ދިވެހިރާއްޖެއަކި އެއްފަސްގަޑަކަށް ހެދިފައޮތް ގައުމަކަށް ނުވުމުގެ ނަތީޖާއެއްގެ ގޮތުން، ޒަމާނުއްސުރެ ރާއްޖޭގެ ތަރައްގީއަށް ކުރިމަތިވެފައި އޮތް އެންމެ ބޮޑު ހުރަހަކަށް ވެގެން ގޮސްފައިވަނީ ދަތުރުފަތުރު ކުރުމުގެ އެކަށިގެންވާ ނިޒާމެއް އެކުލަވާލެވިފައި ނެތުމެވެ.

ދުނިޔޭގެ އެހެން ގިނަ ގައުމުތަކާއި ޚިލާފަށް، ރާއްޖެއަކީ ކުދި ޖަޒީރާ ގައުމަކަށް ވެގެން ދިއުމުގެ ނަތީޖާއެއްގެ ގޮތުން ކޮންމެ ދެރަށެއްގެ ދެމެދުގައި ކަނޑެއް ނުވަތަ ފަޅެއް އޮތުމުގެ ސަބަބުން އެއް ރަށުން އަނެއް ރަށަށް ދަތުރުކޮށް، ވިޔަފާރިއާއި އިންސާނީ ގުޅުންތައް ދެމެހެއްޓުމުގެ އެންމެ އަސާސީ ވަސީލަތަކަށް ރާއްޖޭގައި ވެގެން ގޮސްފައިވަނީ ކަނޑު ދަތުރުފަތުރު ކުރުމުވެ.

ހަމަ އެއާއެކު، ފާއިތުވެދިޔަ ޒަމާންތަކުގައި މުޅި ރާއްޖޭގެ ތަރައްގީ ހަމައެކަނި މާލެއަށް މަރުކަޒު ކުރެވި، ވަސީލަތްތައްވެސް ލާމަރުކަޒު ނުކުރެވިދިއުމުގެ ނަތީޖާއެއްގެ ގޮތުން، ވެރިރަށް މާލެއަށް ވަސީލަތްތަކާއި މީހުން ޖަމާވެ، ގައުމުގެ އާބާދީ %50 އަށް ދިރިއުޅެން މަޖުބޫރުވެފައިވާ ތަނަކަށް ވެގެން ގޮސްފައިވަނީވެސް ވެރިރަށް މާލެއެވެ.

ނަތީޖާއަކަށް ވެގެން ދިޔައީ، ވަށައިގެން 5 ކިލޯ މީޓަރު ހަމަނުވާ ކުޑަކުޑަ މާލެއަށްވެސް އެއްގަމު ދަތުރުފަތުރުގެ ވަސީލަތުގެ މުހިންމުންކަން އިންތިހާއަށް އިތުރުވެގެން ދިއުމުވެ. އޭގެ އިތުރުން، މާލޭގެ ދެ އަވަށުގެގޮތުގައި ކައިރީގަ އޮތް ހުޅުމާލެއާއި ވިލިމާލެ ހަމަޖައްސާ މި ދެރަށް އާބާދުވެ، މުޅި މާލެ ސަރަަހއްދު ތަރައްގީވެގެން ދިއުމުގެ މުހިންމު ވަސީލަތަކަށް މާލޭ ސަރަހައްދު އެއްގަމާއި ކަނޑު ދަތުރުފަތުރު ވެގެން ދިއުމެވެ.

