އަންނަ އަހަރަށް ލަފާކޮށް ދައުލަތުން ވަނީ 34.8 ބިލިޔަން ރުފިޔާގެ ބިޔަބޮޑު ބަޖެޓެއް މަޖިލީހަށް ފޮނުވާފައެވެ. މުޅި ދުނިޔެ އިޤްތިޞާދީ ކަޅު ވިލާގަނޑެއްގެ ދަށުގައި އޮތް މިހާލަތުގައި ދުނިޔޭގެ މާލީ އިދާރާތަކުން ދިޔައީ ރާއްޖޭގެ އިޤްތިޞާދުގައި މާލީ ބުރަދަން ހުރި މިންވަރު ނިކަން ރަނގަޅަށް ތިލަ ކޮށްދެއްވަމުން ނެވެ. "ފިޗް" އާއި "މޫޑީސް" ގެ ރިޕޯޓުން ދެއްވާފައިވާ ލަފާގައި ކޮޅުފައިން ޖަހައި، އަމިއްލަ އިޤްތިޞާދީ ބުރަދަނެއް ނެތް، މާލީ ނިޒާމު ނިކަމެތި ދިވެހި ސަރުކާރުން ވަނީ ބިޔަބޮޑެތި ލޯނުތަކާއި، ބަޖެޓަށް ނުކަތާވަރަށް ތަރައްޤީގެ ޕްރޮގުރާމުތައް ހިމަނައި ބޮޑެތި އަދަދުތަކުން ބަޖެޓް ފޮތް ފުރާލާފައެވެ. ފެންނަން އޮތީ ލިބޭނެ އެއްޗަކަށްވުރެ، އަދި އުފެއްދޭނެ އެއްޗަކަށްވުރެވެސް "ދަރަންޏަށް" ބަރޯސާވާ އަދަދުތަކަކެވެ.
މިހަފްތާގައި މަޖިލީހުގައި ވަނީ ބަޖެޓްގެ ބަހުސް މަރުހަލާ ކުރިއަށް ގެންގޮސްފައެވެ. ބަހުސް މަރުހަލާގައި ފެނިގެންދިޔައީ އާދަޔާއި ޚިލާފް އަޑުތަކާއި، މަންޒަރުތަކެވެ. މަޖިލީހުގައި ތިބި އިދިކޮޅު މެމްބަރުން ބަޖެޓަށް ފާޑުކިޔަން ޖެހުމުގެ ބަދަލުގައި ސުޕަމެޖޯރިޓީން ވަނީ "އަންބާ" ކިޔާފައި ބަޖެޓު ބަހުސް ނިކަން ރަނގަޅަށް ކުރިއަށް ގެންގޮސް ސަރުކާރު ލަދު ގަންނަވާލާފައެވެ. ދައުލަތުގެ ކުންފުނިތަކުން ވައްކަން ކުރާ ވާހަކައާއި، ވަޒީރުން ކަޅުބާޒާރުގައި ޑޮލަރު ވިއްކާ ވާހަކައާއި، ދައުލަތުގެ ވެރިން ބައި އަޅައިގެން ޕްރޮޖެކްޓް ނަގައިގެން ކުރިއަށް ގެންދާ ވާހަކަވެސް ފަށުވި އިބާރާތްތަކުން، ތަފްސީލީ ގޮތެއްގައި އެމްޑީޕީގެ މެމްބަރުންގެ ދޫފުޅުން ވަނީ އަޑު އިވިގެން ގޮސްފައެވެ.
ބަޖެޓު ބަހުސް ފެށި ދުވަހު މެމްބަރުންގެ ޝައުގުވެރިކަން ބަޖެޓަށް ނުލިބި، ބަހުސްގެ މަރުހަލާއަށް ލިބެމުންދިޔަ ސަމާލުކަން ކުޑަވުމުން ރައީސް ނަޝީދު ގެންދެވީ މަޖިލިސް ރިޔާސަތުގައި އިންނަވައިގެން ބަޖެޓަށް ވަރަށް ބޮޑަށް ފާޑުވިދާޅުވެ، ބަޖެޓަށް އެމްޑީޕީގެ މެމްބަރުން ވޯޓުދެއްވަން ޖެހޭ ސަބަބެއް ނެތްކަމަށް ދޭހަވާ މޭރުމަކުން ވާހަކަ ދައްކަވަމުންނެވެ. ރައީސް ނަޝީދު ވިދާޅުވަމުން ގެންދެވީ"ޅޮހޭ ރަނގަޅީ. ޅޮހޭ ރަނގަޅީ،" މިޅެންބައިތެވެ. "ޅޮހޭ ރަނގަޅީ، ޅޮހޭ ރަނގަޅީ" މިއީ ބޮޑުފެންވަޅުގޭ ސީދީގެ ޅެމެއްގެ ތަންކޮޅެކެވެ.
