މާލެ އާއި ހުޅުމާލެ ސަރަހައްދުގައި ބޯހިމެނުމުގެ މުއްދަތު އިތުރުކޮށްފިއެވެ.
ބޯހިމެނުމުގެ މުއްދަތު އިތުރުކޮށްފައިވަނީ މިމަހުގެ 27ގެ ނިއަލަށެވެ. މިކަމާ ގުޅޭގޮތުން މޯލްޑިވްސް ބިއުރޯ އޮފް ސްޓެޓިސްޓިކްސްއިން މިއަދު ނެރުނު ބަޔާނެއްގައިވަނީ މާލެ އާއި ހުޅުމާލެ ސަރަހައްދުގެ ގޭބިސީތަކާއި ވިޔަފާރިތަކާއި ގުޅޭ މަޢުލޫމާތު އެއްކޮށް އަދި ނުނިމޭ ކަމަށެވެ. އެގޮތަށް ދިމާވީ މި ދެ ސަރަހައްދުގައި އެނިއުމަރޭޓަރުންގެ ގޮތުގައި މަސައްކަތްކުރާނެ މީހުން އެކަށީގެންވާ ވަރަށް ނުލިބުމުން ކަމަށް ބުނެފައިވެއެވެ. އެހެންވެ އެ ދެ ސަރަހައްދުގައި ލިސްޓިންގގެ މަސައްކަތް ހޮނިހިރު ދުވަހުވެސް ކުރިއަށްގެންދަން ވަނީ ނިންމާފައެވެ. އަދި ތަފްސީލް މައުލޫމާތު ނެގުމުގެ މުއްދަތު 27 އާ ހަމައަށް އިތުރުވެސް ކޮށްފައިވާކަމަށްވަނީ ހާމަކޮށްފައެވެ.
ބޯހިމެނުމުގެ މަސައްކަތަކީ ޤައުމީ ތަރައްޤީއާއި ސީދާގުޅުންހުރި މުހިއްމު މަސައްކަތެކެވެ. އެހެންކަމުން ގޭބިސީތަކުން މިކަމުގައި އަދިވެސް ބޮޑަށް އެއްބާރުލުން ދެއްވުމަށް މޯލްޑިވްސް ބިއުރޯ އޮފް ސްޓެޓިސްޓިކްސްއިންވަނީ އިލްތިމާސްކޮށްފައެވެ. އަދި މާލެއާއި އަތޮޅުތެރޭގެ ގޭބިސީތަކުން ލިސްޓިންގައި މަޢުލޫމާތު ނުދެވޭ ނަމަ 1423 ހޮޓްލައިނަށް ގުޅައި އެކަން އެނގުމަށްވެސްވަނީ އިލްތިމާސްކޮށްފައެވެ. އަދި ގޭބިސީތަކުން މަޢުލޫމާތު ދިނުމަށް ދީފައިވާ ގަޑިތަކުގައި ގޭގައި މަޑުކޮށްދެއްވުމަށްވެސް އެމްބީއެސްއިން އެދެއެވެ.
ބޯހިމެނުމުގެ މުއްދަތު އެންމެ ފުރަތަމަ ކަނޑައަޅާފައި ވަނީ މި މަހުގެ 13އިން 14 އަށް އަދި 17 އިން ފެށިގެން ގޮސް 25ވަނަ ދުވަހުގެ ނިޔަލަށެވެ. އެގޮތުން 13 އަދި 14 ވަނަ ދުވަހު ކުރިއަށް ގެންގޮސްފައި ވަނީ ގޭބިސީތަކާއި ވިޔަފާރިތަކާއި ގުޅޭ މަޢުލޫމާތު އެއްކުރުމަށް މަސައްކަތެވެ. 17 އިން ފެށިގެން 25 ކުރިއަށްދާނީ ގޭބިސީތަކުގައި ދިރިއުޅޭ މީހުންނާއި ދިރިއުޅުމުގެ ޙާލަތާއި ގުޅޭ މަޢުލޫމާތު ނެގުމުގެ މަސައްކަތެވެ.
