މުސްތަފާބޭއެވެ. ހާދަހާވާ އަޑުފައްގަނޑު ގަދަ ދުސްކޮޅެކެވެ. މީސްމީޑިއާވެސް ހީވަނީ ކުޑަވެއްޖެހެންނެވެ. ވީޑިއޯތަކާ އޯޑިއޯތަކާ ފޮޓޯތަކުން ލޯ ހުޅުވާލާކަށް ނުކުރެއެވެ.

މުސްތަފާބޭއެވެ. މި ރާއްޖެއަކީ މުސްތަފާބޭމެން ތިޔަ ކިޔާކަހަލަ، ޖަޒީރާ ގައުމެކެވެ. މި ރާއްޖެއަކީ އެތަކެއް ސަތޭކަ ރަށްތަކާ، ފަޅުތަކާއި، ހާ ތަކާއި ގިރިތަކުގެ މައްޗަށް އެކުލެވޭ ގައުމެކެވެ. މި ބިންތިރި ރާއްޖެއަކީ، މޫދުގެ މުއްސަނދިކަން ލިބިފައިވާ، ރާއްޖެއެކެވެ. ކަހަނބުތަކާއި މަސްތައް ރީތި ގިރިތަކުގެ ވަށައިގެން އުޅޭއިރު، ކުލަކުލައިގެ މުރަކަތަކާއި ގިރިތަކުގެ މަތިން އުދުހޭ ދޫނިތަކުގެ ނަލަކަން މި ރާއްޖެއަށް ލިބިފައިވެއެވެ.

އެހެންކަމުން، މި ރާއްޖެއަކީ މުސްތަފާބޭމެން ތިޔަ ކޮޕީކުރާ ދޮންމީހުންނާ، އެފްރިކާގެ ކަޅު މީހުންނަށްވެސް މާ ކަމުދާ ތަނެކެވެ. މި ރާއްޖޭގެ ރީތިކަމުން އެވެރިންވެސް އާޝޯޚުވެ، ރާއްޖެއަކީ ދުނިޔެމަތީގެ ސުވަރުގެއެކޭ އެވެރިން ކިޔަނީ އެހެންވެއެވެ. ރަށަކަށް އަރައިފިނަމަ ރީތި ދޮންވެލި ތުނޑިތަކެވެ. މޫދުގައި ފިނާލައިފިނަމަ, ރީތި ވީހާ މަސްތަކާއި, މުރަނކަތަކާއި ގިރިތަކެވެ. މި ހުރިހާކަމެއް ފުރިހަމަވެ، ވަށައި ޖެހިގެންދަނީ ދިވެހިންގެ ހިންހެޔޮކަމާއި، ރިވެތި އަޚްލާގާއި, އެކުވެރިކަމުގެވެސް ސަބަބުންނެވެ.

މުސްތަފާބޭއެވެ. މުސްތަފާބޭމެން އިސްވެތިބެ، ރާއްޖެއަށް ޑިމޮކްރަސީ ގެނައުމުގެ ނަމުގައި، މުޅި ރާއްޖޭގެ އިޖްތިމާޢީ ފޭރާން ވީދައި ކުދިކުދި ކޮށްފީމުތާއެވެ. ދައުލަތުގެ ވެރިންގެ ފަހަތުން ވަނަމުން ގޮވަމުން ދުވެ، އެ މީހުންގެ އަބުރާ ޢިއްޒަތް ރައްޔިތުންގެ ކުރިމަތީގައި ވައްޓާލީމުތާއެވެ. ކާޓޫނު ކުރަހައި، ލަވަ ހަދައި، ތަފާތު ފޯރަމްތަކުގައި މުސްތަފާބޭމެން އަނެއްކުންނަށް ހެއްދެވި ނެހެއްދެވިއަށް ގޮވަމުން އައީ, އެފަދަ ދުވަހެއް މުސްތަފާބޭމެންނާ ބައްދަލު ނުކުރާނޭކަމަށް ބަލައިގެން ނޫންހެއްޔެވެ. ނުވަތަ ވެރިކަމުގެ ދަހިވެތިކަމުގައި ކޮންމެ ގޮތެއްވެސް ހެޔޮކަމަށް ބަލައިގެންނެވެ.

