ސަރުކާރު ކުރިއަށް ގެންދާ ފްލެޓްތައް ނިމޭނެ ދުވަހެއް އަދި އެތަންތަނަށް ވެދެވޭނެ ދުވަހެއް ދަންނަވަން ނޭގޭ ކަމުގައި މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ދާންދޫ ދާއިރާގެ މެމްބަރު ޔައުގޫބުވަނީ މިސަރުކާރުން ކުރިއަށް ގެންދާ ހައުސިން މަޝްރޫޢުތަށް ނިމި ރައްޔިތުންނަށް އެތަންތަނަށް ވަދެވޭނެ ދުވަހަކާއި ގުޅޭގޮތުން އަސްލަމާއި ސުވާލު ކުރައްވާފައެވެ. މިސުވާލުގެ ޖަވާބުގައި އަސްލަމް ވިދާޅުވީ ހައުސިން ޔުނިޓްތަކާއި، ބޯހިޔާ ވަހިކަމާއި ގުޅުންހުރި މަޝްރޫޢުތަކުގެ ތެރެއިން ބައެއް މަޝްރޫޢުތައް ވަރަށް ބާރަށް ކުރިއަށްދާކަމަށެވެ.
ބައެއް މަޝްރޫޢުތައް ތަންކޮޅެއް ސްލޯކޮށް ދާންކަންވެސް ވަޒީރު ފާހަގަ ކުރެއްވިއެވެ. ހައުސިން ޔުނިޓްތަކަށް މީހުންނަށް ވަދެވޭނެ ސީދާ ތާރީހެއް ދަންނަވަން ދަތިކަމަށްވެސް އަސްލަމް ވިދާޅުވިއެވެ.
ސަރުކާރުން އަޅަމުން ގެންދާ ބޯހިޔާ ވަހިކަމުގެ ފްލެޓްތަކައި ހައުސިން ޔުނިޓްތަކުގެ ތެރެއިން ސީދާ މިވޮނި އަދަދެކޭ އެނިމޭނީ ކުރިއަށް އޮތް އަހަރު ތެރޭގައި އަޅުގަނޑަށް މިތާހުރެ ދަންނަވާކަށް ނޭގޭ. ބާރަށް މަސައްކަތްދާ ބައެއް ތަންތަން އެބަހުރި. ބައެއް ޔުނިޓްތައް ތަންކޮޅެއް ސްލޯކޮށް ހުރި ތަންތަންވެސް އެބަހެރި. އެހެންވީމާ ސީދާ މިހާ އަދަދަށް މީހުންނަށް ވަދެވޭނެއޭ ދަންނަވާކަށެއް އަޅުގަނޑަކަށެއް ނޭގޭ.
– އަސްލަމް ވިދަޅުވިއެވެ.
ބޯހިޔާވަހިކަމަކީ މިސަރުކާރުން އެންމެ ސްލޯކޮށް ކުރިއަށްދާ މަޝްރޫޢުތައް ކަމަށް ގިނަ ބަޔަކު ދެކެއެވެ. މާލެއާއި އަތޮޅު ތެރޭގެ ގިނަ ރަށްތަކުގައި ބޯހިޔާވަހިކަމުގެ ޝަކުވާ އިންތިހާއަށް އޮތް އިރު، މިމައްސަލަ ހައްލު ކުރުމަށް ސަރުކާރަށް އެކަށީގެންވާ މިންވަރާއި ގާތަށްވެސް މަސައްކަތް ނުކުރެވޭކަމަށް ގިނަ ބަޔަކު ދަނީ ބުނަމުންނެވެ.
