މިމަހުގެ 1 ވަނަ ދުވަހު، ހިތްހުއްޓިގެން ނިޔާވި ޅ. ނައިފަރު އިހުސާން އަލީ، 48، ނިޔާވެފައިވަނީ ނައިފަރު ހޮސްޕިޓަލުގެ އިހުމާލުން ކަމުގައި އާއިލާގެ ފަރާތުން ބުނެފިއެވެ.
އިހުސާން މިމަހު 1 ވަނަ ދުވަހު ނިޔާވެފައިވަނީ، ޗުއްޓީ ނިންމާ އޭނާ މަސައްކަތް ކުރަމުންދިޔަ ރިސޯޓަށް އެނބުރި ދިއުމަށްޓަކާ ނައިފަރު ބަދަރު ސަރަހައްދުގައި ހުއްޓައެވެ. އިހުސާނަށް ހާޓް އެޓޭކް ޖެހިފައިވަނީ އެދުވަހުގެ ހެނދުނުގެ 6:10 ހާއިރުއެވެ. އަދި އޭނާއަށް ހާރޓް އެޓޭކެއް ޖެހުމާއެކު އޭނާ ހޮސްޕިޓަލަށް ގެންދިއުމަށްޓަކާ އާންމުންގެ މީހަކު ވަގުތުން އެމްބިއުލާންސަށް ގުޅާފައިވެއެވެ. އެހެންނަމަވެސް އެވަގުތު އެމްބިއުލާންސް ދުއްވާ މީހާ ފޯނު ނުނެގުމާއި ގުޅިގެން އިހުސާން ހޮސްޕިޓަލަށް ގެންގޮސްފައިވަނީ، މުދާ އަރުވައިގެން ބަނދަރު ސަރަހައްދުން އެވަގުތު ދަތުރު ކޮށްފައިއައި ރަށު ޕިކަޕެއްގައި ހުރި މުދާތައް ބޭލުމަށްފަހު ރަށު ޕިކަޕުގައެވެ.
މައުލޫމާތު ލިބިގައިވާ ގޮތުގައި، އިހުސާން ހޮސްޕިޓަލަށް ގެންދިއުމަށްފަހު، އޭނާ ހޮސްޕިޓަލަށް ވެއްދުމަށް އެވަގުތު ހޮސްޕިޓަލުގައި ހުރި ސްޓެޗަރވެސް ލިބިފައެއް ނުވެއެވެ. އެއަށް މުދާ އަރުވާފައި ހުރުމުގެ ސަބަބުން ހޮސްޕިޓަލުގައި ހުރި ސްޓެރެޗަރ ބޭނުން ނުކުރެވޭ ހާލަތުގައި ހުރުމާއެކު އިހުސާން ހޮސްޕިޓަލަށް ވައްދާފައިވަނީ، ރަށު ޕިކަލް ދުއްވަން ތިބި ދެމީހުންނާއި އާއިލާގެ މީހެއްގެ އިތުރުން ބަންގލާދޭޝްގެ މީހެއްގެ އެހީގައި، އެ ހޮސްޕިޓަލުގެ އެމަޖެންސީ ރޫމުގައި ހުރި އެދެއް އުފުލާލައިގެން އައިސް އެނދަށް އަރުވައިގެންނެވެ.
އާއިލާގެ ފަރާތުން ތުހުމަތު ކުރާ ގޮތުގައި، އިހުސާން ރަށު ޕިކަޕުން ހޮސްޕިޓަލަށް ވެއްދުމަށްވެސް ގިނައިރުތަކެއް ހޭދަވެގެން ދިޔައިރު، މި ވަގުތުތަކުގައި ހޮސްޕިޓަލުގެ ފަރާތުން އޭނާއަށް ބޭނުންވާ ސިއްޙީ ފަރުވާ ފޯރުކޮށްދީފައި ނުވެއެވެ.
އަދި މީގެ އިތުރުން ހޮސްޕިޓަލުން، ނިޔާވި އިހުސާނަށް ސީޕީއާރު ދިނުމުގައިވެސް ފަރުވާ ކުޑަކޮށްފައިވާކަމަށް ތުހުމަތުކޮށް، އާއިލާއިން މިހާރުވަނީ މިމައްސަލަށް މެޑިކަލް އެންޑް ޑެންޓަލް ކައުންސިލަށް ލިޔުމުންނާއި އަނގަބަހުންވެސް ހުށަހަޅާފައެވެ.
ބައެއް ނޫސްތަކުން ރިޕޯޓު ކޮށްފައިވާ ގޮތުގައި، މިމައްސަލަ އިހުސާންގެ އާއިލާއިން ހޮސްޕިޓަލަށް މައްސަލަ ހުށަހަޅާފައި ނުވާކަމަށް ނައިފަރު ހޮސްޕިޓަލްގެ މެނޭޖަރު ޖައުފަރު އަބްދުﷲ ވިދާޅުވެއެވެ. އެހެންނަމަވެސް މީޑިއާތަކުގެ ވަސީލަތްތަކުން މިމައްސަލަ ހޮސްޕިޓަލުގެ ސަމާލުކަމަށް އައިސް އެ ހޮސްޕިޓަލުން މިމައްސަލަ މިހާރުވަނީ ބަލަން ފަށާފައެވެ.
ރާއްޖޭގެ ބައެއް ހޮސްޕިޓަލުތަކުގެ އިހުމާލުން ހިތާމަވެރި މިފަ ހާދިސާތައް ހިނގާފައިވާކަމުގެ ޝަކުވާތައް މީގެކުރިންވެސް އާއިލާތަކުން ކޮށްފައި ވެއެވެ. އެހެންނަމަވަސް މިފަދަ އެއްވެސް މައްސަލައަކާއި ގުޅޭގޮތުން ހެލްތު މިނިސްޓްރީ މިހާތަނަށް އިހުމާލުވާ ފަރާތްތަކާއި ދެކޮޅަށް އެކަށިގެންވާ ފިޔަވަޅުތަކެއް އަޅާފައި ނުވާކަން ފާހަގަ ކޮށްލެވެއެވެ.
