮތުގެ ޕްލޭނެއް ހުށަހެޅުމަށް ގިނަ ފުރުސަތުތަކެއްދެވި، އެކަންވެސްކޮށްފައި ނުވާތީ، އެފްއޭއެމް ހައުސްއިން ވަނީ ކަރަންޓުގެ ޚިދުމަތް މެދުކަނޑާލާފައިވާކަމަށެވެ. އަދި މި ފައިސާ ނުދައްކާނަމަ، އެފްއޭއެމްގެ އެހެން އިމާރާތްތަކުންވެސް ކަރަންޓުގެ ހިދުމަތް މެދުކަނޑާލުމަށް މިދަނީ ވިސްނަމުންކަމަށް ސްޓެލްކޯއިން ބުންޏެވެ.
އެއަށް ރައްދު ދެއްވާ އެފްއޭއެމް އިން ރޭ ނެރުނު ބަޔާނުގައި ވަނީ ކޮވިޑްގެ ތެރޭގައި 2020 ވަނަ އަހަރު ކޮވިޑް ފެސިލިޓީއެއްގެ ގޮތުގައި ވަނީ މި އިމާރާތް ބޭނުންކޮށްފައިވާ ކަމަށެވެ. އަދި މި ނޫނަސް އެކި ބޭނުންތަކަށް އެތަން ދޫކޮށްފައިވާނެ ކަމަށާއި ސްކައުޓް އެސޯސިއޭޝަންގެ އިދާރާ ހިންގުމަށް މިހާރުވެސް އިމާރާތް ބޭނުންކުރަމުންދާ ކަމަށް ވަނީ ބުނެފައެވެ. އެހެންކަމުން އެ ހުރިހާ ބިލްތަކަށް ވާ ފައިސާގެ އަދަދަށް އެ އިދާރާއިން އެކަނި ޒިންމާ ނަގަން ނުޖެހޭނެ ކަމަށް އެފްއޭއެމުން ބުނެއެވެ.
