ޔޯގާގެ ކަންކަން އިސްލާމްދީނުގައި އޮންނަ ގޮތް ފަތުވާ މަޖިލީހުން ބަލާފައި ނެތުމުންނާއި، ޔޯގާއާއި ގުޅޭގޮތުން އިޖުރާއަތްތަކާއި ޚިލާފަށް އިސްލާމިކް މިނިސްޓްރީން ފުލުހުންނަށް ސިޓީ ފޮނުވި މައްސަލަ ބެލުމަށް ސަރުކާރުގެ މަސްޢޫލިއްޔަތު އަދާކުރާ މިންވަރު ބަލާ ކޮމިޓީން ނިންމައިފިއެވެ. އެ މައްސަލަ ކޮމިޓީއަށް ހުށައެޅުއްވީ މަޑުއްވަރީ ދާއިރާގެ ޕީއެންސީ މެންބަރު އާދަމް ޝަރީފް ޢުމަރެވެ.
އިސްލާމީ ފަތުވާދޭ އެންމެ މަތީ މަޖިލީހުގެ ދައުރު ހަމަވެ އެތައް ދުވަހެއް ވެގެންދާއިރުވެސް ފަތުވާދޭ މަޖިލިސް އެކުލަވާ ނުލާތީ ވީހާވެސް އަވަހަކަށް އިސްލާމީ ފަތުވާދޭ މަޖިލިސް އެކުލަވާލުމަށް ގޮވާލައި މަޖިލީހަށް މައްސަލައެއްވެސް އާދަމް ޝަރީފް ހުށައެޅުއްވިއެވެ. ނަމަވެސް އެމްޑީޕީގެ ސުޕަ މެޖޯރިޓީ އޮންނަ މަޖިލީހުން ވަނީ އެ މައްސަލަ ބޭރުކޮށްލާފައެވެ.
އެ މައްސަލަ ކޮމިޓީ އަށް ހުށަހެޅީ އެ ކޮމިޓީގައި ވެސް އިންނަވާ، ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އަދި އިދިކޮޅު ޕީއެންސީގެ ޕީޖީގެ ލީޑަރު އާދަމް ޝަރީފެވެ.
ރާއްޖޭގައި އުފެދޭ ދީނީ ހިޔާލު ތަފާތުވުންތައް ނައްތާލައި އާއްމުން ހޭލުންތެރިކުރުވުމުގެ ގާނޫނީ ޒިންމާ އޮތް އިސްލާމީ ފަތުވާ ދޭ އެންމެ މަތީ މަޖިލީހުގެ ބޭނުން ސަރުކާރުން ނުހިފާތީ ރައްޔިތުންގެ މަޖިލީހުގެ ތަޅުމަށް ވެސް އާދަމް ޝަރީފް މިއަދު ހުށަހެޅުއްވި ކުއްލި މައްސަލައެއް ހުށަހެޅުއްވި އެވެ. އެކަމަކު އެ މައްސަލަ ވަނީ ބޭރުކޮށްލައިފަ އެވެ.
އާދަމް ޝަރީގް މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓިއަށް ހުށައެޅި ސިޓީއެއްގައިވަނީ، ރާއްޖޭގައި ޔޯގާ ހަރަކާތެއް ބާއްވަން ނުފެންނަ ކަމަށް އިސްލާމިކް މިނިސްޓްރީން ފުލުސް އޮފީހަށް ސިޓީއެއް ފޮނުވާފައި ވަނިކޮށް، މިދިޔަ ޖޫން މަހުގެ 21 ވަނަ ދުވަހު ސަރުކާރުން އެ ހަރަކާތް ގަލޮޅު ދަނޑުގައި ބޭއްވުމުގެ ސަބަބު އެ ތަނުގެ މަސްލަހަތު ގެއްލި، ހަމަނުޖެހުންތައް ހިންގުމާއެކު، އެ މިނިސްޓްރީން ފޮނުވި ސިޓީ ފޮނުވީ އިޖުރައާތުތަކާ ހިލާފަށް ކަމަށް ބުނެ ބަޔާނެއް ނެރެފައިވާކަމަށެވެ. ދީނީ ގޮތުން ހިޔާލު ތަފާތުވުން އުފެދޭ ކަމެއްގައި، އާންމުން އިތުރަށް އޮޅުންއަރާ ގޮތަށް ސަރުކާރުގެ ވުޒާރައަކުން ފޮނުވާފައި ސިޓީއެއްގެ ޒިންމާ ނެގުމުގެ ބަދަލުގައި އެ ސިޓީ އަކީ އިޖުރައާތުތަކާ ހިލާފަށް ފޮނުވާފައިވާ ސިޓީއެއް ކަމަށް ބުނުމަކީ ވަރަށް ޒިންމާދާރުކަން ކުޑަ، ރާއްޖޭގެ ދީނީ އެއްބައިވަންތަކަށް ގެއްލޭ ފަދަ ކަންކަން ހިނގުމަށް މަގުފަހިވާ ކަމެއްކަމަށްވެސް އެ ސިޓީގައިވެއެވެ.
