ނުކިޔަވާ ފަތުވާ ދެއްވުން ހުއްޓާލުމަށް ކުރީގެ ރައީސް މުޙައްމަދު ނަޝީދަށް، ދީނީ ޢިލުވެރިޔާ ޝައިޚް ޢަލީ ޒައިދު ގޮވާލައްވައިފިއެވެ.
ޒައިދު ރައީސް ނަޝީދަށް މިގޮތަށް ގޮވާލެއްވީ ވަކި ބައެއްގެ ފަލްސަފާއަކީ އިސްލާމްދީނުގެގެ ހުކުމެއްކަމަށް ބަލައިގަންނަން ދަތިކަމަށް ވިދާޅުވެ، ޔޯގާއި ގުޅޭގޮތުން އަދާލަތު ޕާޓީގެ ޢިލުވެރިން ނެރުއްވި ފަތުވާއަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ފާޑުވިދާޅު ވުމާއި ގުޅިގެންނެވެ.
ރައީސް ނަޝީދު ވިދާޅުވީ ޔޯހާއަކީ ޝިރުކެއްކަން ދަންނަބޭކަލުންގެ އިޖުމާޢުއެއް ނެތްކަމަށެވެ. ވަކި ބައެއްގެ ފަލްސަފާއަކީ އިސްލާމް ދީނުގެ ޙުކުމެއްކަމަށް ބަލައިގަންނަން ދަތިކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދުގެ އެ ވާހަކަފުޅަށް ރައްދު ދެއްވައިި ޒައިދު ވިދާޅުވީ، ނުކިޔަވައި ފަތުވާ ދެއްވުން ހުއްޓާލަން ޖެހޭކަމަށެވެ. ރައީސް ނަޝީދު ދީނީ ޢިލްމު ހާސިލުކުރެއްވީ ކޮންތާކުންތޯވެސް ޒައިދު ސުވާލުކުރެއްވިއެވެ.
ދުނިޔޭގެ އަސްލު އުސޫލުތައް އެނގެނީ ކިހާވަރަކަށްތޯ؟ އަޤީދާގެ މައްސަލަތަކާއި އިޖުމާއާއި ޤިޔާސާ ފިޤްހުގެ އެކި މައްސަލަތަކުގައި މީޒާންކޮށް ޤިޔާސް ކުރައްވަން ދަސްކުރެއްވީ ދީނީ ކޮން ޔުނިވާސިޓީއަކުންތޯ؟
ޢަލީ ޒައިދު ރައީސް ނަޝީދަށް ސުވާލުކުރެއްވިއެވެ.
Nukiyavaa fatwa dhehvun huttaalan jehey! Konthaakun thoa dheeny Ilmu haasil kurehvy?! Dhynuge Aslu Usool thah engeny kihaavarakah thoa?! Agydhaa ge massala thakaa, ijumaa aa qiyaasaa fiqhy eki massalathugai meezaan koh qiyaas kurahvan dhaskurehvy dheeny kon University akun thoa?! https://t.co/MP9YnjpsQ8
— Ali Zaid (@alizaid1000) July 26, 2022
"އިސްލާމީ ފިގުހުވެރިންގެ މީޒާނުގައި "ޔޯގާ" މިނަމުގައި އަދާލަތުގެ އިލްމުވެރިންގެ މަޖިލީހުން ރޭ އާންމުކުރި ކަރުދާހުގައި ވަނީ ޔޯގާ އާއި ގުޅޭ މައިގަނޑު ތިން ރަޢުޔެއް އޮތްކަމަށެވެ. އޭގެތެރެއިން 2 ރަޢުޔަކީ ޔޯގާ ހަރާމްކަމަށްނިންމާފައިވާ ރަޢުޔުކަމަށާއި، އަނެއް ރައުޔުގައިވާ ޝަރުތުތަކާ އެކު ޔޯގާ ހަދާނަމަ ހަގީގަތުގައި ޔޯގާއަށް ނުވާނެކަމަށް ޢިލްމުވެރިންގެ މަޖިލީހުގެ ކަރުދާހުގައިވެއެވެ.
މައްސަލައިގެ ތިން ރައުޔަށް ނަޒަރު ހިންގާލާ ވިސްނާލުމުން ފާހަގަވާ ކަންކަންކަމަށް މި ކަރުދާހުގައި ބަޔާންކޮށްފައިވާ ކަންކަމަކީ:
- ޔޯގާގެ އަސްލު ކަމުގައި ހިންދޫ ދީނުގެ މަފްހޫމުގައި ވާ ޔޯގާ ހެދުން މުސްލިމަކަށް ހުއްދަ ނުވާނެކަމާއި އެއީ ކަންޑައެޅިގެން އިސްލާމްދީނާ ޚިލާފު ކަމެއްކަމަށް ހުރިހާ ޢިލްމުވެރިން އިއްތިފާޤުވެއެވެ.
