މަޝްހޫރު ދެ ތަރިން ކަމުގައިވާ އާލިއާ ބަޓާއި ރަންބީރު ކަޕޫރުގެ އަލަތު ފިލްްމު ބޮއިކޮޓްކުރުމަށް ގޮވާލައި، ފިލްމާ ދެކޮޅަށް ސޯޝަލް މީޑިއާގައި ކެމްޕެއިންތަކެއް ފަށައިފިއެވެ.
ފަހަކަށް އައިސް ނެރޭ ބޮޑެތި ސްޓާރުންގެ ފިލްްމުތަކާއި ދެކޮޅަށް މިފަދަ ހަރަކާތަތައް ސޯޝަލް މީޑިއާގައި އާންމުވެފައި ވާތީ ތަރިންނާއި ފިލްމުތަކުގެ ޕްރޮޑިއުސަރުން އަންނަނީ ކަންބޮޑުވުން ފާޅު ކުރަމުންނެވެ.
އެންމެ ފަހުން ރިލިޒް ކުރި އާމިރު ޚާންގެ "ލާލް ސިންގް ޗައްޑާ" އާ ދެކޮޅަށްވެސް މިފަދަ ކެމްޕެއިން ތަކެއް ވަނީ ކޮށްފައެވެ. އާމިރު ވަނީ ފިލްމު ބޮއިކޮޓް ނުރުމަށް އެދި ވާހަކަ ވެސް ދައްކާފައެވެ. ނަމަވެސް އެ ފިލްމަށް ލިބިގެން ދިޔައީ ވަރަށް ވެސް ފިނި ތަރުހީބެކެވެ.
"ބްރަމަސްތުރާ" އަކީ ރަންބީރާއި އާލިއާ އެކުގައި ފެނިގެންދާ ފުރަތަމަ ފިލްމެވެ. 5 އަހަރުގެ ދިގު މުއްދަތެއް ހޭދަވެގެން އުފެއްދި މި ފިލްމު ބޮއިކޮޓް ކުރުމަށް ގޮވާތީ ފިލްމުގެ ޕްރޮޑިއުސަރު ކަރަން ޖޯހަރު މިހާރު ހުރީ ވަރަށް ބިރުން ކަމަށްވެސް ރިޕޯޓްތައް ބުނެއެވެ.
އަދި ފިލްމަށް އުންމީދު ކުރި ވަރުގެ ތަރުހީބެއް ނުލިބިދާނެތީ ވެސް އޭނާ މިހާރު ވަރަށް ކަންބޮޑު ވާކަމަށް ޚަބަރުތައް ބުނެއެވެ. އެންމެ ފަހުން ރިލީޒް ކުރި ރަންބީރުގެ ފިލްމް "ޝަމްޝޭރާ"އަކީ ބޮޑު ފްލޮޕެކެވެ.
އަޔާން މުކަރުޖީ ޑައިރެކްޓްކޮށް ނެރެން ތައްޔާރުވެފައިވާ "ބްރަމަސްތުރާ" އަކީ އާލިއާ އާއި ރަންބީރަށް އެތައް ގޮތަކުން ހާއްސަ ފިލްމެކެވެ. އެމީހުން ދިމާވެ ލޯބީީގެ ގޮތުން ގުޅުނީ އެ ފިލްމުގެ ސެޓުންނެވެ. އަދި މިހާރު ކައިވެނިކޮށް އާލިއާ އިނީވެސް އަލަތު ދަރިފުޅަށް ބަލިވެއެވެ.
އާލިއާ އާއި ރަންބީރުގެ ފިލްމުގެ މުހިންމު ރޯލުތަކުން އަމިތާބް ބައްޗަން އާއި މޯނީ ރޯއި އަދި ނާގަ އަރުޖުނާ ވެސް ފެނިގެންދާނެވެ. ފިލްމު ރިލީޒްކުރާ ގޮތަށް އޮތީ އަންނަ މަހުގެ 9 ވަނަ ދުވަހުއެވެ.