މިގޮތުން، ދަތުރުފަތުރުގެ އެކަށީގެންވާ ނިޒާމެއް ނެތި، ގައުމުގެ އާބާދީގެ %50 ދިރި އުދުއުޅެމުންދާ މާލޭ ސަރައްހަދަށް ކުރިމަތިވެފައިއޮތް ދަތުރުފަތުރާއި ތަރައްގީގެ ގޮންޖެހުންތަކަށް ހައްލެއް ހޯދާ ދިނުމުގެ ގޮތުން ރައީސް ޔާމިންގެ ދައުރުގައި ބުރިޖަކުން ހުޅުމާލެއާއި މާލެ ގުޅުވާލާފައި ވެއެވެ. އަދި މި ސަރުކާރުން މިހާރު މަސައްކަތް ކުރަމުންދަނީ، ވެރިރަށް މާލެ، ހުޅަނގަށް އޮތް ވިލިމާލޭގެ އިތުރުން ގުޅިފަޅާއި ހަމައަށް ބުރިޖަކުން ގުޅުވާލުމަށެވެ.

މުޅި މާލޭ ސަރަހައްދު ބުރިޖަކުން ގުޅުވާލުމުން މާލޭ ސަރަހައްދަށް ދަތުރުފަތުރުގެ ލުއި ފަސޭހަކަމެއް ލިބިގެން ދިޔަނަމަވެސް، ބައިބޯ، ކާރުބާރޫ ބޮޑު މާލެއޮތީ މިހާތަނަށްވެސް އެތެރޭގެ ދަތުރުތުރުގެ އަގުބޮޑު، ލުއިފަސޭހަ ދަތުރުފަތުރުގެ ވަސީލަތެއް ނެތް ތަނެއްގެ ގޮތުގައެވެ.

އެހެންނަމަވެސް، މި ގޮންޖެހުން ކުޑަކޮށް، ވަކީން ޚާއްސަކޮށް މާލޭ އެތެރޭގެ ދަތުރުފަތުރުގެ ނިޒާމުނެގެ ތެރެއަށް މިނީ ބަހުގެ ޚިދުމަތް ތައާރަފް ކުރި ކުރުން ވެގެން ގޮސްފައިވަނީ ގިނަ ބަޔަކަށް ތަފާތު އިހުސާސްތަކެއް ކުރެވިގެންދިޔަ ބަދަލެއްގެ ގޮތުގައިކަން މިފުރުސަތުގައި ފާހަގަ ކޮށްލާން ޖެހެއެވެ.

މިނީ ބަހުގެ ޚިދުމަތް! މާލެއަށް ވަރަށް އެކަށީގެންވާ ޚިދުމަތެއް!

މާލޭގައި ބަހުގެ ހިދުމަތް 11 އަހަރަށް ފަހު އަނެއްކާވެސް އިއްޔެ އަލުން ދޭން ފަށާފައިވާއިރު، ރާއްޖެ ޓްރާންސްޕޯޓް ލިންކް (އާރްޓީއެލް)ގެ ފަރާތުން މާލޭގެ އާންމު ބަހުގެ ޚިދުމަތަށް ތައާރަފް ކޮށްފައިވަނީ މިނީ ބަހުގެ ޚިދުމަތެވެ.

މި ޚިދުމަތް މާލޭގައި ދޭން ފަށާފައިވަނީ، ސަރުކާރުން އެމްޓީސީސީއާ ހަވާލުކޮށްގެން ކުރިއަށް ގެންދާ ރާއްޖެ ޓްރާންސްޕޯޓް ލިންކް (އާރްޓީއެލް)ގެ ދަށުންނެވެ. ރާއްޖެ ޓްރާންސްޕޯޓް ލިންކްއަކީ ރާއްޖޭގެ އެކި ކަންކޮޅުތަކުގައި ދަތުރުފަތުރުގެ ޚިދުމަތް ފޯރުކޮށްދިނުމުގެ ގޮތުން ސަރުކާރުން ގާއިމް ކޮށްފައިވާ ވިއުގައަކަށް ވާއިރު، މި ވިއުގައިގެ ފަރާތުން މިހާރުވަނީ ކަޑުމަގުންވެސް ސްޕީޑް ފެރީގެ ޚިދުމަތް ފޯރުކޮށްދޭން ފަށާފައެވެ.