ރައީސް ނަޝީދު ބަޖެޓު ބަހުސްގައި ދޭތެރެ ދޭތެރެއިން ކިޔަމުންދިޔަ ފާޑުކިޔުންތަކާއިއެކު ހިތްވަރުލިބި އެމްޑީޕީގެ ސުޕަ މެޖޯރިޓީގެ ލީޑަރު އާލީ އާޒިމްއާއި، މަޖިލިސް ނައިބް ރައީސް އިވާ އަބްދުﷲއާއި، މީކާއިލް ނަސީމާއި، އިބްރާހިމް ރަޝީދު (ބޮންޑޭ) އާއި، އިމްތިޔާޒު ފަހުމީއާއި، ހަސަން ލަތީފާއި، މުހައްމަދު ވަހީދު (ވައްޑޭ) މެންފަދަ އަޑުގަދަ، ދޫހެލޭ މެމްބަރުން ވަނީ ސަރުކާރަށް "ކުރުދޮށިން" ދީ ހަމަބިމަށް ތިރިކޮށްފައެވެ.
އެމްޑީޕީގެ ސުޕަމެޖޯރިޓީން ބަޖެޓަށް ދިން ރައްދަކީ މަޖިލީހުގައި ހިމެނޭ އިދިކޮޅު މެމްބަރުންވެސް މިފަހަރުގެ ބަޖެޓަށް ދީފައި ނުވާވަރުގެ ހޫނު ރައްދުތަކެވެ. އެ ވާހަކަތައް ވެގެން ގޮސްފައިވަނީ ސަރުކާރަށް ހަޖަމް ކުރަން ދަތިވި ވާހަކަ ތަކަކަށެވެ. އިދިކޮޅު މެމްބަރުންނަށް މިފަހަރުގެ ބެޖެޓަށް ވާހަކަ ދައްކަވަން ޖެހުނުއިރު، މިނިސްޓަރ އަމީރު އިންނެވީ މަޖިލީހުގައި އިސް ޖަހައިގެންނެވެ. އަމިއްލަ ޕާޓީ މެމްބަރުން 3 ދުވަސް ވަންދެން ވަޒީރާއި ސަރުކާރަށް ދެމުންދިޔަ ރައްދު ތަކުގައި ގޮޑިން ތެދުވެ ބަހެއް ބުނެލަން ކެރުނީވެސް ދެތިން ފަހަރަށެވެ. ވަޒީރު ބަޖެޓާމެދު ދެކޭގޮތް ހާމަކޮށް އެއްޗެއް ވިދާޅުވާ ކޮންމެ ފަހަރަކު އެމްޑީޕީގެ ރައީސް، މަޖިލިސް ރިޔާސަތުގައި އިންނަވައިގެން މިނިސްޓަރ އަމީރު ދެއްކެވި ވާހަތަކަށް ރައްދު ދެއްވި މަންޒަރުވެސް ވަނީ ފެނިގެން ގޮސްފައެވެ.
ބަޖެޓް ބަހުސްގައި މަޖިލީހުގައި ހިމެނޭ 87 މެމްބަރުންގެ ތެރެއިން ބަހުސްގެ މަރުހަލާގައި ބައިވެރި ވެފައިވަނީ 69 މެމްބަރުންނެވެ. ބަޖެޓް ބަހުސްގައި ބައިވެރި ވެފައި ނުވަނީ 18 މެމްބަރުންނެވެ. ބަޖެޓްގެ 69 މެމްބަރުންގެ ބަހުސްއަށް 15 ގަޑިއިރާއި 43 މިނިޓް ވަނީ ހޭދަ ކޮށްފައެވެ. ބަހުސްގެ މަރުހަލާގައި ބަޖެޓަށް ތާއީދުކޮށް ވާހަކަ ދެއްކެވީ 10 ވަރަކަށް މެމްބަރުންނެވެ. މިހާބޮޑަށް ފާޑުކިޔައި، ރާއްޖެއަށް ގެއްލުންވާނެކަމަށް ސުޕަމެޖޯރިޓީން ބުނެފައިވާ ބަޖެޓަކަށް ވޯޓު ދެއްވާނެ ގޮތަކާއިމެދު ގިނަބައެއްގެ ހިތުގައި މިއަދު ވަނީ ސުވާލު އުފެދިފައެވެ. މިހާ ގޯސްކޮށް އޮތް ބަޖެޓެއް، ކޮމިޓީ މަރުހަލާއިން ބޮޑު ބަދަލެއް ނުގެނެސް، އޮތް ގޮތަށް ފާސްކޮށްފިނަ މަޖިލީހަކީ ސީދާ "ރަބަރ ސްޓޭމްޕް" ޖަހާ ތަނަކަށް ނޫނީ ނުވާނެކަން ކަށަވަރެވެ.
