ދުވަސް ނުފުރާ ވިހާ ކުދިންނަށް ދޭންޖެހޭ ހާއްސަ ފަރުވާ މިހާރު ކޭއާރްއެޗުން ދެވޭނެ: މެނޭޖަރ

ދުވަސް ނުފުރާ ވިހާ ތުއްތު ކުދިންނަށް ދިމާވާ އެކިއެކި ސިއްހީ މައްސަލަތަކަށް ދޭންޖެހޭ ހާއްސަ ފަރުވާ މިހާރު ކުޅުދުއްފުށީ ރީޖަނަލް ހޮސްޕިޓަލުން ދެވޭނެ ކަމަށް އެހޮސްޕިޓަލްގެ މެނޭޖަރ ވިދާޅުވެއްޖެއެވެ.

ޚަބަރު އޮންލައިން އާ ވާހަކަ ދައްކަމުން ކޭއާރްއެޗްގެ މެނޭޖަރ ހެލްތު ސަރވިސް އަޙްމަދު ދާޢޫދް ވިދާޅުވީ ހޮސްޕިޓަލުގައި މީގެ ކުރިން އެން – އައިސީޔޫއެއް ހުރި ނަމަވެސް، އިންކިއުބޭޓަރެއް ނެތުމުން، ވިހެމަށް މާލެ ފޮނުވާލަންޖެހޭ މީހުން ގިނަކަމަށެވެ. އެހެންނަމަވެސް 15 އަހަރު ފަހުން އެން – އައިސީޔޫއަށް އިންކިއުބޭޓަރެއް ލިބި މިހާތަނަށް އޭގައި ދެ ކުއްޖަކަށް ފަރުވާވެސް ދީފައި ވާކަމަށް އަޙްމަދު ވިދާޅުވިއެވެ.

އިންކިއުބޭޓަރެއް ލިބުނު ނަމަވެސް އެން – އައިސީޔޫގެ ހިދުމަތް އެންމެ ފުރިހަމައަށް ދިނުމަށް އަދިވެސް އިތުރު ސާމާނު ބޭނުންވާކަމަށް އަޙްމަދު ވިދާޅުވިއެވެ. އެގޮތުން ސީޕީއޭޕީ މެޝިނާއި އިތުރު ޕޮޓޯތެރަޕީ ޔުނިޓް ފަދަ މެޝިން އަދިވެސް އެން – އައިސީޔޫގެ ބޭނުންވާކަން މެނޭޖަރ އަޙްމަދު ފާހަގަ ކުރެއްވިއެވެ.

" ދާދި ފަހުން އަޅުގަނޑުމެން ދުނިޔޭގެ، ދުވަސް ނުފުރާ ވިހާ ކުޑަކުދިންގެ ދުވަސް ފާހަގަ ކުރިއިރު، އުފާ ކުރަން ޖެހޭ ކަމަކީ ގާތްގަނޑަކަށް 15 އަހަރަށް ފަހުގައި އަޅުގަނޑުމެންގެ ހޮސްޕިޓަލަށް އިންކިއުބޭޓަރެއް ލިބިފައިވާ ކަން. އެންއައިސީޔޫއަށް ގެނެވުނު ކުރިއެރުމުގެ ސަބަބުން ދުވަސް ނުފުރާ ވިހަން ޖެހޭ ހާލަތްތަކުގައި މާލެ ދާން ޖެހޭ ދިއުން މަދުވެ، އެފަދަ ކުދިންނަށް އެކަށީގެންވާ ސިއްހީ ފަރުވާ ފޯރުކޮށްދިނުމުގެ ފުރުސަތު ފަހިވެގެން ދާނެ"
– ކޭއާރްއެޗްގެ މެނޭޖަރ ހެލްތު ސަރވިސް

ލިބުނު މި ކުރިއެރުމުގެ ތެރެއިން މި އަހަރުގެ ތެރޭގައި އެން – އައިސީޔޫއަށް ޒަމާނީ ފެންވަރުގެ 3 ބޭބީ ވާމާސް އަދި 2 ނިއޮނަޓަލް ވެންޓިލޭޓާސް ވެސް ލިބިފައި ވާކަމަށް އަޙްމަދު ވިދާޅުވިއެވެ.

މާލެ ފިޔަވާ އެންމެ ގިނަ ބަޔަކު ސިއްހީ ހިދުމަތް ހޯދާ ކުޅުދުއްފުށީ ރީޖަނަލް ހޮސްޕިޓަލުގެ ހިދުމަތުގެ ފެންވަރާއިމެދު މީގެ ކުރިން ގިނަބައެއްގެ ކަންބޮޑުވުންތަކެއް ހުރިކަން ފާހަގަވެގެން ދިޔައެވެ. އެހެންނަމަވެސް މިހާރު ސަރުކާރުން ގެންދަވަނީ އެ ހޮސްޕިޓަލްގެ އެކި އެކި ހިދުމަތްތަކުގެ ފެންވަރު ރަނގަޅުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން ހޮސްޕިޓަލަށް އަލަށް އިތުރުކުރެވޭ ބައިގެ މަސައްކަތްވެސް ފާހަގަ ކޮށްލެވެއެވެ.

މީގެ އިތުރުން ފަހަކަށް އައިސް އެ ހޮސްޕިޓަލުން މީގެކުރިން ނުކުރާވަރުގެ ބޮޑެތި އޮޕަރޭޝަންތައް ވެސް ކާމިޔާބު ކަމާއިއެކު ކޮށްފައި ވާކަން ފާހަގަ ކޮށްލެވެއެވެ.

ކުޅުދުއްފުށީ ރީޖަނަލް ހޮސްޕިޓަލަކީ ސަރުކާރުން ޓާޝަރީ ފެންވަރަށް ތަރައްގީ ކުރުމަށް މަސައްކަތްކުރާ އެއް ހޮސްޕިޓަލެވެ. 5 ސަރަހައްދުގައި ހަދާ ޓާޝަރީ ހޮސްޕިޓަލްގެ ފައިދާ އަންނަ އަހަރު ރައްޔިތުންނަށް ކުރާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ޖުމްހޫރީ ދުވަހުގެ މުނާސަބަތުގައި ގައުމާ މުޚާތަބް ކުރައްވަމުން ވަނީ ވިދާޅުވެފައެވެ.