އެމްޓީސީސީން ބުނެފައިވަނީ، އެ ކުންފުނީގެ މިނީ ބަހުގެ ޓެސްޓު ދަތުރުތައް ދެ ހަފުތާއަށް މިހާރު މާލޭގައި ކުރިއަށް ގެންދާނެ ކަމަށާއި އެ މުއްދަތުގައި ބަހުގައި ދަތުރުކުރާ މީހުންގެ އަތުން އެއްވެސް ފީއެއް ނުނަގާނެ ކަމަށެވެ.

އަދި ޓެސްޓު ދަތުރުތައް ނިމި، މި ޚިދުމަތް ރަސްމީކޮށް ދޭން ފެށުމާއެކު، ޚިދުމަތުގެ އަގެއްގެ ގޮތުގައި އެމްޓީސީސީން ހަމަޖައްސާފައިވަނީ،  ކޮޅަކަށް ދަތުރަކަށް 7ރ. ނެގުމަށެވެ. އެހެންނަމަވެސް، ތިން އަހަރުން ދަށުގެ ކުދިންނާއި އުމުރުން 65 އަހަރުން މަތީގެ މީހުންނާއި ހާއްސަ އެހީ އަށް ބޭނުންވާ މީހުން އަދި ސްކޫލް ކުދިން ޔުނީފޯމުގައި އަބަދުވެސް ހިލޭ ދަތުރުކުރެވޭ ގޮތަށްވެސް އެމްޓީސީސީން ވަނީ ހަމަޖައްސާފައެވެ.

މިނީ ބަހުގެ ދަތުރު ފެށުމާއި ގުޅިގެން ރައީސުލްޖުމްހޫރިއްޔާ ކުރެއްވި ޓުވީޓެއްގައި ވިދާޅުވީ ރާއްޖެ ޓްރާންސްޕޯޓް ލިންކް (އާރްޓީއެލް) ގެ ދަށުން އިއްޔެ މާލޭގައި ފެށިގެން ދިޔަ މިނީ ބަހުގެ ޚިދުމަތަކީ ދަތުރުފަތުރުގެ ވަށާޖެހޭ ނިޒާމު ފުރިހަމަ ކުރުމަށް ލިބުނު ކުރިއެރުމެއް ކަމުގައެވެ.

ވަށައިޖެހޭ އާންމު ދަތުރުފަތުރުގެ ނިޒާމެއްގެ ތެރެއިން RTL ނެޓްވޯކްގެ މިނީ ބަހުގެ ޚިދުމަތް ފެށިގެން ދިޔުމަކީ، މިނިޒާމު ފުރިހަމަކުރުމުގައި ލިބުނު ކުރިއެރުމެއް. ބައިބޯ މާލޭގައި ދިރިއުޅޭ ރައްޔިތުންނަށް ލިބޭ ތަސައްލީއަކަށް މިޚިދުމަތްވެ އިތުރަށް ތަރައްޤީވެގެންދާނެ.

މި ޚިދުމަތުގެ ޓެސްޓު ދަތުރުތައް ކުރާން ފެށުމާއި ގުޅިގެން ރައީސް ސާލިހު ކުރެއްވި ޓުވީޓުގައި ވިދާޅުވެފައި ވެއެވެ.

އާރުޓީއެލްއިން 18 ބަހުގެ ބޭނުންކޮށްގެން މާލޭގައި ދޭންފަށާ މި ޚިދުމަތް އާންމުވެގެން ދާއިރު، ފަތިހު 5:45 އިން ދަންވަރު 12:15 އަށް ތިން ރޫޓަކަށް މާލޭގައި ބަސް ދަތުރުކުރާއިރު، 40 ބަސް ހުއްޓި ވަނީ ހަދައިފައެވެ. އެ އިން ކޮންމެ ސަރަހައްދަކަށް ވެސް 10 މިނިޓާއި 15 މިނިޓާ ދެމެދު ބަސް ދަތުރުކުރާނެ ކަމަށް އެމްޓީސީސީން ބުންޏެވެ.

