މިމަހުގެ 18ގެ ނިޔަލަށް ބޯހިމެނުމުގެ މަސައްކަތްތައް ނިންމާލުމަށް އަމާޒުކޮށް މަސައްކަތް ކުރަމުންދާކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްއިން ވިދާޅުވެއްޖެއެވެ.
މާލެ ސަރަހައްދުން އެކި ސަބަބުތަކާ ގުޅިގެން ބޯހިމެނުމުގައި ބައިވެރިނުވާ މީހުންގެ މައުލޫމާތު އެއް ކުރުމަށް ބޯހިމެނުމުގެ މަސައްކަތް އިތުރު އެއް ހަފްތާއަށް ދިގު ދަންމާލަން މޯލްޑިވްސް ބިއުރޯ އޮފް ސްޓެޓިސްޓިކްސް ވަނީ ނިންމާފައެވެ.
ބިއުރޯ އޮފް ސްޓެޓިސްޓިކްސްއިން ނެރުނު ބަޔާނުގައި ބުނެފައިވަނީ ގެތަޅުލާފައި ހުރުމުގެ ސަބަބުން މައުލޫމާތު ނުލިބިވާ ގެތަކުގެ ތެރެއިން 41 ޕަސެންޓު ގޭގެ މައުލޫމާތު މިހާރު އެއް ކުރެވިފައިވާ ކަމަށާއި ބޯހިމެނުމުގައި ބައިވެރިނުވެވޭ ކަން އަންގަމުންދާ ފަރާތްތަކުން މައުލޫމާތު ވެސް މިހާރު އެއް ކުރަމުން އަންނަ ކަމަށެވެ.
އަދި، އަމާޒަކީ މި ހުރިހާ މަސައްކަތެއް މި މަހުގެ 18 ވަނަ ދުވަހުގެ ނިޔަލަށް ނިންމާލުން ކަމަށް ބުނެފައިވެއެވެ. ބޯހިމެނުމުގައި މިހާތަނަށް ބައިވެރިނުވެވޭ ފަރާތްތަކުން ބިއުރޯގެ ހޮޓްލައިން 1423 އަށް ގުޅައިގެން މައުލޫމާތު ދިނުމަށް އެދިފައިވެއެވެ.
މޯލްޑިވްސް ބިއުރޯ އޮފް ސްޓެޓިސްޓިކްސްއިން ވިދާޅުވީ، ބޯހިމެނުމުގެ ފީލްޑް މަސައްކަތް މާލޭ ސަރަހައްދު ފިޔަވާ، ރާއްޖޭގެ ހުރިހާ ސަރަޙައްދެއްގައި ނިންމާލެވިފައިވާކަމަށެވެ.
ބޯހިމެނިފައިނުވާ މީހުންނާއި ތަންތަނުން ސްޓެޓިސްޓިކްސް ބިއުރޯގެ ހޮޓްލައިން 1423 ނުވަތަ 3008400 އަށް ގުޅާ ނޯޓްކުރުމުން ބިއުރޯގެ މުވައްޒަފުން އެފަރާތްތަކުގެ މަޢުލޫމާތު ނެގުމުގެ އިންތިޒާމް ހަމަޖައްސައިދެމުންދާކަމަށާއި، ވެބްސައިޓުގައިވާ ސެންސަސް ފޯމް މެދުވެރިކޮށް ބޯހިމެނިފައިނުވާ ގޭބިސީތަކާ ރަޖިސްޓަރކޮށްގެން އިޤްތިޞާދީ މަސައްކަތްހިންގާ ތަންތަނުން އެންގުމުން، އެފަރާތްތަކުން ބޯހިމެނުމުގެ މަޢުލޫމާތު ފުރިހަމަކުރުމުގެ އިންތިޒާމް ހަމަޖައްސަމުންދާނެކަމަށްވެސް ސްޓެޓިސްޓިކްސް ބިއުރޯއިން ވިދާޅުވެއެވެ.