މުސްތަފާބޭއެވެ. ކިތައްމެ އެއްބަސްނުވިއަސް، މުސްތަފާބޭމެން ގައުމު ހަލާކުކުރުމަށް ގެންގުޅުނު އިސްލާހީ ޙަރަކާތަށް އެހީވީ މީހުންނަކީ، ކޮންމެވެސް މަގުސަދެއްގައި އެހީވީ މީހުންނެވެ. އަހަރުމެންގެ ކާފަމެން ބުނަނީ އެދުމެއްނެތި ވެދުމެއް ނުކުރާނެކަމަށެވެ. އެކަމަށް ބާރުލިބޭކަމަކީ، ކަމެއްވާއިރަށް، މުސްތަފާބޭމެން އެކަރަޔަކަށް ހިޖުރަކޮށް، އެވެރިންގެ އެހީތެރިކަމުގައި މާ އުފަލެއްގައި އުޅޭތަން ފެންނާތީއެވެ.

މުސްތަފާބޭއެވެ. ދިވެހިން ދެކެމުން މިދާ ހެޔޮވެރިކަމަކަށް މިހާރު 4 އަހަރުވަނީ ނޫންހެއްޔެވެ. މުސްތަފާބޭމެން ވައުދުވީ ކަންތައްތަކުގެ ތެރެއިން ކުރެވުނީ ކޮންކަމެއްހެއްޔެވެ. މާދަމާ ހެނދުނު ސައިބޮއިގެން، މަޑު ހިތަކާއެކު، ވެރިކަމަށް އައުމަށް ވީ ވައުދުތަކުގެ ތެރެއިން، ފުރިހަމަވީ ކަންތައްތަކުގައި ފާހަގަ ޖަހާލާށެވެ. 3 ކަމެއްވެސް ފުރިހަމަ ވެފައިވެއްޖެނަމަ، ދެމީހުންގެ ރޭގަނޑު ކެއުން އެއްކަލަ މަޝްހޫރު މަސްބުރި ކަޑައިގައި ބާއްވާ، މިކަން ފާހަގަ ކުރާނަމެވެ. ކަންކަން ފާހަގަ ކުރުމަށް ހަވާ އެރުވުމަކީ އަހަރުމެންގެ ފެންވަރެއް ނޫނެވެ. އަހަރުމެންގެ ފެންވަރަކީ މަސްބުރި ކަޑައެވެ. އަހަރުމެން އުޅޭންވާނީ އެކަން ދަނެގެންތާއެވެ.

މުސްތަފާބޭއެވެ. މުސްތަފާބޭމެންގެ ހިތުގައި އިސްލާމްދީނާ ދުރު ޚިޔާލުތައް ހުންނަވާހަކަ މީހުން ދައްކަނީ ސަބަބެއް ނެތިއެއް ނޫނެވެ. މި ސައްތައިން ސައްތަ މުސްލިމު ގައުމުގައި މުސްތަފާބޭމެން ތަޢާރަފްކުރަން ތިޔަ އުޅޭ ކަންތައްތަކަކީ، އެއްވެސް ގޮތެއްގައި އިސްލާމްދީން ހުއްދަ ކުރާ ކަމެއް ނޫނެވެ.

މުސްތަފާބޭއެވެ. މަޑުމަޑުން ރާއްޖެމިދަނީ، ދުވަހަކުވެސް އަހަރުމެން ޚިޔާލުކުރި ދިމާއަކަށް ނޫނެވެ. މުސްތަފާބޭމެންގެ ތިޔަ ކަންކަން ރަގަޅުކަމަށް ދައްކަން، ވަޒީފާދީފައި، ދީނުން ވިޔަފާރިކުރާ މީހުން ދައްކާ ވާހަކަ އެއްވެސް ރައްޔިތަކު މިހާރު އަޑު ނާހާނެއެވެ.

މުސްތަފާބޭ ނިކަން ވިސްނާލަ ބަލާށެވެ. މިހާރު ފެންމަތިވެގެން މިއުޅެނީ ކިހާ ލަދުވެތި އަދި ކިހާ ހުތުރުކަމެއް ހެއްޔެވެ. މިދައްކަނީ އޮޑިއެއް ކޮންމެވެސް ގިރިއަކަށް އަރައިފި ވާހަކައެވެ. މަސްވެރިކަން ކިތަންމެ ރަގަޅު ވިއެއްކަމަކު، މިހާރު އަބަދު ދައްކަން މިޖެހެނީ ކޮންމެވެސް އެހެން މަސްވެރިކަމެއްގެ ވާހަކައެކެވެ. ކަންފަތަށް އަހަން އުދަގޫ ބާވަތެއްގެ މަސްވެރިކަމެެއް ކޮށްގެން އުޅޭ ވާހަކައެވެ. ކަމުވޮށިގެންވާ އިއްޒަތްތެރިންނާއި، ސިޔާސީ ގޮތުން ނުފޫޒުގަދަ ފަރާތްތަކެއްވެސް، މާ މަޝްހޫރު ގިރިއަކުން މަސްވެރިކަން ކޮށްގެން ކުރުދޮށީގައި ބާނައިފި ވާހަކައެވެ. އަނެއްކާ މުސްތަފާބޭވެސް އެގިރިއަށް މަސްވެރިކަމު ދިޔައީ ހެއްޔެވެ.