އަދި މާލޭގައި ދޭންފެށި މިނީ ބަހުގެ ޚިދުމަތް ގާއިމް ކޮށްފައިވަނީ، ނުކުޅުދޭ މީހުންނަށްވެސް މި ޚިދުމަތް ލިބިގަނެވޭނެ އުސޫލުން، ފުރޮޅުލީ ގޮނޑީގައި އުޅޭ މީހުންނަށްވެސް ފަސޭހައިން އަރައިފޭބޭނެ ގޮތަށް ބަހުގައި ރޭމްޕުވެސް ގާއިމް ކޮށްގެންނެވެ.

މާލޭ ސަރަހައްދުގެ ޓެކްސީތަކުގެ އަގުތައް އުފުލި، އެއްތަނުން އަނެއްތަނަށް ދަތުރު ކުރުމަކީ ރައްޔިތުނަށް އުފުލާން ޖެހިފައިވާ ބޮޑު ތަކުލީފަކަށް އާންމު ދަތުރުފަތު ވެގެން ގޮސްފައިވާތާ އެތައް ޒަމާނެއް ފާއިތުވެގެން ދިޔަފަހުން، މާލޭގައި ސައިޒުން ކުދި "މިނީ ބަސް"ތަކުގައި ކުޑަ އަގެއްގައި އާންމުންނަށް ދަތުރު ކުރެވޭނޭ ގޮތް ވެގެން ދިއުމަކީ ހަގީގަތުގައިވެސް، މި އަސާސި ޚިދުމަތުން މަހުރޫމް ވެފައިވާތާ 11 އަހަރު ފަހުން، ލިބިގެންދިޔަ ބޮޑު ކުރިއެރުމެއްކަމީ ހަގީގަތުގައިވެސް ރަގަޅު ނިޔަތުގައި ބަލައިގަންނާންޖެހޭ ކަމެއް ކަމުގައި ދަންނަވާން ޖެހެއެވެ.

ދަތުރުފަތުރު ވިއުގަ ކާމިޔާބު ވެއްޖެނަމަ، ތަރައްގީއަށް އޮތް ބޮޑު ހުރަސް ނެތިގެން ދާނެ!

ދުނިޔޭގެ ހުރިހާ ކަންކޮޅެއްގައިވެސް، ދަތުރުފަތުރަކީ އިގްތިސާދީ ވަސީލަތްތަކުގެ މައި ނާރެހެވެ. އެއީ އެއްގަމާއި ކަނޑުގައި އަދި ވައިގެ މަގުންނަމަވެސް އެ ހަގީގަތް އޮތް ގޮތެވެ.

މިގޮތުން ޖޯގްރަފީގެ ގޮތުން ރާއްޖެ އުފެދިފައި އޮތްގޮތުން ކުރިމަތިވެފައިވާ މިހުރަސް ނައްތާލުމަށް މި ސަރުކާރުން މިހާރު ގެންގުޅެމުންދާ، ސްޕީޑް ފެރީން ރާއްޖޭގެ ރަށްތައް ގުޅުވާލުމުގެ އިތުރުން، މާލޭގެ ސަރަހައްދުގެ ފުރިހަމަ ޕަބްލިކް ޓްރާންސް ޕޯޓު ވިއުގައެއް ކާމިޔާބު ކަމާއެކު ގާއިމްކުރެވިއްޖެނަމަ، އެބަދަލު ވެގެންދާނީ، ތަރައްގީއާއި ދަތުރުފަތުރުގެ ލުއިފަސޭހަކަމުގެ ގޮތުން ރާއްޖެއަށް އަންނަ އިންގިލާބީ ބަދަލަކަށް ކަމުގައި މެނުވީ ނުވާނެއެވެ.

އަދި މިއީ މިހާތަނަށް، އެކި ސަބަބުތަކާހެދި ފާއިތުވެދިޔަ ސަރުކާރުތަކަށް ހާސިލް ކުރެވިފައި ނުވާ، ބޮޑު ބަދަލެއްކަންވެސް މިފުރުސަތުގައި ފާހަގަ ކޮށްލާން ޖެހެއެވެ.