ޖަޕާންއިން މަކުނުވިދުރީގެ ފުރަތަމަ ކޭސް، އެގައުމުގެ ވެރިރަށް ޓޯކިޔޯއިން ފެނިފައިވާކަމަށް، ޓޯކިޔޯގެ ގަވަރުނަރު ހޯމަ ދުވަހު ވިދާޅުވެއްޖެއެވެ.
ޖަޕާންއިން ފެނުނު، މިބަލިޖެހިފައިވާ މީހާއަކީ އުމުރުން 30 އަހަރުގެ، ޔޫރަޕުން ޖަޕާނަށް ދަތުރުކުރި މީހެކެވެ. އޭނާ މިހާރުވަނީ ހޮސްޕިޓަކުގައި އެޑްމިޓްކޮށް ފުރުވާ ދޭން ފަށާފައެވެ.
މި ފަހްތާގެ ހޮނިހިރު ދުވަހު ދުނިޔޭގެ ސިއްޙަތު ޖަމިއްޔާއިންވަނީ މަކުނުވިދުރި ބައްޔަކީ ބައިނަލްއަގުވާމީ ސިއްޙީ އިމަޖެންސީއެއްގެ ގޮތުގައި ކަޑައަޅާ އެކަން އިއުލާން ކޮށްފައެވެ.
މިއަހަރު މިހާތަނަށް ދުނިޔޭގެ 75 ގައުމަކުން މަކުނުވިދުރީގެ 16،000 މީހަކު ވަނީ ފެނިފައެވެ. އަދި އެފްރިކާ ބައްރުން މިބަލީގައި 5 މީހަކުވަނީ މަރުވެފައެވެ.
މަނުކުވިދުރިއަކީ ދުނިޔެއަށް ކުރިމަތި ވެފައިވާ އިމަރޖެންސީ ހާލަތެއް ކަމަށް ކަނޑައަޅާ އެކަން އިއުލާން ކުރައްވަމުން، މިއީ ހެލްތު އިމަޖެންސީއަކަށް ވިނަމަވެސް، މިބަލި މިވަގުތު ފެތުރެމުންދަނީ އެއް ޖިންސުން ގުޅުން ހިނގާ ފިރިހެނުންގެ މެދުގައިކަމަށް ފާހަގަ ކުރެވިފައިވާ ކަމުގައި ދުނިޔޭގެ ސިއްހަތު ޖަމިއްޔާއިން ވަނީ ބުނެފައެވެ.
މަނުކުވިދުރިއަކީ ބައިނަލްއަގުވާމީ ހެލްތު އިމަރޖެންސީއެއްކަން އިއުލާން ކުރައްވަމުން، ދުނިޔޭގެ ސިއްހަތު ޖަމިއްޔާގެ ޑިރެކްޓަރ ޖެނެރަލް ޓެޑްރޮސް އަދަނޮމް ގެބްރެޔެސުސް މިއަދު ވިދާޅުވެފައިވަނީ، މިވަގުތަށް މި ބަލި ފެތުރެމުންދަނީ އެއްޖިންސުން ގުޅުން ހިންގާ ފިރިހެނުންގެ މެދުގައްޔާއި، އަދި ވަކީން ޚާއްސަކޮށް އެތައް ބަޔަކާއެކީ ގުޅުންހިންގަމުންދާ މީހުންގެ މެދުގައި ކަމުގައެވެ.
އޭނާ ވިދާޅުވި ގޮތުގައި، އެހެންކަމުން ރަގަޅު ސްޓްރަޓަޖީތައް ބޭނުންކޮށްގެން ބަލި ފެތުރެމުންދާ މީހުންގެ މެދުގައި ބަލި ފެތުރުން ހުއްޓުވިދާނެކަމަށް އޭނާ ދެކެވަޑައި ގަންނަވައެވެ.
މަކުނުވިދުރީގެ ގިނަ ކޭސްތަކެއް ބޭނުން ކޮށްގެން ދާދިފަހުން ހަދާފައިވާ ދިރާސާއަކުންވެސް ދައްކާފައިވާ ގޮތުގައި މިބަލި މިފަަހަރު ފެތުރެން ފަށާފައިވަނީ އެއްޖިންސުން ގުޅުން ހިންގާ މީހުންގެ ފަރާތުން ޔޫރަޕްގައެވެ.
