ދެމީހަކު އެއްވެލާފަ ކަމެއް ހަރާމް ހަލާލް ކުރުމަކީ ދީނުގަ އެކަން އޮންނަގޮތެއް ނޫންކަމަށް އެސްޓީއޯގެ މެނޭޖިންގ ޑިރެކްޓަރ ޙުސައިން ޢަމުރު ވިދާޅުވެއްޖެއެވެ.
ޔޯގާ އާއި ގުޅިގެން އެކި ފަރާތްތަކުން ތަފާތު ރަޢުޔުތައް ނެރެމުން އަންނާތީ އެކަމަށް އިޝާރާތްކުރައްވާ އަމްރު ކުރެއްވި ޓްވީޓްގައި ވިދާޅުވީ، ދީނުގަ ނެތް ކަންކަން ދީނުގެ ތެރެއަށް ވެއްދުމަކީ ކޮށްގެންވާނެ ކަމެއް ނޫންކަމަށެވެ. ދީނުގަ ހަރާމްނުވާ ކަންކަން ހަރާމްކުރުމަކީ ވެސް ކޮށްގެންވާނެ ކަމެއް ނޫންކަމަށާއި، 2 މީހަކު އެއްވެލާފަ ކަމެއް ހަރާމް ހަލާލް ކުރުމަކީ ދީނުގަ އެކަން އޮންނަގޮތެއް ނޫންކަމަށްވެސް އަމްރު ވިދާޅުވިއެވެ. އޭނާ ވިދާޅުވީ ދީނުގެ ކަންކަން ނިންމުމަށް ވަކި އުސޫލެއް އޮންނަކަމަށެވެ. އެ އުސޫލުން ބޭރުން ކަންކަން ނިންމުމުން މަުޖުތަމައުގެ މަސްލަހަތު ގެއްލިގެންދާނެކަމަށް އަމްރު ވިދާޅުވިއެވެ.
އެ އުސޫލަކީ
1.ޤުރުއާން
2.ރަސޫލާގެ ސުންނަތް
3.އިލްމުވެރިންގެ އިޖްމާއުއަމިއްލަ ނަފްސުގެ ރަައުޔުގެ މައްޗަށް ބިނާކޮށް އުސޫލުން ބޭރުން ކަންކަން ނިންމުމުން މަުޖުތަމައުގެ މަސްލަހަތު ގެއްލިގެންދާނެ.
— Amr 🎈 (@HusenAmr) July 27, 2022
އަމްރު މިހެން ވިދާޅުވިއިރު، ސަރުކާރު ކޯލިޝަންގައި ހިމެނޭ އަދާލަތު ޕާޓިންވަނީ އެޕާޓިގެ ދީނީ ޢިލްމުވެރިން ހިމެނޭ ފަތުވާއެއް ޢާންމުކޮށްފައެވެ. އެގޮތުން ޔޯގާއަކީ ހިންދޫންގެ އަޅުކަމުގައި ހިމެނޭކަމެއްކަމަށާއި، އެއީ ހަރާމް ކަމެއްކަމަށް ފަތުވާ ނެރެފައިވެއެވެ.
މީގެ އިތުރުން "ހަރާމްވާނީ ހަމައެކަނި ﷲ ޙަރާމް ކުރެއްވި ކަންތައްތަކެވެ.” މިމައުޟޫޢުގެ މައްޗަށް ކުރީގެ ރައީސް މައުމޫން ޢަބްދުލްޤައްޔޫމް ކުރެއްވި ދިރާސާއެއްގެ ލިޔުމެއް ވަނީ އާންމު ކުރައްވާފައެވެ.
މި ލިޔުއްވުމުގައި މައުމޫން ވިދާޅުވެފައިވަނީ، ގައުމީ ނުވަތަ އިޖުިތިމާޢީ މުނާސަބަތުތައް ފާހަގަ ކުރުމާއި އިންސާނީ ގުޅުންތައް ބަދަހިކުރުމަށް ކުރެވޭ ކަންކަމާއި އުފަންދުވަސް ފާހަގަ ކުރުމާއި އެކިއެކި ކުޅިވަރު ކުޅުމާއި މުނިފޫހި ފިލުވުމަށް ކުރާ ކަންކަމަކީވެސް ހުއްދަ ކަންކަމުގެ ގޮތުގައި ބެލެވޭނެ ކަންކަމެވެ.
މައުމޫނުހެ އަމިއްލަފުޅު ޕާޓީ އެމްއާރުއެމްއިން އާންމުކުރި މި ލިޔުއްވުމުގައި މައުމޫން ވިދާޅުވެފައިވަނީ ހަރާމް އަދި ހަލާލު ކަންކަމަކީ ކަނޑައެޅި ބަޔާންވެގެންވާ ކަންކަންކަމަށާއި، ހަރާމް ކަންކަމުގެ ގޮތުގައި ކަނޑައަޅުއްވާފައިވާ ކަންކަމާއި އެކަންކަމުގެ މައްޗަށް ހަރާމްކަމުގެ ގަރީނާތައް ފެންނާން ހުރި ކަންކަން ފިޔަވައި އެހެން ހުރިހާ ކަންކަމަކީ ހުއްދަވެގެންވާ ކަންކަން ކަމުގައެވެ.
ސަބަބެއް ކަމުގައި މައުމޫން ބަޔާން ކުރައްވާފައިވަނީ، ދުނިޔެއާއި ދުނިޔޭގައި ވާހާތަކެއްޗެއް ﷲ ހައްދަވާފައިވަނީ އިންސާނުންނަށްޓަކާ ކަމަށް ﷲ ސުބުހާނަހޫ ވަތަޢާލާ އަންގަވާފައި ވުމެވެ.
މައުމޫނުގެ ލިޔުއްވުމުގައި ވާގޮތުން ހަރާމް ހަލާލް ކަންކަމަކީ އެކަންކަން ކަނޑައެޅުމުގެ ބާރު ހަމައެކަނި ﷲ ތަޢާލާއަށް ވާ ކަންކަމެވެ.
ރައީސް މައުމޫން މިހެން ވިދާޅުވެފައިވާއިރު،
104 ދީނީ އިންމުވެރިއަކު ނެރުއްވާފައިވާ ފަތުވާއެއް އިލްމުވެރިންގެ ގުޅުމުން ވަނީ އާންމު ކޮށްފައެވެ. އަދި މިމައްސަލާގައި ދީނީ އިލްވެރިންނާއި ސިޔާ ލީޑަރުންވެސް ގެންދަވަނީ އެކިއެކި ރައުޔުތައް ނެެރުއްވަމުންނެވެ.
ސިޔާސީ ލީޑަރުންގެ ތެރެއިން އަމިއްލަފުޅު ރައުޔު ހާމަކުރައްވާފައިވަނީ ކުރީގެ ރައީސް މުހައްމަދު ނަޝީދެވެ. ނަޝިދު ވިދާޅުވެފައިވަނީ ޔޯގާއަކީ ހަރާމް ކަމެއްކަމުގައި ބުނާ ދީނީ އެއްވެސް ފަތުވާއެއް ނެތްކަމުގައެވެ.
