މިސަރުކާރުގެ ހިލޭ ޑިގްރީ ޕްރޮގްރާމްގައި މިހާރު 15،000 ދަރިވަރުން މަތީ ތައުލީމް ހާސިލްކުރަމުން އަންނަކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. މިސަރުކާރުގެ ހިލޭ ޑިގްރީ ޕްރޮގްރާމް ކާމިޔާބުކަމަށް ސަރުކާރުން ގެންދަނީ ބުނަމުންނެވެ.
ހިލޭ ޑިގްރީ ޕްރޮގްރާމްގެ ދަށުން 15،000 ދަރިވަރުން މިއަދު ހަމަވެފައިވާކަން އިއުލާންކުރައްވާ ރައީސް ޞާލިޙް ކުރެއްވި ޓްވީޓްގައި ވަނީ ސަރުކާރުގެ އަމާޒަކީ ތައުލީމީ ޒުވާން ޖީލެއް ޤައުމު ބިނާކުރުމަށް އުފެއްދުންކަމަށް ވިދާޅުވެފައެވެ.
ސަރުކާރުގެ ހިލޭ ޑިގްރީ ޕްރޮގްރާމަށް މިއަހަރުގެ ފެބުރުއަރީގައި ވަނީ 3 އަހަރުވެފައެވެ.
Very pleased to know that as of today, 15,000 students have enrolled and are now studying under the Government’s Free First Degree Program.
Our aim is to produce a generation of well rounded, highly educated young people who can contribute meaningfully to nation building.
— Ibrahim Mohamed Solih (@ibusolih) August 31, 2022
މިއަހަރުގެ ރިޔާސީ ބަޔާނުގައި ރައީސް ވިދާޅުވީ މި ފުރުޞަތުތައް ފަހިކުރަމުން ގޮސް 2023ގެ ނިޔަލަށް 5000 އަށްވުރެ ގިނަ ކުދިން ހިލޭ ޑިގްރީ ހަދައިގެން، ޤައުމު ބިނާކުރުމަށް ނުކުންނާނެކަމަށެވެ. އަދި އެއަށްފަހު، ކޮންމެ އަހަރަކު މަދުވެގެން 2000 ކުދިން ޑިގްރީ ހަދައިގެން ޤައުމީ ޚިދުމަތަށް ނުކުންނާނެކަން ރައީސް ވިދާޅުވިއެވެ.
ހިލޭ ޑިގްރީއަށް ކިޔެވުމުގެ ފުރުސަތުގެ އިތުރުން، ސަރުކާރުން ދަނީ މަތީ ތައުލީމު ހާސިލުކުރަން ލޯނުވެސް ހަމަޖައްސައިދެއްވަމުނެވެ. ރާއްޖޭގައި ހިލޭ ޑިގްރީއަށް ކިޔަވާދިނުމަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ރިޔާސީ ވަޢުދެކެވެ. ވެރިކަމާއި ހަވާލުވެޑައިގަތުމަށްފަހު މި ސްކީމް ތައާރަފުކުރައްވާ 2019 ވަނަ އަހަރުގެ ފެބްރުއަރީ މަހުގެ 14 ވަނަދުވަހު ވަނީ ހިލޭ ޑިގްރީއަށް ކިޔަވާދޭން ފައްޓާފައެވެ.
