ކުރީގެ ރައީސް ޔާމީނާއި ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމް ގުޅިގެން ހިންގި ކަމަށް ބުނާ ވ. އާރަށް ވިއްކުމުގައި ހިންގި ހިޔާނާތުގެ މައްސަލާގައި, ދައުލަތުން ހުށަހެޅި ހެއްކެއްގެ ޗެއިން އޮފް ކަސްޓަޑީގެ ތާރީހަކަށް 2026 ވަނަ އަހަރުގެ ތާރީހެއް އޮތް ކަން ފެންމަތިވެއްޖެއެވެ.
ކްރިމިނަލް ކޯޓުގައި މިއަދު ބޭއްވި މި މައްސަލައިގެ އަޑުއެހުމުގައި ކުރިޔަށް ގެންގޮސްފައިވަނީ ދައުވާ ސާބިތުކުރުމަށް ދައުލަތުގެ ފަރާތުން ހުށަހަޅާފައިވާ ހެކިންގެ ހެކިބަސް ނެގުމެވެ.
ކޯޓުގައި އޮތް އަޑުއެހުމަށް ވަނީ ފުލުުހުންގެ ޑޮކިއުމަންޓް އެގްޒެމިނޭޝަން ރިޕޯޓް ތައްޔާރުކުރި އަހުމަދު ތައުސީމް ހާޒިރުކޮށްފައެވެ. އޭނާއަކީ ފުލުހުންގެ ޑިޖިޓަލް އެވިޑެންސް ލެބޯޓަރީގައި ސީނިއަރ ފޮރެންސިކް އެނަލިސްޓެއްގެ ގޮތުގައި މަސައްކަތް ކުރައްވާ ފަރާތެކެވެ.
ދައުލަތުން ކުރި ސުވާލެއްގެ ޖަވާބު ދެމުން އެ ފުލުސް މީހާ ބުނެފައިވަނީ އެ ހެކިތައް އޭނާއާ ހަމައަށް ގެނެސްފައިވަނީ ހުރިހާ އިޖުރާއަތްތަކެއް ފުރިހަމަ ކުރުމަށް ފަހު ކަމަށެވެ. އަދި އޭނާއާ ހަމައަށް ގެންނާނީ ވެސް ޗެއިން އޮފް ކަސްޓަޑީގައި އެއްވެސް ގޯހެއް ނެތް ކަން ޔަގީން ކުރުމަށް ފަހު ކަމަށެވެ.
އެހެންވިޔަސް ޗެއިން އޮފް ކަސްޓަޑީގައި އެ ހެކި ހޯދި ކަމަށް ފުލުހުން ލިޔެފައި އޮތީ 23 އޮގަސްޓް 2026 އެވެ. ތާރީހުގައި އެފަދަ އޮޅުމެއް އަރާފައި އޮތް ކަމެއް ތަހުގީގު މަރުހަލާގައި ތެރެއިން ފާހަގަ ނުވާ ކަމަށާއި އޭނާ ފުރަތަމަ ބެލިއިރު ޗެއިން އޮފް ކަސްޓަޑީ އޮތީ ރަނގަޅަށް ކަމަށް ވެސް ބުންޏެވެ.
ޗެއިން އޮފް ކަސްޓަޑީއަކީ ހެކި ހޯދި ގޮތާއި ހެކި ތަހުލީލު ކުރުމުގެ މަރުހަލާގައި އެއް އޮފިސަރުން އަނެއް އޮފިސަރުގެ އަތަށް އެ ހެކި ގެންދެވިފައިވާ ގޮތާއި ތާރީހުތައް ބަޔާންކޮށްފައި އޮންނަ އެކުލެވުމެކެވެ.
މި މައްސަލާގައި މިހާތަނަށް ހެކިބަސް ނަގާފައިވަނީ ހަތަރު ހެކިވެރިއެއްގެ ހެކިބަހެވެ. އެއީ މިއަދު ހެކިބަސް ނެގި އޮފިސަރުގެ އިތުރަށް ޓޫރިޒަމް މިނިސްޓްރީގެ އޮފިޝަލަކާއި، ހަތަރު އައިފޯނަކާއި ޕެންޑްރައިވްތަކެއް ތަހުލީލުކޮށް މޯބައިލް ފޮރެންސިކް ރިޕޯޓެއް ތައްޔާރުކުރި އޮފިސަރަކާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު ޒިޔަތުގެ ލެޕްޓޮޕް ތަހުލީލު ކުރި އޮފިސަރެވެ.
މި މައްސަލައިގައި މިއަދު ދައުލަތާއި ދިފާއުން ވެސް ވަނީ ގިނަ ސުވާލުތަކެއް ހެކިވެރިޔާއަށް އަމާޒުކޮށްފައެވެ. ނަމަވެސް، ބޮޑަށް ސުވާލުކޮށްފައިވަނީ ސޮއި އެއްގޮތްތޯ ބެލުމަށް ހެކިވެރިޔާ ގެންގުޅު އުކުޅުތަކާއި އަދި ކަންތައްތަކާއި ގުޅޭ ގޮތުންނެވެ. މި މައްސަލައިގައި ދެން ޝަރީއަތެއް އޮންނާނީ އަންނަ ބުރާސްފަތި ދުވަހުއެވެ. އެ ދުވަހު ވެސް އޮންނަނީ ހެއްކެއްގެ ހެކިބަސް ނެގުމެވެ.