- ތިންވަނަ ރައުޔުގައިވާ ޤައިދު ނުވަތަ ޝަރުޠުތައް ގެނައުމުން ޔޯގާގެ އަސްލު ގެއްލި އެއީ ޔޯގާގެ މާނައިން ބޭރުގެ ހަރަކާތްތަކެއްކަމަށް ވެދެއެވެ. އަދި ޔޯގާ ހުއްދަވަނީ ކަމުގައި ބުނުމަށްވުރެ ޔޯގާގެ ނަމުގައިވާ ހަރަކާތްތަތަކެއް ހުއްދަ ވަނީ ކަމުގައި އެނގިގެންދެއެވެ. މިރައުޔުގެ ނަތީޖާއަކީ ހިންދޫދީނުގެ މަފްހޫމުގެ ޔޯގާއާއި ހުޅަނގުގެ މަފްހޫމުގެ ޔޯގާވެސް ހުއްދަ ނުވުމުވެ. އެހެންކަމުން ފުރަތަމަ ރައުޔާއި ތިންވަނަ ރައުޔުގެ ނަތީޖާގައި ތަފާތެއް ނެތްކަން އެނގިގެންދެއެވެ.
- މައްސަލައިގެ މަޙައްލުއް ނިޒާއަކީ (އިޚްތިލާފުވާ ނުކުތާއަކީ) ހިންދޫ ދީނުގެ މަފްހޫމާއި އިޢުތިޤާދުން ބޭރުވެ ހުޅަނގުގެ މަފްހޫމުގައިވާ ޔޯގާ ހެދުން މުސްލިމަކަށް ހުއްދަވޭތޯ ނުވަތަ ނުވޭތޯއެވެ؟
ޔޯގާ ހެދުން ނުވަތަ ހެދުމުގައި ބައިވެރިވުން ހުއްދަނުވާނެ ސަބަބުތައްކަމަށް ޢިލްމުވެރިންފާހަގަކޮށްފައިވާ އެންމެ މުހިންމު އެއްކަމަކީ އެ ޢަމަލުގެ ތެރޭގައި ޝިރުކުގެ ޢަމަލު ހިމެނޭތީއެވެ.
ހިންދޫން ފިޔަވާ އެހެން މީހުންނަށްވެސް މިކަން ތަޢާރަފް ވެފައިވަނީ ހިންދޫންގެ ފަރާތުންކަމަށް ބުނެފައިވެއެވެ. އެހެންކަމުން ޔޯގާ ހެދުން ވެގެންދަނީ ހިންދޫ ދީނުގެ ތެރެއިންކަމަށާއި، ނުވަތަ ހިންދޫ ދީނަށް އަޅުކަން ކުރާ މީހުންނާއި އެއްގޮތްވުންތަކެއް ހިމެނޭ ކަމެއްގެ ގޮތުގައިކަމަށް މި ކަރުދާހުގައިވެއެވެ. މި ދެކަންތައްވެސް ވަނީ އިސްލާމްދީނުގައި ވަރުގަދައަށް މަނާކުރައްވާ ޙަރާމް ކުރައްވާފައިކަމަށް ޢިލްމުވެރިން ވިދާޅުވެފައިވެއެވެ.
ޔޯގާއާއި ގުޅޭގޮތުން އަދާލަތުގެ ޢިލްމުވެރިންގެ މަޖިލީހުން ދިރާސީ ކަރުދާހެއް ނެރެފައިމިވަނީ ބައިނަލްއަޤްވާމީ ޔޯގާ ދުވަސް ފާހަގަކުރުމަށް މިދިޔަ މަހުގެ 21ގައި ގަލޮޅު ދަނޑުގައި ބޭއްވި ހަރަކާތަށް ހުރަސް އަޅައި ހަމަނުޖެހުން ހިންގިކަމުގެ ތުހުމަތުގައި ބަޔަކު ހައްޔަރކޮށްފައިވަނިކޮށެވެ. އެ ހަރަކާތަށް ހުރަސްއެޅިކަމުގެ ތުހުމަތުގައި 21 މީހަކު ހައްޔަރުކުރިއެވެ. އޭގެތެރޭގައި ދީނީ ބައެއް ޢިލްމުވެރިންވެސް ހިމެނެއެވެ.
މިއާއެކު ހޯމް މިނިސްޓަރ އަދި އަދާލަތު ޕާޓިގެ ރައީސް ޢިމްރާން ޢަބްދުﷲއަށް ޢިލްމުވެރިންނާއި އާންމުންގެ ގިނަ ފާޑުކިޔުންތަކެއް އަމާޒުވިއެވެ. ޔޯގާ ހަރަކާތާއި ގުޅޭގޮތުން އަދާލަތު ޕާޓީގެ ޢިލްމުވެރިންގެ ދިރާސީ ކަރުދާހެއް އެކުލަވާލުމާއި ގުޅިގެން ޢިމްރާން ވިދާޅުވެފައިވަނީ އެއީ ވަރަށް ރަނގަޅު ޢިލްމީ މަސައްކަތެއްކަމަށެވެ.
