ރާއްޖޭގެ ވެރިކަމުގެ ނިާޒްމ ބަރުލަމާނީ ނިޒާމަކަށް ބަދަލުކޮށް، ބޮޑުވަޒީރު ސަރުކާރު ހިންގައި، ރައީސުލްޖުމްހޫރިއްޔާ ދައުލަތުގެ އެންމެ އިސް ވެރިއެއްގެ ގޮތުގައި ހުންނެވުމަށް ރައީސް ނަޝީދު ބޭނުންފުޅުވާ އިސްލާހު އެމަނިކުފާނު އާންމު ކުރައްވައިފިއެވެ.
ރާއްޖޭގެ ވެރިކަމުގެ ނިޒާމް ބަރުލަމާނީއަށް ބަދަލުކުރުމަށް ރައީސް ނަޝިދު ބޭނުންފުޅުވާ އިޞްލާހު ހުށައަޅަނީ މިމަހު 19ގައި ފެށޭ އެމްޑީޕީ ކޮންގްރެސްއަށެވެ. ރައީސް ނަޝީދު އާންމު ކުރެއްވި އެ އިސްލާހުގައި ވަނީ ރައީސުލްޖުމްހޫރިއްޔާގެ މަޤާމުގައި ހުންނަވާ ބޭފުޅަކަށް ލިބިވަޑައިގަންނަވާނެ ބާރުތައް ތަފްސީލްކޮށްދެއްވާފައެވެ. އެގޮތުން ރައީސްއަށް ލިބިވަޑައިގަންނަވާ ބާރުތަކުގެ ތެރޭގައި މިނިވަން މުއައްސަސާތަކަށް ބޭފުޅުން އައްޔަންކުރެއްވުމާއި، އަސްކަރިއްޔާގެ އެންމެ އިސްވެރިޔާގެ މަޤާމު ރައީސްއަށް ދެއްވުން ހިމެނއެވެ. އެގޮތުން ނަޝީދު ވިދާޅުވީ، ކޮންމެ މިނިވަން މުއައްސަސާއަކަށް ބޭފުޅުން އައްޔަންކޮށް ރުހުން ހޯދުމަށް މަޖިލީހަށް ފޮނުވުމުގެ ބަދަލުގައި ރައީސްއަށް ފެނިވަޑައިގަންނަވާ ބޭފުޅުން އައްޔަންކުރެއްވުމަށް ހިމަނާފައިވާކަމަށެވެ. އަދި ފޮރިން ރާއްޖެިން ބައިނަލްއަޤްވާމީ ފަރާތްތަކާއި ގުޅުން ބަދަހިކޮށް ސަފީރުންނަށް ފަތްކޮޅު އެރުވުމަކީވެސް ރައީސްގެ މަސްއޫލިއްޔަތެއްކަމަށެވެ. އަދި ފޮރިން މިނިސްޓަރަކު އައްޔަންކުރައްވާނީވެސް ރައީސްގެ މަޝްވަރާގެ މަތިންކަމަށް ނަޝީދު ވިދާޅުވިއެވެ.
Party ge Raees, Raees @MohamedNasheed dhevvaa Press Conference kuriah dhanee pic.twitter.com/UXJwCQWZSv
— MDP Secretariat (@MDPSecretariat) August 15, 2022
ޤާނޫނު އަސާސީގައި ބަޔާންކުރާނެ ރައީސްގެ ބާރުތައް:
– ރައީސުލްޖުމްހޫރިއްޔާއަކީ ސިފައިންގެ އެންމެ މަތީވެރިޔާ
– ހަނގުރާމަ ނުވަތަ ސުލްހަ އިއުލާންކުރުން
– ކުއްލި ނުރައްކަލުގެ ހާލަތު އިއުލާންކުރުން
– ސަފީރުން އައްޔަންކުރުން
– ސަފީރުންގެ ފަތްކޮޅު ބަލައިގަތުން
– ކޮމިޝަންތަކާއި މަގާމްތަކަށް މީހުން އައްޔަންކުރަން މަޖިލީހަށް ފޮނުވުން
– ތަހުގީގީ ކޮމިޝަންތައް އުފެއްދުން
– ގައުމީ މުހިއްމު މައްސަލަތަކުގައި ރައްޔިތުންގެ ވޯޓު ނެގުން
– ގައުމީ ބަންދު ދުވަސްތަކާއި ސަރުކާރު ބަންދު ދުވަސްތައް ކަނޑައެޅުން
– އިނާމާއި ޝަރަފާއި ލަގަބާއި މެޑަލް ދިނުން
– ޖިނާއީ ކުށްތަކުގައި ހުކުމްކޮށްފައިވާ ފަރާތްތަކަށް މާފްކޮށްދިނުމާއި އަދަބު ލުއިކޮށްދިނުން
– ގާނޫނުއަސާސީގައި ބަޔާންކޮށްފައިވާ ގޮތުގެ މަތިން ދައުލަތް ހިންގުމަށް ނުކުޅެދޭ ފަދަ ކަމެއް މެދުވެރިވުން ފަދަ ގާނޫނުއަސާސީގައި ކަނޑައަޅައި ބަޔާންކުރާ ހާލަތްތަކުގައި ރައްޔިތުންގެ މަޖިލިސް އުވާލުން.
