ގއ.ކޮލަމާފުށީ މީހަކު ފިހާރައަކަށް ވަދެ ސިނގިރެޓް ފޮށިތަކެއް ވަގަށް ނެގި މައްސަލާގައި 7 މަހަށް ޖަލަށްލާން ކްރިމިނަލް ކޯޓުން ހުކުމްކޮށްފިއެވެ.
މިއީ 2019 ވަނަ އަހަރު މާލޭގެ ފިހާރައެއގެ ދޮރު ހަލާކުކޮށްގެން ކޮށްފައިވާ ވައްކަމެކެވެ. މިމައްސަލާގައި ދައުވާ ސާބިތިވެ 7 މަހަށް ޖަލަށްލާން ހުކުމް ކޮށްފައިވަނީ ގއ. ކޮލަމާފުށީ ނަސީމީގޭ އަހުމަދު އާރިފްގެ މައްޗަށެވެ. އޭނާ ވަގަށް ނަގާފައިވަނީ 14 ސިނގިރޭޓް ފޮއްޓާއި، 450 ރުފިޔާއެވެ.
މިމައްސަލާގައި އޭނާގެ މައްޗަށް ދައުލަތުން އުފުލާފައިވަނީ ތިން ދައުވާއެކެވެ. އެއީ ވައްކަމުގެ ދައުވާ އާއި ފިހާރައިގެ ދޮރަށް ގެއްލުން ދިނުމުން މުދަލަށް ގެއްލުން ދިނުމުގެ ދައުވާ އާއި ސިއްރުން އެތަނަށް ވަދެފައިވާތީ އެނގިހުރެ ހުއްދަ ނޫން ތަނަކަށް ވަނުމުގެ ދައުވާއެވެ. އެ ތިން ދައުވާއަށް ވެސް އޭނާ ކޯޓުގައި އެއްބަސްވިއެވެ.
އޭނާގެ އިއުތިރާފުން ކުށް ސާބިތުވާތީ، މިދިޔަ ބުދަ ދުވަހު ވައްކަމުގެ ދައުވާގައި އިއްވީ ހަތަރު މަހާއި 24 ދުވަހުގެ ޖަލު ހުކުމެކެވެ. އެނގިހުރެ ހުއްދަ ނޫން ތަނަކަށް ވަނުމުގެ ދައުވާގައި އިއްވީ ދެ މަހާއި 12 ދުވަހުގެ ޖަލު ހުކުމެކެވެ. އަދި މުދަލަށް ގެއްލުން ދިނުމުގެ ކުށުގައި އިއްވީ ނުވަ ދުވަހުގެ ޖަލު ހުކުމެކެވެ.
މިފަދަ ކުށްތަކުގައި މީހުންގެ މައްޗަށް ހުކުމް އިއްވިގެންދާއިރު، މީހުން މެރުމާއި، ބޮޑެތި މާރާމާރީއާއި، ޑްރަގުގެ މައްސަލަތަކުގައި ހައްޔަރު ކުރާމީހުން ދޫވެ މުޖުތަމައަށް ދޫވާ މައްސަލައަކީ ގިނަ ބަޔަކު ކަންބޮޑުވުން ފާޅުކުރަމުންދާ މައްސަލަތެކެވެ.
