ޖެހިލުމެއްނެތި ކުށްތަކަށް އަރައިގަތުން ހުއްޓުވުމަށް އިސްލާމީ ޝަރީއަތް ޤާއިމް ކުރަން ޖެހޭ ކަމުގައި ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
އުމަރު މިހެން ވިދާޅުވީ މާލެ ގެއެއްގެ ތެރޭގައި އަނިޔާވެރި ގޮތަކަށް މަރާލާފައި އޮއްވާ ފެނުނު އަންހެން މީހާގެ މަރުގެ މައްސަލާގައި ކަންބޮޑުުވުން ފާޅުކޮށް ކުރެއްވި ޓުވީޓެއްގައެވެ. ބޮލާއި، ހަތަރެސްފައި ބުރިކޮށް، ހިންގި މި ނުބައި އަމަލާއި ގުޅިގެން ގިނަ ބަަޔަކު ދަނީ މަރަށް މަރު ހިފުމަށް ގޮވާލަމުންނެވެ.
އުމަރު ވިދާޅުވީ މިފަދަ ބޮޑެތި ކުށްތަކަށް އެއްވެސް ޖެހިލުމެއްނެތި އަރައި ގަންނަމުންދާއިރު، އިސްލާމީ ޝަރީއަތް ތަންފީޒު ކުރަންޖެހޭކަމަށެވެ. އޭނާ ވިދާޅުވީ ބޮޑެތި މައްސަލަތައް ޙައްލު ކުރުމަށް އިސްލާމީ ޝަރީއަތުގައި ހިފަންކެރޭ ވެރިކަމެއް އިރާދަ ކުރެއްވިއްޔާ ދިވެހިން އަދި ދެކޭނެ ކަމަށާއި، އެ ދުވަހަކުން މީހުން މެރުމާ، ޑްރަގާ، ވައްކަމާ، ފޭރުމާ، ރޭޕް ފަދަ ކުށްތައް މުޅީންހެން ހުއްޓިގެންދާނެ. އަމާން، އުފާވެރި ޤައުމެއް ދެކޭނެ ކަމަށެވެ.
އިސްލާމީ ޝަރީއަތް ޤާއިމް ކުރަން ޖެހެނީ މި ސަބަބަށްޓަކައި. ޖެހިލުމެއްނެތި ކުށްތަކަށް އަރައިގަތުން ހުއްޓުވުމަށް ޓަކައި. ބޮޑެތި މައްސަލަތައް ޙައްލު ކުރުމަށް އިސްލާމީ ޝަރީއަތުގައި ހިފަންކެރޭ ވެރިކަމެއް އިރާދަ ކުރެއްވިއްޔާ ދިވެހިން އަދި ދެކޭނެ. އެ ދުވަހަކުން މީހުން މެރުމާ، ޑްރަގާ، ވައްކަމާ، ފޭރުމާ، ރޭޕް ފަދަ ކުށްތައް މުޅީންހެން ހުއްޓިގެންދާނެ. އަމާން، އުފާވެރި ޤައުމެއް ދެކޭނެ.
– އުމަރު ވިދާޅުވިއެވެ.
އުމަރަކީ އަބަދުވެސް އިސްލާމީ ޝަރީއަތް ގާއިމް ކުރުމަށް ވަކާލާތު ކުރަމުންދާ ބޭފުޅެކެވެ. ކުރިއަށް އޮތް ރިޔާސީ އިންތިޚާބުގައި ވާދަކުރައްވާނެކަމަށް އިއުލާން ކުރައްވާފައިވާ އުމަރުގެ ވައުދުތަކިގެ ތެރޭގައި ކުށްތަކަށް އަރައި ގަންނަ ފަރާތްތަކަށް އިސްލާމީ ޝަރީއަތް ގާއިމް ކުރާނެކަމަށް ދަނީ ވިދާޅުވަމުންނެވެ.
ރޭ ހިނގައިދިޔަ މަރުގެ ހާދިސާއާއި ގުޅިގެން ގިނަ ބަޔަކު ދަނީ ސޯޝަލް މީޑިއާގައި މަރަށް މަރު ހިފުމަށް ގޮވާލަމުންނެވެ. އަދި ރާއްޖޭގައި މިހާރު ހިންގަމުންދާ ކުށްތަކަށް ބަލާއިރު، މަރަށްމަރު ނުހިފާނަމަ މިފަދަ ކުށްތައް އިތުރުވެގެން ދިއުމަކީ އެކަށީގެންވާ ކަމެއްކަމަށް ގިނަ ބަޔަކު ދަނީ ބުނަމުންނެވެ.
