މިސަރުކާރުން ރައްޔިތުންނަށް ވެފައިވާ ވައުދުތަކުގެ ތެރެއިން 99 އިންސައްތަ ވައުދު ފުއްދިފައިވަކަމަށް ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.
މަޖިލީހުގެ މިއަދު ޖަލްސާއަށް ފިޝަރީޒް މިނިސްޓަރ ޑރ.ހުސެއިން ރަޝީދު ހުސެއިން މަޖިލީހަށް ހާޒިރުކޮށް ކުރެވުނު ސުވާލުތަކުގެ ތެރެއިން ތިމަރަފުށީ ދާއިރާގެ މެމްބަރު ރިޔާޒު ވަނީ ސަރުކާރުން މަސްވެރިންނަށް ވެފައިވާ ވައުދުތަކުގެ ތެރެއިން ކިހާ މިންވަރެއް ހާސިލް ކުރެވިފައިވޭތޯ ސުވާލު ކުރައްވާފައެވެ.
ސުވާލުގެ ޖަވާބުގައި ވަޒީރު ވިދާޅުވީ މަޖިލީހަށް ވަޑައިގެންނެވިއިރު ވައުދުތައް ފުއްދިފައިވާ މިންވަރު އެގޭނެ ހިސާބުތަކެއް މަޖިލީހަށް ނުގެންނަވާކަމަށެވެ. މިނިސްޓަރ އެސުވާލުގެ ޖަވާބު އެހިސާބަށް ކުރުކޮށްލުމުން ރިޔާޒު ވަނީ ނިޒާމީ ނުކުތާ ނަންގަވައި އަނެއްކާވެސް އެސުވާލު ތަކުރާރު ކުރައްވާފައެވެ. ރިޔާޒު ސުވާލު ކުރެއްވުމާއިއެކު ނިޒާމީ ނުކުތާ ނަންގަވައި އެސުވާލަށް ޖަވާބު ދެއްވީ މާމިގިލީ ދާއިރާގެ މެމްބަރު ގާސިމް އިބްރާހިމްއެވެ.
ޤާސިމް ވިދާޅުވީ މިސަރުކާރުން ރައްޔިތުންނަށް ވެފައިވާ ވައުދުތަކުގެ ތެރެއިން 99 އިންސައްތަ މަސައްކަތް ނިމިފައިވާކަމަށެވެ. ޤާސިމް މިޖަވާބު ދެއްވީ ރިޔާޒު އެސުވާލު ތަކުރާރުކޮށް ޖުމްހޫރީ ޕާޓީއަށް ނިސްބަތްވާ ފިޝަރީޒް މިނިސްޓަރާއި ކުރެއްވުމުންކަމަށް ބެލެވެއެވެ.
ޤާސިމް ވިދާޅުވީ 2010 ވަނަ އަހަރުން ފެށިގެން މިހާތަނަށް އައި އެއްވެސް ސަރުކާރަކަށް މަސްވެރިކަމަސް ވެފައިވާ ވައުދުތައް ތަންފީޒު ނުކުރެވޭކަމަށެވެ. ނަމަވެސް މިސަރުކާރުން މަސްވެރިކަމަށް ވެފައިވާ ވައުދުތައް ފުއްދަން ވަރަށް ބޮޑަށް މަސައްކަތް ކުރާކަމަށެވެ. އަދި މިދުވަސްވަރަކީ މަސްވެރިކަން އެންމެ ރަނގަޅު ދުވަސްވަރެއްކަން އެގެނީ މިއަދު ނޫންކަން މީގެ 1،000 އަހަރު ކުރިން އެގޭކަމަށް މަޖިލިސް ރައީސް ވިދާޅުވުމުން ޤާސިމް ވިދާޅުވީ މިވީހާ ދުވަހު އައި ސަރުކާރުތަކުންވެސް އެއްވެސް ހައްލެއް ހޯދައި ނުދިނީ ކޮންސަބަބާއި ހެދިކަމެއް ނޭގޭކަމަށެވެ.
ޤާސިމް މިއަދު މިހެން ވިދާޅުވިއިރު، މިދިޔަ ހަފްތާގައި ޤާސިމް ވަނީ ރާއްޖެ ޓީވީގައި ވާހަކަ ދައްކަވަމުން ސަރުކާރުން މަސްވެރިންގެ ސިޔާސަތަށް ވަރަށް ބޮޑަށް އިހުމާލުވެފައިވާކަމަށް ވިދާޅުވެފައެވެ. ގާސިމް ވިދާޅުވީ، މަސްވެރިކަމުގެ ސިނާއަތަށް އަމިއްލަ ފަރާތްތަކަށް ވަކި މުއްދަތަކަށް ރަށްތައް ދޫކޮށް، މަސްވެރިކަން ކުރިއަރުވަނީ ކަމަށް ބުނެ ސަރުކާރުން ފަތުރަނީ ޕްރޮޕެެގެންޑާ ކަމަށެވެ. އޭނާ އެކަން ސިފަކުރެއްވީ "ބޮޑު ޖޯކެއް" ގެ ގޮތުގައެވެ.
ގާސިމްގެ އަނެއް ކަންބޮޑުވުމަކީ މި ސަރުކާރު ވެރިކަމަށް އައިސް ގޭދޮށު ފެކްޓަރީގެ ނަމުގައި މަސްވެރިކަން ކުރިއެރުވުމުގެ އާ ހުއްދައެއް ދޭން ފެށުމެވެ. އޭގެ ނަތީޖާއަކީ މަސްވެރިކަމުގެ ސިނާއަތުގައި މިހާތަނަށް މަސައްކަތްކުރި ގާސިމްމެން ފަދަ ބޭފުޅުންނަށް ސަރުކާރުން ދިން އެކްސްކްލޫސިވިޓީ އުވުން ކަމަށް އޭނާ ވިދާޅުވިއެވެ.
