މި ސީޒަނުގެ އިނގިރޭސި ޕްރިމިއާ ލީގުގައި ލިވަޕޫލުން ކުޅުނު ފުރަތަމަ މެޗުގައި އަލަށް ޕްރޮމޯޓުވި ފުލަމާ ވާދަކޮށް އެއްވަރުވެއްޖެއެވެ.
ރަށުން ބޭރުގައި ފުލަމް އާއި ބައްދަލުކުރިމެޗް ނިމުނީ 2-2 ގެ ނަތީޖާއަކުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ލިވަޕޫލުންނެވެ. ނަމަވެސް މިމެޗްގައި އަލަށް ޕްރިމިއާ ލީގުން ޕްރޮމޯޝަން ހޯދި ފުލަމް ވަނީ ގިނަ ބަޔަކު ހީކުރި ގޮތާއި ހިލާފަށް ލިވަޕޫލް ސިއްސުވާލާ އެޓީމް ހާސްކަމުގެ ތެރެއަށް ވައްޓާލާފައެވެ.
އެގޮތުން މިމެޗްގެ ފުރަތަމަ ލަނޑު މެޗްގެ 32 ވަނަ މިނެޓްގައި ޖަހާ ލީޑު ނެގީވެސް ފުލަމްއިންނެވެ. މިލަނޑު އެޓީމަށް ޖަހާދިނީ އެލެކްސެންޑަރ މިޓްރޮވިޗްއެވެ. މިމެޗްގައި ލިވަޕޫލުން އެއްވަރު ކުރި ލަނޑު މެޗްގެ 64 ވަނަ މިނެޓްގައި ޖަހާ ދިނީ ބަދަލު ކުޅުންތެރޮޔާ ޑަރވިން ނޫނޭޒްއެެވެ. ނަމަވެސް މިލަނޑު ޖެހިތާ އަށް މިނެޓްފަހުން ފުލަމްއިންވަނީ ދެވަނަ ފަހަރަށް މިމެޗްގައި ލީޑު ނަގާފައެވެ. މިލަނޑު ލިބުނު ޕެނަލްޓީއަކުން ކާމިޔާބުކޮށްދިނީ ފުރަތަމަ ލަނޑުވެސް ޖަހާދިން މިޓްރޮވިޗްއެވެ.
މިމެޗްގައި ލިވަޕޫލުން ދެވަނަ ފަހަރަށް އެއްވަރު ކުރީ މެޗްގެ 80 ވަނަ މިނެޓްގައި މުހަންމަދު ސަލާހް ޖަހާދިން ލަނޑުންނެވެ. މިމެޗް ނިމެން ގާތް ވެފައިވަނިކޮށް ލިވަޕޫލްގެ ކެޕްޓަން ޖޯޑަން ހެންޑަރސަން ފޮނުވާލި ހަމަލާއެއްވަނީ ފުލަމްގެ ގޯލްގެ ހުރަސް ދަނޑިއަށްވެސް އަމާޒުވެފައެވެ.
މިމެޗް އެއްވަރު ވެގެން ނިމުމުމަށްވުރެ ލިވަޕޫލްގެ ކޯޗް ޔަރގަން ކްލޮޕްއަށް އޮތް އެންމެ ބޮޑު ބޮލުގަ ރިހުމަކަށް ވެގެންދާނީ އެޓީމަށް ދިމާވެފައިވާ އަނިޔާގެ މައްސަލަ ތަކެކެވެ. މިމެޗްގައި އަނިޔާ އާއި ބަލިވެގެން ކާޓިސް ޖޯންސް، ޑިއޮގޯ ޖޮޓާ، ކޮންސްޓަންޓީނޯސް ސިމިކާސް، ނެބީ ކެއިޓާ، އެލެކްސް އޮކްލެއިޑް ޗެމްބަރލެއިން އަދި އިބްރާހިމާ ކޮނާޓޭ ޓީމްގައި ހިމެނިފައެއް ނެތެވެ. އަދި މެޗްގެ ތެރެއިން ތިއާގޯ އަލްކަންޓާރާއަށް އަނިޔާވުމުން މިމައްސަލަ އިތުރުވެގެންދިޔައެވެ.