އީ އިސްލާމިކް މިނިސްޓްރީން، ގާނޫނީ ވާޖިބު އަދާކުރުމުގެ ބަދަލުގައި އެ މިނިސްޓްރީގައި ތިބޭ މީހުން ބޭނުންވާ ގޮތަކަށް ފަތުވާ ނެރުމުގެ ފުރުސަތު އޮތް ކަމަކަށް ވާތީ، އެ މައްސަލަ ބެލުމަށާއި އަދި އެކަމާ ގުޅިގެން މިނިސްޓްރީން އަޅާފައިވާ ފިޔަވަޅުތަކާ ގުޅިގެން އެ އިދާރާ ޖަވާބުދާރީކުރުވުމަށް އާދަމް ޝަރީފް ހުށައެޅުއްވި ސިޓީގައި އެދިވަޑައިގެންފައިވެއެވެ.
މި މައްސަލާގައި ސަރުކާރުގެ ކަމާ ގުޅުންހުރި ފަރާތްތައް ޖަވާބުދާރީކުރުވުމުގެ ގޮތުން އިސްލާމިކް މިނިސްޓްރީ އާއި ފުލުހުންގެ އިސްވެރިން ކޮމެޓީއަށް ހާޒިރުކުރުވުމަށް ހުށަހެޅުއްވީ، މަހިބަދޫ ދާއިރާގެ ޕީޕީއެމްގެ މެންބަރު އަހުމަދު ޠާރިޤެވެ.
މި އަހަރުގެ ޖޫން މަހުގެ 21 ވަނަ ދުވަހު ގަލޮޅު ރަސްމީ ދަނޑުގައި ބޭއްވި ހަރަކާތަކަށް ހުރަސްއަޅައި، އެހަރަކާތުގައި ބައިވެރިވެވަޑައިގެންނެވި ބޭފުޅުންނާ ދެކޮޅަށް ބަޔަކު ހިންގި ޢަމަލުތައް ބެލުމަށް ރައީސް ވަނީ ކޮމިޓީއެއްވެސް އެކުލަވާލައްވާފައެވެ.
ވަޒީރުންގެ މަޖިލީހުގެ ސަބް ކޮމެޓީގެ ރިޕޯޓުގައި، އެ ދުވަހު ކަން ހިނގައިދިޔަ ގޮތް ދިރާސާކޮށް، އެ ކަންކަން ދެނެގަތުމަށް ކޮމެޓީން ކުރައްވާފައިވާ މަސައްކަތްތައް ހިމަނުއްވާފައިވެއެވެ. މިގޮތުން ކޮމެޓީން ކުރެއްވި ދިރާސާއާ ގުޅިގެން އެކުލަވައިލެއްވި ރިޕޯޓުގައި، 5 ދާއިރާއަކުން 39 ރިކޮމެންޑޭޝަނެއް ހުށަހަޅުއްވާފައިވެއެވެ. މިގޮތުން ރިކޮމެންޑޭޝަން ހުށަހަޅުއްވާފައިވާ ދާއިރާތަކުގެ ތެރޭގައި، ސެކިއުރިޓީ ބެލެހެއްޓުމާއި ސެކިއުރިޓީ އޮޕަރޭޝަންތައް ހިންގުމުގައި ޢަމަލުކުރާނެ ގޮތާއި، ދީނީ ގޮތުން ޚިލާފް އުފެދޭ ކަންކަމުގައި ޢަމަލުކުރާނެ ސިޔާސަތު އެކުލަވައިލުމާއި، އިވެންޓްތައް ރާވައި އިންތިޒާމުކުރުމާއި، އިހުމާލުވެފައިވާ ފަރާތްތަކާ މެދު ފިޔަވަޅު އެޅުމާއި، ޤައުމީ ސަލާމަތަށް ނުރައްކާވެދާނެ ކަންކަމަށް މަގުފަހި ކުރުވާ ކަންކަން ދެނެގަނެ، އެ ކަންކަން ޙައްލުކުރުމަށް އަވަސް ފިޔަވަޅު އެޅުއްވުން ހިމެނެއެވެ.
ޔޯގާ ހަމަނުޖެހުންތަކާއި ގުޅިގެން 21 މީހަކު ހައްޔަރުކުރިއެވެ. އޭގެ ތެރެއިން ބައެއް މީހުން ވަނީ ދޫކޮށްލާފައެވެ. ހައްޔަރުކުރި މީހުންގެ ތެރޭގައި ދީނީ ޢިލްމުވެރިންވެސް ހިމެނެއެވެ. އަދި އެމީހުންގެ ބަންދަށް މުއްދަތުވެސް ޖަހާފައިވެއެވެ.
ޔޯގާ ހަމަނުޖެހުމާއި ގުޅިގެން، ފުލުހުން ވަނީ ސީރިއަސް މައްސަލައެއްގެ ގޮތުގައި އެކަން ބަލަމުން އަންނަކަމަށް ބުނެފައެވެ.
