ރައްޔިތުން އެދޭ ރަނގަޅު ގޮތް އެނގޭނީ ހަމަ ރައްޔިތުންނަށްކަމަށާއި، އެގޮތް ހޯދޭނީ ފެންނަ ނުފެންނަ ވޯޓަކުންކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރާއްޖޭގެ ސިޔާސީ މަސްރަހުގައި މިހާރު އެންމެ ބޮޑަށް ބަހުސް ކުރެވެނީ ރިޔާސީ ނިޒާމާއި ބަރުލަމާނީ ނިޒާމަށެވެ. ސިޔާސީ ލީޑަރުންގެ ތެރެއިން ބަރުލަމާނީ ނިޒާމަށް ތާއީދުކުރައްވަނީ ރައީސް ނަޝީދު އެކަންޏެވެ. ދެން ތިއްބެވި ލީޑަރުން ތާއީދު ކުރައްވަނީ ރިޔާސީ ނިޒާމަށެވެ.
ރައީސް ނަޝީދު ވިދާޅުވީ އެމްޑީޕީގެ ގިނަ މެންބަރުން އެދޭ ގޮތަކީ ވެރިކަމުގެ ނިޒާމް ބަދަލުކުރުމާއި ގުޅޭގޮތުން އެފަދަ ވޯޓެއް ނެގުންކަމަށެވެ. ރައްޔިތުންގެ ގާތުގައ އެހުމަކީ އެކަކަށްވެސް އިންކަރު ކުރެވޭނެ ކަމެއް ނޫންކަމަށްވެސް ރައީސް ނަޝީދު ވިދާޅުވިއެވެ.
Rayyithun edhey rangalhu goiy engenee hama rayyithunnah. Egoiy hoadheynee fenna nufenna votakun. MDP ge gina memberun edhey gothakee verikamuge nizam badhalukurumai gulhey gothun mifadha vote eh negumah. Rayyithunge gaathugai ehumakee ekakahves inkaaru kureveyne kamehnoon
— Mohamed Nasheed (@MohamedNasheed) August 18, 2022
ރާއްޖެއަށް ބަރުލަމާނީ ނިޒާމެއް ގެނެސް ބޮޑުވަޒީރުކަން ކުރެއްވުމަކީ ރައީސް ނަޝީގެ ދުވަސްވީ ހުވަފެންފުޅެކެވެ. އެމަނިކުފާނު އެކަމަށް ވަކާލާތު ކުރައްވާތާ އަހަރުތަކެއް ވެއްޖެއެވެ.
ރައީސް ނަޝީދު ވަނީ ބަރުލަމާނީ ނިޒާމް ގެނައުމަށް ޤާނޫނު އަސާސީއަށް އިޞްލާހު ގެނައުމާއި ރައްޔިތުންގެ ފެންނަ ނުފެންނަ ވޯޓެއް ނެގުމަށް އެމްޑީޕީ ކޮންގްރެސްއަށް އިޞްލާހު ހުށައަޅާފައެވެ. ނަމަވެސް އެ އިޞްލާހު ނެންގެވުމަށް ރައީސް އިބްރާހީމް މުޙައްމަދު ޞާލިޙް ވަނީ ނަޝީދަށް ގޮވާލައްވާފައެވެ.
ރައީސް ޞާލިޙް ވިދާޅުވީ މިވަގުތަށް ރާއްޖެއަށް މުހިންމީ، ގައުމަށް ދިމާވެފައިވާ މައްސަލަތައް ހައްލު ކުރުން ކަމަށާއި، މިވަގުތަކީ ނިޒާމު ކަނޑައެޅުމަށް މަސައްކަތް ކުރައްވަންވީ ވަގުތު ނޫން ކަމަށެވެ.
ރައީސް ސާލިހު ވިދާޅުވީ އަދި ރާއްޖެއަށް ބަރުލަމާނީ ނިޒާމެއް ގެނައުމަށްވުރެ އަދި އޮތީ މާ ޅަފަތުގައި ކަމަށެވެ. އަދި ނިޒާމާއި ގުޅޭގޮތުން ރައްޔިތުން ކައިރިއަށް ގޮސް މިކަމުގައި ވާހަކަދައްކާ، ރައްޔިތުންނަށް ނިޒާމު އޮޅުންފިލުވައިދީ، މިކަމާއި ގުޅޭގޮތުން ބަހުސް ކުރެވި، ރާއްޖެއަށް ބަރުލަމާނީ ނިޒާމް ގެނައުމަށް އޭގެ ފަހުން މަސައްކަތް ކުރެއްވިދާނެކަމަށް ރައީސް ވިދާޅުވިއެވެ.
ރައީސް ވިދާލުވީ އެމަނިކުފާނަށް ގަބޫލުކުރެއްވެނީ މިހާރު އޮންނަ ގޮތަށް ރައްޔިތުންގެ ސީދާ ވޯޓަކުން، ރައްޔިތުންގެ ފުރިހަމަ އަގުބަލިއްޔަތަކުން ހޮވޭ ރައީސަކާއެކު އެކުލެވޭ ސަރުކާރަކަށް ހިންގުމުގެ ބާރު އޮތުން ކަމަށެވެ. އަދި ދެވަނަ ކަމަކަށް ރައްޔިތުން އިންތިހާބުކުރާ މަންދޫބުންގެ މައްޗަށް އެކުލެވޭ ރައްޔިތުންގެ މަޖިލީހަކުން ގާނޫނު ހެދުމުގެ ބާރު އޮވެފައި މިނިވަންކަމާއެކީގައި ޝަރީއަތްކުރެވޭ ގޮތަށް ޖުޑިޝަރީ އޮތުމާއި، ތިންބާރު ވަކިކުރެވިފައި އޮތް މިފަދަ ނިޒާމެއް އެއީ އެމަނިކުފާނު ގަބޫލުކުރައްވާ ނިޒާމް ކަމަށް ރައީސް ވިދާޅުވިއެވެ.
ކޮމެންޓު ފޮނުވާ