މަސްވެރިންގެ ހައްގުގައި އިދިކޮޅު ކޯލިޝަނުން ކުރިއަށްގެންދިޔަ މުޒާހަރާ ތެރެއިން ހައްޔަރުކުރި 10 މީހުންގެ ތެރެއިން 9 މީހަކު ދޫކޮށްލައި އެކެއްގެ ބަންދުގެ މުއްދަތު އިތުރުކޮށްފިއެވެ.
މާލޭ މަސްމާރުކޭޓު ސަރަހައްދުގައި އިއްޔެ ކުރިއަށްދިޔަ މި އިހުތިޖާޖުގައި ޕީޕީއެމްގެ ލީޑާޝިޕްގެ ބައެއް ބޭފުޅުން ވެސް ވަނީ ބައިވެރިވެފައެވެ. މި އިހުތިޖާޖުގެ ބައިވެރިން އެކި ޝުއޫރުތައް ލިޔެފައިވާ ބޯޑުތައް ހިފަހައްޓައިގެން ތިބެ ޝުއޫރުފާޅު ކުރަމުންދާއިރު، އެއްވި މީހުން ވަނީ މަސްވެރިންނަށް ވީ ވައުދުތައް ފުއްދުމަށް ގޮވާލާފައެވެ.
އިދިކޮޅު އިސް ބޭފުޅުންވެސް ބައިވެރިވެވަޑައިގެން ކުރިއަށްގެންދާ އެ މުޒާހަރާ ހުއްޓުވުމަށް ފުލުހުން ވަނީ ކަރުނަ ގޭސްވެސް ބޭނުންކޮށްފައެވެ. މި މީހުންގެ ބަންދާ މެދު ގޮތެއް ނިންމުމަށް މިއަދު ކޯޓަށް ހާޒިރުކުރުމުން ބަންދުގައި ބެހެއްޓުމަށް ކޯޓުން ނިންމީ ޕީޕީއެމްގެ ޔޫތު މެންބަރު އަލީ އިޒްހާންއެވެ. ކޯޓުން އޭނާގެ ބަންދަށް ދިނީ ތިން ދުވަހެވެ.
މިފަހުން އިދިކޮޅުން މިފަދަ މުޒާހަރާތަކެއް ނުބޭއްވި ދިޔަނަމަވެސް، ކުރިއަށް އޮތް ތަނުގައި މިފަދަ ގިނަ މުޒާހަރާތަކެއް ފެނިގެންދާނެކަމަށް އެކޯލިޝަނުން ވަނީ ބުނެފައެވެ. ވަކިން ޚާއްސަކޮށް ސަރުކާރުން ވެފައިވާ ވައުދުތަކާއި، ނުފުއްދިހުރި ވައުދުތައް ސަރުކާރަށް ހަދާން ކޮށްދިނުމަށް އެއްވުންތައް ބާއްވާނެކަމަށް ވަނީ ބުނެފައެވެ.
މަސްވެރިންނަށް ސަރުކާރުން އިހުމާލުވެފައިވާ ކަމަށް ބުނެ ޕީޕީއެމްއިން މަސްމާރުކޭޓު ސަރަހައްދުގައި އިއްޔެ ކުރި މުޒާހަރާ ރޫޅާލުމުން މަޖިލީހަށް މިއަދު ހުށަހެޅި ކުއްލި މައްސަލައެއްވެސް ހުށަހަޅާފައިވެއެވެ. ނަމަވެސް މިމައްސަލަ މަޖިލީހުން ބަލައިގަނެފައި ނުވެއެވެ.
