ބޮލީވުޑްގެ މަޝްހޫރު އެކްޓަރު ރަންވީރު ސިންގް ފުލުހަށް ހާޒިރު ކުރުމަށް އޭނާއަށް ޗިޓު ފޮނުފައިވާކަމަށް މީޑިއާ ރިޕޯޓްތައް ބުނެފިއެވެ.
އޭނާ ފުލުހަށް ހާޒިރު ކުރަނީ މަޖައްލާއެއްގައި ޖެހުމަށް ބަރަހަނާ ފޮޓޯ ޝޫޓެއް ނެގި މައްސަލައިގައެވެ. މުމްބާއިގެ ޗެމްބޫރްގެ ޕޮލިސް ސްޓޭޝަނަށް އަމިއްލަ ޖަމިއްޔާ އަކުން މި މައްސަލަ ހުށައަޅަމުން ބުނެފައިވަނީ އެއީ އަންހެނުންގެ ޖަޒުބާތުކަށް ފުރައްސާރަކުރުމުގެ ގޮތުން ހިންގާފައިވާ ދަށު ދަރަޖައިގެ އަމަލެއް ކަމަށެވެ. އަދި ރަންވީރުގެ މި އަމަލުގެ ސަބަބުން އޭނާއާ މެދު ފިޔަވަޅު އަޅަށް ޖެހޭކަމަށް ވެސް އެ ޖަމިއްޔާއިން ވަނީ ބުނެފައެވެ.
މިމައްސަލަ ހޫނުވެ، ސޯޝަލް މީޑިއާގައިވެސް މިކަމާއި ދެކޮޅަށް ގިނަ ބަޔަކު ވަނީ އަޑު އުފުލައިފައެވެ. އެހެންވެ އެ މައްސަލަ ބަލަން ފުލުހުންނަށް މަޖުބޫރުވެ، މިމަހުގެ 22 ވަނަ ދުވަހު ރަންވީރް ފުލުހަށް ހާޒިރުވާން ވެސް މިހާރު ވަނީ އަންގާފައެވެ.
ކާމިޔާބު ގިނަ ފިލްމުތަކެއް ކުޅެފައިވާ ރަންވީރު ނެގި ބައެއް ފޮޓޯތަށް ވަނީ އޭނާގެ ސޯޝަލް މީޑިއާ އެކައުންޓުގައިވެސް ހިއްސާކޮށްފައެވެ. ބަރަހަނާކޮން ނެގި މި ފޮޓޯ ތަކާއި ދެކޮޅަށް އެއްބަޔަކު އަޑު އުފުލާއިރުގައި ރަންވީރާއި އެއްކޮޅަށްވެސް ގިނަ ބަޔަކު ދަނީ އަޑު އުފުލަމުންނެވެ.
މީގެ އިތުރުން މުނިފޫހިފިލުވުމުގެ ދާއިރާގެ ބައެއް މީހުންވަނި ހުސްގަޔާ މިގޮތަށް ފޮޓޯނަގައި ސޯޝަލް މީޑިއާގައި ފޮޓޯ ހިއްސާކޮށް އެކަން ޓްރެންޑަކަށް ހެދުމަށް ގޮވާލައިފައެވެ.
ރަންވީރުގެ އަންހެނުން، މަޝްހޫރު ބަތަލާ ދީޕިކާ ޕަޑުކޯން އާއި ބޮލިވުޑްގެ ތަރިންވެސް ތިބީ ރަންވީރާ އެއްކޮޅުގައެވެ. އެމީހުން ވަނީ 37 އަހަރުގެ އެކްޓަރުގެ ކެރުމަށް ސާބަހާއި ހިތްވަރު ދީފައެވެ.
