އއ. މާޅޮހުގެ ދެކުނުން ބަންޑުންޖަހާލި ލޯންޗުން ގެއްލުނު އައްޑޫ ސިޓީއަށް ނިސްބަތްވާ މުޙައްމަދު މިންހާޖު (28އ) ގެއްލުނު ހާދިސާގައި ސުވާލު އުފެދޭ ގިނަ ކަންތައްތަކެއް އެބަހުރިކަމަށް ފުލުހުން ވިދާޅުވެއްޖެއެވެ.
މާލެއިން ފުރައިގެން އުކުޅަހަށް ދަތުރުކުރި މި ލޯންޗު ބަންޑުން ޖަހާލަފައި އޮއްވާ ފެނުނީ މާޅޮހު ކައިރިންނެވެ. މި ލޯންޗުން ދަތުރުކުރި ދެ މީހުންގެ ތެރެއިން އެކަކު ފެރިދޫ ފުއްޓަރާ ދިމާއިން އޮކްޓޯބަރ 7 ވަނަ ދުވަހު ވަނީ ފެނިފައެވެ. އަދި އޭނާއަށް ފެރިދޫ ޞިއްޙީ މަރުކަޒުގައި ފަރުވާދިނުމަށްފަހު އިތުރު ފަރުވާ ދިނުމަށް އާއިލާގެ އެދުމަށް އޭނާ މާލެ ގެނެސް އައި.ޖީ.އެމް ހޮސްޕިޓަލުގައި ފަރުވާދިނުމަށްފަހު މިހާރުވަނީ ދޫކޮށްލާފައެވެ.
މި ޙާދިސާގައި ގެއްލިގެން ހޯދަމުން ދަނީ ސ. ހިތަދޫ، މިންހާ, މުޙައްމަދު މިންހާޖުއެވެ. އޭނާ އެންމެފަހުން ލައިގެން ހުރީ އަޅި ކުލައިގެ އަތް ދިގު ޓީޝާޓަކާއި ނޫ ކުލައިގެ ޖިންސެއް ކަމަށް އެމް.އެން.ޑީ.އެފް ކޯސްޓްގާޑަށް ވަނީ މަޢުލޫމާތު ލިބިފައެވެ. ފުލުހުން ވިދާޅުވީ، ލޯންޗު ބަންޑުންޖަހާލިކަމުގެ މައުލޫމާތު ލިބުމާއެކު މެރިން ޕޮލިހުގެ ޑައިވް ޓީމެއް ހަމަ އެ ދުވަހު އއ. އަތޮޅަށް ގޮސް، ގެއްލުނު މީހާ ހޯދުމުގެ މަސައްކަތް ފަށާފައިވާކަމަށެވެ.
މިހާދިސާއާއި ގުޅޭގޮތުން ފުލުނުން މިއަދު ބޭއްވި ނޫސްވެރިންގެ ބައްދަލުވުމުގައި ފުލުހުން ވިދާޅުވީ ލޯންޗުން ސަލާތްވި އަލީ މުހައްމަދުގެ ފަރާތުން ލިބިފައިވަ މައުލޫމާތަށްބަލާއިރު، އެމީހުން ނިކުތީ މަހަށް ކަމަށް އޭނާ ބުނެފައިވާކަމަށެވެ. ނަމަވެސް ލޯންޗުގައި ގިނަ އަދަދެއްގެ ތެޔޮ ހުރުމާއި އަދި ދަތުރުކުރި މިސްރާބަށް ބަލާއިރު ސުވާލު އުފެެދޭ ގިނަ ކަންތައްތަކެއް އެބަހުރިކަމަށެވެ.
މިދެމީހުންނަކީވެސް މަސްތުވާތަކެތީގެ ރެކޯޑު އޮތް ދެމީހުން ކަމަށްވެސް ފުލުހުން ވަނީ ބުނެފައެވެ. މިންހާޖު ހޯދުމަށް ފުލުހުން ކަނޑުމަތީގައި ކުރި އޮޕަރޭޝަން 78 ގަޑިއިރަށްފަހު މިހާރު ހުއްޓާލާފައިވާކަމަށް ވަނީ ބުނެފައެވެ. އަދި މިމައްސަލާގައި އަލީ މުހައްމަދުގެ ފަރާތުން ލިބެމުންދަނީ އެންމެ ސައްޚަ މައުލޫމާތު ނޫންކަމަސްވެސް ފުލުހުން ވަނީ ބުނެފައެވެ.
