ސަރުކާރުން ހިންގާ ބޯހިޔާވަހިކަމުގެ މަޝްރޫޢުތައް ދެމެހެއްޓެނިވި ގޮތެއްގައި ކުރިއަށްގެންދިއުމަށް ފްލެޓްތަކަށް ޤަވާއިދުން ކުލި ދެއްކުން މުހިއްމުކަމަށް ޕްލޭނިން މިނިސްޓަރ މުޙައްމަދު އަސްލަމް ވިދާޅުވެއްޖެއެވެ. މިނިސްޓަރ މިހެން ވިދާޅުވީ، އެމްއޭސީއެލުން އެ ކުންފުނީގެ މުވައްޒަފުންނަށް އިމާރާތްކުރި ދެ ޓަވަރުގެ މަސައްކަތް ނިންމައި، އެ ފްލެޓްތަކުގެ ތަޅުދަނޑި ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

މިނިސްޓަރ އަސްލަމް ވިދާޅުވީ، ސަރުކާރުގެ އަމާޒަކީ ހުރިހާ ރައްޔިތުންނަށްވެސް ހަމަހަމަކަމާއެކު ބޯހިޔާވަހިކަން ފޯރުކޮށްދިނުންކަމަށެވެ. އެހެންނަމަވެސް ސަރުކާރުން ހިންގާފައިވާ ބޯހިޔާވަހިކަމުގެ އެކި މަޝްރޫޢުތަކުން ފްލެޓް ލިބުނު ބައެއް ފަރާތްތަކުން ޤަވާއިދުން މަހުން މަހަށް ކުއްލި ދައްކަމުންނުދާތީ، އެކަމުގެ ކަންބޮޑުވުން މިނިސްޓަރ ފާޅުކުރެއްވިއެވެ.

އަސްލަމް ވިދާޅުވީ، ސަރުކާރުން ހިންގާ ހައުސިންގ މަޝްރޫޢުތަކަކީ ފައިސާ ދައްކައިގެން އެތަންތަން އަމިއްލަ ކުރުމުގެ ފުރުޞަތު ލިބޭ ސްކީމްތަކެއްކަމަށެވެ. އެހެންނަމަވެސް ފްލެޓް ލިބުނު ގިނަ ބަޔަކު އެތަންތަނަށް ޤަވާއިދުން ފައިސާ ނުދައްކާކަން މިނިސްޓަރ ފާހަގަކުރެއްވިއެވެ. ބޯހިޔާވަހިކަމުގެ މަޝްރޫޢުތައް ދެމެހެއްޓެނިވިގޮތެއްގައި ހިންގުމަށް މަހުން މަހަށް ކުލި ދެއްކުން މުހިއްމުކަމަށް މިނިސްޓަރ އަސްލަމް ވިދާޅުވިއެވެ.

މަހުން މަހަށް ދައްކަންޖެހޭ ލާރި 31 ޕަސެންޓާއި 41 ޕަސެންޓާ ދެމެދުގެ މީހުން ހަމައަށް ޤަވާއިދުން ދައްކަމުން ނުދެއޭ. ސަސްޓެއިނަބަލްކޮށް މިކަން ކުރާކަމަށްވަންޏާ މަހުން މަހަށް ދައްކަންޖެހޭ ލާރި ޤަވާއިދުން ޖެހޭނެ ދައްކަން"

– މިނިސްޓަރ އަސްލަމް ވިދާޅުވިއެވެ.

މިނިސްޓަރ އަސްލަމް ވިދާޅުވީ، މީގެ 30 އަކަށް އަހަރު ކުރިއަށްޖެހިލާއިރު ސަރުކާރުން އަޅާފައިވަނީ ނިސްބަތުން މަދު ފްލެޓްތަކެއްކަމުން، 40 އިންސައްތަ މީހުން ޤަވާއިދުން ފައިސާ ނުދެއްކިނަމަވެސް ސަރުކާރަށް ކެތްކުރެވޭކަމަށެވެ. އެހެންނަމަވެސް މިހާރު ހާހުން ފްލެޓްތައް އަޅާއިރު، 40 އިންސައްތަ މީހުން ޤަވާއިދުން ކުލި ނުދައްކާނަމަ، މިއީ ދެކޮޅުޖެއްސޭނެކަމެއް ނޫންކަމަށް އަސްލަމް ވިދާޅުވިއެވެ.