އިނގިރޭސިވިލާތުގެ ކުރީގެ ފުޓުބޯޅަ ތަރި ޑޭވިޑް ބެކަމް، އިނގިރޭސީ ރާނީއަށް އެންމެ ފަހުގެ އިހުތިރާމް އަދާ ކުރުމަށް، 12 ގަޑިއިރު ކިއުގައި ހޭދަކޮށްފިއެވެ. ފާއިތުވެދިޔަ ހަފްތާގައި އަވަހާރަވެފައިވާ އިނގިރޭސި ރާނީ ކުއީން އެކިޒަަތުގެ ޖަނާޒާ ރަސްމީކޮށް މިމަހުގެ 19ވަނަ ދުވަހު ބޭއްވުމަށް ހަމަޖެހިފައިވާއިރު، އެކަމަނާގެ ސަންދޯއް މިހާރު ބޭއްވިފައި އޮތީ ލަންޑަނުގެ ވެސްޓްމިންސްޓަރ ހޯލުގައެވެ. އަދި މިހާރުވަނީ، މި ހޯލުގައި ބޭއްވިފައި އޮތް އެކަމަނާގެ ސަންދޯއަށް ޒިޔާރަތްކޮށް އެންމެ ފަހުގެ އިހުތިރާމް އަދާކުރުމުގެ ފުރުސަތު އާންމުކޮށް ހުޅުވާލެވިފައެވެ.
މިގޮތުން މި ފުރުސަތުގެ ބޭނުންކޮށް، އެތައް ހާސް އާންމު ރައްޔިތުންދަނީ އެކަމަނާއަށް އެންމެ ފަހުގެ އިހުތުރާމް އަދާކުރަމުންނެވެ.
މިހާރު އުމުރުން 47 އަހަރުގެ ކުރީގެ ފުޓް ބޯޅަ ތަރި ޑޭވިޑް ބެކަމް އެންމެ ފަހުން މީޑިއާތަޖަށް ފެނިފައިވަނީ ރާނީއަށް އިހުތިރާމް އަދާކުރުމުގެ ގޮތުން، ހުކުރު ދުވަހުގެ މެންދުރު ފަހު ގަޑިން 3:25ގައި ވެސްޓްމިންސްޓަރ ހޯލުގެ ތެރޭގައި ހުއްޓައެވެ. އެއީ އޭގެ 13 ގަޑިއިރު ކުރިން، ވެސްޓްމިންސްޓަރ ހޯލަށް ވަނުމަށް ކިއުގައި އޭނާ ހުއްޓާ، ސީއެންއެންގެ ކުރޫއަށް އޭނާ ފެނުނުތާ 13 ގަޑިއިރު ފަހުންނެވެ.
ސޯޝަމް މީޑިއާގައި އާންމު ވެފައިވާ، އިނގިރޭސި ގައުމީ ޓީމުގެ ކުރީގެ ކެޕްޓަންގެ ވިޑިއޯގައި ފެންނަނީ އޭނާ ރާނީއަށް އިހުތިރާމް އަދާކުރުމުގެ ގޮތުން ބޯ ގުދުކޮށް (ކުރުނީސްކުރަމުން) ކަރުނަ ފޮހެމުންދާ މަންޒަރެވެ.
Emotional David Beckham bows his head to the Queen after queueing close to 12 hours to pay his respects. pic.twitter.com/lMN01BWwRq
— The Royal Family Channel (@RoyalFamilyITNP) September 16, 2022
ރާނީއަށް އެންމެ ފަހުގެ އިހުތިރާމް އަދާކުރުމަށް، ޑޭވިޑް ބެކަމް އާންމުންނާއި އެއް ސަފެއްގައި ކިއުގައި މަޑުކޮށްގެން ހުރިއިރު އޭނާ ކައިރީގަ ތިބި މީހުންނާ ވާހަކަ ދައްކަމުން ދިޔަ މަންޒަރުތައްވެސް މި ވީޑިއޯއިން ފެނިފައި ވެއެވެ.
ބީބީސީން ރިޕޯޓު ކޮށްފައިވާ ގޮތުގައި، ބެކަމްއާއި އޭނާއާއެކު ސަފުގައި މަޑުކޮށްގެން ތިބި މީހުން، ކިއުގައި ހޭދަކުރި ދިގު ވަގުތުގައި، ވަގުތު ހޭދަކޮށް ހަކަތަ ހޯދާފައިވަނީ، ކޮފީއާއި ޑޯނަޓާއި، ޕްރިންގްލްސްއާއި، ސާބަރޓް ލަމްސް ސްވީޓް ކެރުމަށް ބޭނުން ކޮށްގެން ކަމުގައެވެ.
ޑޭވިޑް ބެކަމް އިނގިރޭސި ފުޓުބޯޅައަށް ކޮށްދީފައިވާ ޚިދުމަތްތަކުގެ އަގު ވަޒަންކުރުމުގެ ގޮތުން، 2003 ވަނަ އަަހަރު ރާނީވަނީ އޯޑަރ އޮފް ބްރިޓިޝް އެމްޕަޔަރ (OBE) އެވާރޑް ބެކަމްއަށް އަރުވާފައެވެ.
މިހަފްތާގެ ހުކުރު ދުވަހާއި ހަމައަށް، ރާނީއަށް އިހުތިރާ އަދާކުރުމަށް ބޭނުންވާ މީހުން، ކިއުގައި ތިބި ގަޑިއިރު ވަނީ 24 ގަޑިއިރަށް ދިގުދެމިގެން ގޮސްފައެވެ.
