ޕްރޮގްރެސިވް ކޮންގްރެސް ކޯލިޝަންގެ ދާއިރާތަކުގެ އިންތިހާބު ނޮވެމްބަރު މަހަށް ފަސްކޮށްފިއެވެ.
މިއަދު ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕީޕީއެމްގެ އިންތިޚާބުތަކާއި ބެހޭ ކޮމިޓިގެ ޗެއަރ އަދި ގައްދޫ ދާއިރާގެ ކުރީގެ މެންބަރު އަޙްމަދު ރަޝިދު ވިދާޅުވީ އިންތިޚާބަށް ލިބުނު ތަރުހީބު ވަރަށް ބޮޑުކަމަށެވެ. އެހެންކަމުން އިންތިޚާބަށް ވާދަކުރުމުގެ މުއްދަތު އިތުރުކުރީކަމަށެވެ.
ކުރިން އިންތިޚާބު ބާއްވަން ނިންމީ އަންނަ މަހުގެ އަށްވަނަ ދުވަހުއެވެ. އަދި އިންތިޚާބަށް ކުރިމަތިލުމުގެ ފުރުޞަތު މިއަދު ހަމަވާނެއެވެ.
އަޙްމަދު ރަޝީދު ވިދާޅުވީ، އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީނަށް ރިޔާސީ ޓިކެޓް ދިނުމަށް ބޭއްވި ޖަލްސާގައި ބައިވެރިވުމަށް މެންބަރުން މަސައްކަތް ކުރަން ޖެހުމުން، އިންތިހާބަށް ތައްޔާރުވުމަށް އިތުރު ވަގުތު ދިނުމަކީވެސް އިންތިޚަބު ފަސްކުރުމަށް ބައެއް ރަށްރަށުން އެދުނު ސަބަބެއްކަމަށެވެ.
އޭނާ ވިދާޅުވީ، ޕީޕީއެމަށް އަލަށް ވަންނަން ބޭނުންވާ 4،000 ފޯމްވެސް އެޕާޓީއަށް މިހާރު ލިބިފައިވާކަމަށެވެ.
ދާއިރާތަކުގެ އިންތިޚާބަށް އިދިކޮޅު ޕީޕީއެމް ޕީއެންސީން އަންނަނީ ތައްޔާރުވަމުންނެވެ. އެ ކޯލިޝަނުން މިހާރު ވަނީ އަންނަ އަހަރު އޮންނަ ރިޔާސީ އިންތިޚާބުގައި ވާދަކުރާނެ ކެނޑިޑޭޓެއް ކަނޑައަޅާފައެވެ. އެއީ އިދިކޮޅު ލީޑަރު އަދި ކުރީގެ ރައީސް ޔާމީނެވެ.