މިއަދު ބޭއްވި ޕްރެސްކޮންފަރެންސްގައި ރައީސް ނަޝީދު ވިދާޅުވީ، ބޮޑުވަޒީރު ހިންގާ ގޮތަށް ސަރުކާރު އެކުލަވާލާނީ ރައްޔިތުންގެ މަޖިލީހުގެ ދެބައިކުޅަ އެއްބަޔަށް ވުރެން ގިނަ ގޮނޑި ކާމިޔާބުކުރާ ޕާޓީއަކުންކަމަށެވެ. އެއްވެސް ޕާޓީއަކަށް އެ އަދަދަށް ގޮނޑި ނުލިބިއްޖެ ނަމަ މަޖިލީހުގެ ގޮނޑި ކާމިޔާބުކުރި އިތުރު ޕާޓީއަކާ ނުވަތަ ޕާޓީތަކަކާ ގުޅިގެން ސަރުކާރު އެކުލަވާލުމުގެ ފުރުސަތު އޮންނަ ގޮތަށް ގާނޫނުއަސާސީއަށް އިސްލާހު ގެނައުން ހިމެނޭކަމަށްވެސް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ބަރުލަމާނީ ނިޒާމެއް ގެނައުމަށް އެމްޑީޕީ ކޮންގެސްއިން ތާއީދުކުރައްވާނެކަމަށް ވަރަށް ބޮޑު އުއްމީދެއް އެބައޮތްކަމަށެވެ. އަދި އެމްޑީޕީގެ ޗެއަރޕާސަން ފައްޔާޟް އިސްމާޢީލްވެސް އެކަމަށް ތައީދުކޮށްދެއްވުމަށް ނަޝީދު އެދިވަޑައިގަތެވެ.
Party ge Raees, Raees @MohamedNasheed dhevvaa Press Conference kuriah dhanee pic.twitter.com/WPR9je1A99
— MDP Secretariat (@MDPSecretariat) August 15, 2022
ބަރުލަމާނީ ނިޒާމުގައި ސަރުކާރު އެކުލަވާލަން ހުށައަޅުއްވާގޮތް:
– ބޮޑުވަޒީރު ކަމަށް އައްޔަންކުރާނީ ރައްޔިތުންގެ މަޖިލީހުގެ އެންމެ ގިނަ ގޮނޑި ކާމިޔާބުކުރި ޕާޓީއަކުން ކަނޑައަޅާ ބޭފުޅެއް ކަމަށް ގާނޫނުއަސާސީގައި ބަޔާންކުރުން.
– ވަޒީރުންގެ މަޖިލިސް އެކުލާވަލާނީ ރައްޔިތުންގެ މަޖިލީހަށް އިންތިހާބުކުރެވޭ ނުވަތަ އައްޔަންކުރެވޭ މެމްބަރުންގެ ތެރެއިންކަން ގާނޫނުއަސާސީގައި ބަޔާންކުރުން.
– ސަރުކާރު އެކުލަވާލައި އިއުލާންކުރުމަށް ކަނޑައަޅާ މުއްދަތު ގާނޫނުއަސާސީގައި ބަޔާންކުރުން.
– ސަރުކާރު އެކުލަވާލައި އިއުލާންކުރުމަށް ކަނޑައަޅާ މުއްދަތުގެ ތެރޭގައި ސަރުކާރު އެކުލަވާ ނުލެވިއްޖެ މަޖިލިސް އުވާލިކަން ރައީސުލްޖުމްހޫރިއްޔާ އިއުލާންކުރަންވާނޭ ކަމާއި އާ އިންތިހާބަކަށް ދާން ޖެހޭނޭކަން ގާނޫނުއަސާސީގައި ބަޔާންކުރުން.
ނަޝީދު ވިދާޅުވީ ބަރުލަމާނީ ނިޒާމު ގެނައުމަށް ފެންނަ ނުފެންނަ ވޯޓެއް މިއަހަރުގެ ތެރޭގައި ނަގައި، އަންނަ ފެބުރުއަރީ މަހު އިންތިޤާލީ ބަރުލަމާނީ ނިޒާމުގެ ސަރުކާރެއް އެކުލަވާލެވޭނެކަމަށެވެ. އަދި 2023ގެ އިންތިޚާބަށްފަހު ދާއިމީކޮށް ބަރުލަމާނީ ނިޒާމަށް އަމަލުކުރަން ފެށޭނެކަމަށްވެސް ނަޝީދު ވިދާޅުވިއެވެ.
ނަޝީދު ވިދާޅުވިގޮތުގައިބަރުލަމާނީ ނިޒާމަކަށް ރާއްޖޭގެ ހުރިހާ ސިޔާސީ ލީޑަރުންވެސް ތާޢިދުކުރައްވައެވެ.
މީގެ ކުރިން ރައީސް އިބްރާހީމް މުޙައްމަދު ޞާލިޙް ވަނީ ރާއްޖޭގައި ވެރިކަމުގެ ނިޒާމް ނިންމާފައިވަނީ ރައްޔިތުންގެ ވޯޓަކުންކަމަށާއި، އެކަން ބަދަލުކުރެވޭނީވެސް ރައްޔިތުންގެ ވޯޓަކުންކަމަށެވެ.
