ތައުލީމީ ދާއިރާއަށް އަންނަ ކޮންމެ މާނަވީ ބަދަލެއް ތަންފީޒުކުރާ ފަރާތަކީ މުދައްރިސުން ކަމަށާއި ޤައުމު ގެންދާން ބޭނުންވާ މިސްރާބު، ޙަޤީޤަތުގައި އަމާޒުކުރާ ފަރާތަކީ މުދައްރިސުން ކަމުގައި އެޑިއުކޭޝަން މިނިސްޓަރ ޑރ.އައިޝަތު އަލީ ވިދާޅުވެއްޖެއެވެ.
ބައިނަލް އަގުވާމީ މުދައްރިސުންގެ ދުވަހުގެ ތަހުނިޔާ ހުރިހާ މުދައްރިސުންނާއި، ތައުލީމީ ދާއިރާގައި ހަރަކާތްތެރިވާ ބޭފުޅުންނަށް އަރިސްކޮށް މިނިސްޓަރ ދެއްވި ޚިތާބުގައި ވިދާޅުވީ ދަރިވަރުން އުނގެނޭ ތަކެތި ބިނާވަނީ ހަމައެކަނި މުދައްރިސުން ނަގައިދެއްވާ ފިލާވަޅުތަކަށް ނޫން ކަމަށެވެ. އަދި ކޫލާއި، ދަރިވަރުންނާއި، މުޖުތަމައާއެކު މުދައްރިސުން އުފައްދާ ގުޅުންތަކާއި، މީހުންނާ މުއާމަލާތްކުރާ ގޮތްތަކުން ވެސް ދަރިވަރުން ނަމޫނާ ނަގާ ކަމަށެވެ.
ތައުލީމީ ދާއިރާއަށް އަންނަ ކޮންމެ އިންގިލާބީ ބަދަލެއްގެ ފަހަތުގައި ތިބެނީ މުދައްރިސުން ކަން ފާހަގަކުރައްވަމުން މިނިސްޓަރު ވިދާޅުވީ ކޯވިޑްގެ ތެރޭގައި މުދައްރިސުން އެކަން ކަށަވަރު ކޮށްދީފި ކަމަށެވެ. ކޮވިޑުގެ އަނދިރި ވިލާގަނޑުގެ ތެރެއިން އުނގެނުން ހުއްޓައިލާން ޖެހިދާނެކަމުގެ ބިރުވެރިކަން ކުރިމަތިވީ ހިނދު ކިލާހުގެ ހަތަރުފާރުން ބޭރުވެ ބޭރުގެއަށް ފިލާވަޅުތައް ގެނެސްދިނުމުގައި މުދައްރިސުން އިސްނަންގަވައިގެން އެ ކޮށްދެއްވި ބުރަ މަސައްކަތް އެ ކަމުގެ ދަލީލަކަށް ފުދޭ ކަމަށް ވިދާޅުވިއެވެ.
މިއަހަރުގެ ޓީޗަރުންގެ ދުވަހުގެ ޝިއާރެއްގެ ގޮތުގައި ކަނޑައަޅާފައި ވަނީ "ތައުލީމުގެ ގޮތްތަކާއި ސިފަ ބަދަލުކުރަން ފަށަނީ މުދައްރިސުންނާ ހަމައިން" މިއެވެ. އެ ޝިއާރު ހިޔާރުކުރީ ކޮވިޑުގެ ދަތި ހާލަތުގައި މުދައްރިސުންވީ ގުރުބާނީގެ އަގު ވަޒަންކުރުމުގެ ގޮތުންނެވެ. އަދި ދިރިއުޅުމާ ދަރިވަރުން ކުރިމަތިލުމަށް ބޭނުންވާނެ އުކުޅުތަކާއި ހުނަރުތައް ދަރިވަރުންނަށް ދަސްކޮށްދިނުމަށް މުދައްރިސުންނަށް ބޭނުންވާ ވަސީލަތްތަކާއި ތަމްރީނުތައް ހޯދައިިދިނުމަށް އެހީތެރިވުމަށެވެ.
މިނިސްޓަރ ވިދާޅުވީ ތައުލީމީ ދާއިރާއަށް އަންނަ ކޮންމެ މާނަވީ ބަދަލެއް ތަންފީޒުކުރާ ފަރާތަކީ މުދައްރިސުން ކަމަށާއި ޤައުމު ގެންދާން ބޭނުންވާ މިސްރާބު، ޙަޤީޤަތުގައި އަމާޒުކުރާ ފަރާތަކީ މުދައްރިސުން ކަމަށެވެ. މި ޒަމާނުގައި މުދައްރިސުން ވިސްނާލަންޖެހޭ މުހިއްމު ކަންތައްތަކެއް އެބަހުރިކަން ފާހަގަކުރައްވަމުން ވިދާޅުވީ ދަރިވަރުން އުނގެނޭ ތަކެތި ބިނާވަނީ ހަމައެކަނި މުދައްރިސުން ނަގައިދެއްވާ ފިލާވަޅުތަކަށް ނޫން ކަމަށެވެ.
ދަރިވަރުންގެ ދިރިއުޅުމުގައި، އެކުދިންނަށް އެންމެ ނުފޫޒު ފޯރާ އުމުރުފުރާގައި، އެކުދިންނާ ބައްދަލުވާ މުދައްރިސުންނަކީ އެކުދިންގެ އުޅުންތަކާއި ގުޅުންތައް ބައްޓަންކުރާ ފަރާތްތައް. އެހެންކަމުން މުދައްރިސުންގެ އަރިއަހުން އެދެނީ ދަރިވަރުންގެ ގައިގައި އަށަގަންނުވަން ބޭނުންވާ ރިވެތި ސިފަތަކުން މުދައްރިސުން ނަމޫނާ ދެއްކުމަށް.
– މިނިސްޓަރު ވިދާޅުވިއެވެ.
#މުދައްރިސުންގެދުވަސް2022#ޝުކުރިއްޔާމުދައްރިސް ♥️ pic.twitter.com/SRQ932n70R
— Ministry of Education (@MoEdumv) October 4, 2022
މިނިސްޓަރު އައިޝަތު އަލީ ވިދާޅުވީ ދީނާއި ގައުމުދެކެ ލޯބިވާ، އެކަކު އަނެކަކަށް އަޅާލާ، އިލްތިރާމުކުރުމާއެކު އިގްތިސޯދުކުރުންފަދަ މަކާރިމުލްއަހްލާގު (ރިވެތި އަހްލާގު)ގެ އުޅުންތަކުން ފޭރާންލާ ބަޔަކަށް މުދައްރިސުން ވާން ޖެހޭ ކަމަށެވެ.