މުސްތަފާބޭ ހައިރާނެއް ނުވޭހެއްޔެވެ. ގިރި ގިރިއާއި ހާހަލުން މަސްވެރިކަން ކޮށް, އެތަންތަނުގެ ރޯދި ބަރަކާތުން އުޅެމުން އައި ދިވެހިންނާއި ގިރިތަކާއި އަޅުވައި މިދައްކަންފެށީ ކޮންފަދަ ހަޑި ވާހަކަތަކެއް ހެއްޔެވެ. މުސްތަފާބޭ އަޅެފަހެ ލަދުގެ ކަންފުޅެއްވެސް ނެތީ ތޯއެވެ.

އަދި ނުވިތާކަށް އެ މަންޒަރުތައް ބޭނުންކޮށްގެން ބްލެކްމެއިލްކޮށް، އަދި އެކަންކަމަކީ ޒާތީ ކަމެއްކަމަށް ދައްކައި، އެކަން އާއްމުކުރުމަށް މަސައްކަތް ކުރަނީ ނޫންތޯއެވެ. އެފަދަ ވިޔާނުދާ ހުތުރު ޢަމަލުތައް ކުރާ މީހުން، އެއްވެސް ހިފެހެއްޓުމެއްނެތި މަގުމަތީގައި އުޅޭއިރު، އިސްލާމްދީނުގެ ދިފާޢުގައި ޚިޔާލެއް ފާޅުކުރާ މީހަކު، 15 ދުވަހުން 30 ދުވަހުން މުއްދަތުޖަހައި، ހުރަގެއަށް ތިޔަލަނީ، މުސްތަފާބޭމެން، ހަމަ އެއްވެސް ބިރެއް ނުގަންނާތީތޯއެވެ.

މުސްތަފާބޭއެވެ. މުސްތަފާބޭމެންގެ ހެޔޮވެރިކަމެއްގައި ކޮންމެ ފަހަރަކުވެސް ގައުމު ފަސާދަވެ، އިގްތިސާދީގޮތުން، އިނދަޖެހިގެން ދަނީ ކޮންމެވެސް ސަބަބެއް އޮވެގެންނެވެ. އަހަރަނެންނަށް ވިސްނޭގޮތުގައި މީގެ ހަމައެކަނި ސަބަބަކީ، މުސްތަފާބޭމެން ތަޢާރަފްކުރަން އުޅޭ، އިސްލާމްދީނާ ބީރައްޓެހި ކަންކަމެވެ.

މުސްތަފާބޭއެވެ. އަހުރެންގެ އިޚްލާސްތެރި ނަސޭހަތެއް އެބަ އޮތެވެ. އަދިވެސް ވަގުތު އެބައޮތެވެ. ވީކަމެއް ވީތާއެވެ. ގިރިއަކާއި ގިރިއެކެވެ. އަވަހަށް އިސްލާޙުވެ، މިގައުމުގެ ހައްގުގައި، އިސްލާމްދީނުގެ ހައްގުގައި، ދިވެހި ރައްޔިތުންގެ ހައްގުގައި، ހެޔޮ ވެރިކަމެއްގެ މަގަށް ރުޖޫޢުވާށެވެ. ތައުބާ ވާށެވެ.

މިކަންތައް ކުރުމަށް ލަސްވެއްޖެނަމަ، އަހުރެންވެސް މުސްތަފާބޭއާއެކު ހަލާކުވެގެން ހިގައިދާނޭކަމުގެ ބިރު މިހާރު ހީވާން ފަށައިފިއެވެ. މި ގައުމުގެ ސަލާމަތެއް ނެތެވެ.

މިއީ އަޅެފަހެ ދޮގެއްތޯއެވެ.