ކުރިއަށް އޮތް ރިޔާސީ އިންތިޚާބުގައި އިދިކޮޅު ކޯލިޝަނުން ވާދަކުރައްވާ ކެނޑިޑޭޓް ކުރީގެ ރައީސް ޔާމީނާއި، ރިޔާސީ ޓިކެޓް ހަވާލު ކުރުމަށް ބާއްވާ ޚައްސަ ރައްމިއްޔާތު މިމަހުގެ 19 ވަނަ ދުވަހުގެރޭ ބޭއްވުމަށް ނިންމައިފިއެވެ.
މިމަހުގެ 19ވާ ހުކުރު ދުވަހުގެރޭ ބޭއްވުމަށް ހަމަޖެހިފައިވާ ޚާއްސަ ޖަލްސާގައި ރައީސް ޔާމީނަށް ރިޔާސީ ޓިކެޓް ރަސްމީކޮށް ހަވާލު ކުރުމަށް ވަނީ ހަމަޖެހިފައެވެ. މިޖަލްސާގެ މައިގަނޑު މަގުސަދަކީ ރައީސް ޔާމީނަށް އޮތް ތާއީދު ދައްކާލުމާއި، ރައީސް ޔާމީންގެ ޚިދުމަތަށް މިޤައުމު ބޭނުންވާ މިންވަރު ހާމަކުރުންކަމަށް ޖަލްސާ އިންތިޒާމު ކުރާ ފަރާތުން ވަނީ މައުލޫމާތު ދީފައެވެ.
ރައީސް ޔާމީން ލީޑުކުރައްވާ ދެ ޕާޓީގެ ރިޔާސީ ޓިކެޓް ގަބޫލު ކުރައްވާކަން އެމަނިކުފާނު ހާމަ ކުރެއްވީ ޕީޕީއެމް އާއި ޕީއެންސީ އިން ބޭއްވި ކައުންސިލް ބައްދަލްވުމުގައެވެ. ޕީޕީއެމްގެ ރިޔާސީ ޓިކެޓް ރައީސް ޔާމީނަށް އަރުވާފައިވާއިރު އެމަނިކުފާނުގެ މައްޗަށް ކުރީން އޮތް ހުކުމް ސުޕްރީމް ކޯޓުން ބާތިލު ކުރުމުން އިންތިހާބުގައި ވާދަކުރުމަށް އޮތް ހުރަސް ވަނީ ނެތިގެން ގޮސްފައެެވެ.
ނަމަވެސް އަދިވެސް ދަށު ކޯޓްގައި އެމަނިކުފާނުގެ މައްޗަށް ދެ މައްސަލައެއްގެ ޝަރީއަތް އެބަ ހިނގައެވެ. އެއިން ދައުވާއެއް ސާބިތުވެއްޖެނަމަ އިންތިހާބުގައި ވާދަ ކުރުމުގެ ފުުރުސަތު ގެއްލޭނެ އެވެ. ނަމަވެސް އިދިކޮޅު ދެ ޕާޓީގެ ވެރީން ވަނީ ރައީސް ޔާމީނަށް ރިޔާސީ ރޭހުން ދެން ފުރުސަތު ގެއްލުވާ ނުލެވޭނެ ކަމަށެވެ.
ނަމަވެސް މިހާރުގެ ޝަރީއަތުގެ މަރުހަލާ ކުރިއަށްދާ ގޮތުންނާއި، އަދި ދެކެވެމުންދާ ވާހަތަކަށް ބަލާއިރު ރައީސް ޔާމީނަށް ހުކުމެއް އައުމަކީ ދުރުކަމެއްކަމަށް ސިޔާސީ ބައެއް ފަރާތްތަކުން ވިދާޅުވެއެވެ. އިދިކޮޅު ކޯލިޝަނުން ބުނެފައިވަނީ ރިޔާސީ އިންތިޚާބުގައި އިދިކޮޅަށް އޮތް ހަމައެކަނި ޗޮއިސްއަކީ ރައީސް ޔާމީންކަމަށެވެ. އަދި އެކޯލިޝަން އޮތީ ރައީސް ޔާމީން ރިޔާސީ ދައުރަކަށް އިންތިޚާބު ކުރުމަށް ކުރަންޖެހޭ ކޮންމެ ކަމެއް ކުރުމަށް ފުރިހަމައަށް ތައްޔާރަށް ކަމަށް ވަނީ ބުނެފައެވެ.
ރައީސް ޔާމީން އިތުރު ދައުރަކަށް އިންތިޚާބު ކުރަންޖެހޭކަމަށް އެމްޑީޕީގައި އިސްކޮށް ހަރަކާތްތެރިވާ ބައެއް ބޭފުޅުންވެސް މިހާރު ދަނީ ބުނަމުންނެވެ. ޚާއްސަކޮށް ސަރުކާރުގެ ތެރޭގައި މިހާރު ހިނގަމުންދާ ކަންކަމާއި އެމްޑީޕީގެ އިސް ބައެއް ފަރާތްތަކުން ދެކޮޅު ހަދައި ދަނީ ރައީސް ޔާމީނަށް ތާއީދު ކުރާކަން ހާމަކުރަމުންނެވެ.
