މާލޭގައި ވަރަށް ނިކަމެތިން އުޅޭކަމަށް ވިދާޅުވެ ފޭދޫ ދާއިރާގެ މެންބަރު މުޙައްމަދު ނިހާދުވެސް، މާލޭ މީހުންނަށް ގޯތި ދޫކުރުމަށް ސަރުކާރުން ނިންމި ނިންމުން ދިފާޢުކުރައްވައިފިއެވެ.
މާލޭގެ ރައްޔިތުންނަށް ޚާއްޞަކޮށްގެން މާލެ ސަރަހައްދުން ގޯތި ދޫކުރުމަށް ރައީސް ނިންމެވި ނިންމެވުމާއި ގުޅިގެން މާލެއާއި އަތޮޅުތަކުގެ ބަހުސް ވަރަށް ހޫނުކޮށް ސޯޝަލް މީޑިއާގައި އަންނަނީ ކުރަމުންނެވެ.
އެ ބަހުސްގެ ތެރެއަށް ވަންނަވާ ފޭދޫ ދާއިރާގެ މެންބަރު މުޙައްމަދު ނިޙާދު ވިދާޅުވީ، މާލޭގައި ވަރަށް ނިކަމެތިން އުޅޭކަމަށާއި، އެ ޙާލަތު އެނގޭ މީހަކު އެކަމާއި ދެކޮޅު ނުހަދާނެކަމަށެވެ.
މާލޭގައި ވަރަށް ނިކަމެތިން އެބަ އުޅޭ! އެ ހާލަތު އިނގޭ މީހަކު ފަޅޮލޭ ފާގަ އޭ ނުކިޔާނެ!
— Feydhoo Meehaa (Mohamed Nihad) (@nihad_m) July 22, 2022
ނިހާދު މިހެން ވިދާޅުވެފައި ވާއިރު، މާލެ ސަރަހައްދުން މާލޭ މީހުންނަށް ގޯތި ދިނުމަށް ނިންމި ނިންމުމާއި ގުޅިގެން ބައެއް ފަރާތްތަކުން ވަނީ ހުޅުމާލެއާއި ގުޅީފަޅަކީ މާލޭގެ ބިން ނޫންކަމަށް ބުނަމުންނެވެ. އަދިި އެތަންތަން ހިއްކީ ރައްޔިތުންގެ ޓެކްސް ފައިސާއިންކަމަށް އެމީހުން ބުނެއެވެ. ނަމަވެސް މާލޭގެ ރައްޔިތުންނަށް ގޯތި ހައްގުވާކަމަށް ވާހަކަ ދައްކާ މީހުން ބުނަނީ، މާލޭގެ ރައްޔިތުންގެ ތެރޭގައި ވަރަށް ނިކަމެތި ޙާލަތުގައި އުޅޭ އަދި ރާއްޖޭގެ އެއްވެސް ސަރަހައްދަކުން ނުވަރަ ރަށަކުން ގޯތި ނުލިބޭ މީހުން ގިނަކަމަށެވެ.
ބޯހިޔާވެހިކަމަށް ހައްލު ހޯދައިދިނުމުގެ ގޮތުން މާލެ ސަރަހައްދުން ހިލޭ ގޯތި ދޫކުރުމަކީ އެންމެ ރަނގަޅު އަދި އެންމެ އިންސާފުވެރިކަމާއެކު ކުރެވިދާނޭކަމެއް ކަމުގަައި ނުފެންނަ ކަމަށް ވިދާޅުވެ އެކަން ބައްލަވައިދިނުމަށް ފޮނަދޫ ދާއިރާގެ މެންބަރު މޫސާ ސިރާޖު ރައްޔިތުންގެ މަޖިލީހަށް ވަނީ މައްސަލައެއްވެސް ހުށައަޅާފައެވެ.
ސަރުކާރުން ވަނީ ހުޅުމާލެއިން 1000 ގޯއްޗާއި ގުޅިފަޅުން ދޫކުރާ 2000 ގޯއްޗަށް ކުރިމަތިލުމުގެ ފުރުސަތު ހުޅުވާލައިފައެވެ. އެކަމާ ގުޅިގެން ސިރާޖު މަޖިލީހަށް ފޮނުވި ސިޓީއެއްގައި ބުނީ ހުޅުމާލެ ދެވަނަ ފިޔަވަހީގައި އަޅާފައިވާ ހިޔާ ފްލެޓުތަކުގެ ތެރެއިން "އެޗް8″ ކެޓަގަރީގައި ހިމެނޭ މާލޭ ރަށްވެހިންނާއި "އެޗް9″ ކެޓަގަރީގައި ހިމެނޭ މާލޭ ދަފްތަރުގައި ޖެހިފައިވާ ފަރާތްތަކަށް އެ ފްލެޓުތައް ދީފައި ވަނީ ފައިސާ ދައްކާ ގޮތަށް ކަމަށެވެ.
ސިރާޖު ވިދާޅުވީ މާލޭ ރައްޔިތުންނާއި އަދި ރާއްޖޭގެ އެންމެހައި ރައްޔިތުންގެ ބޯހިޔާވަހިކަމަށް ހައްލު ހޯދައިދޭން ޖެހޭނެ ކަމުގައި އޭނާ އަށް ގަބޫލު ކުރެއެވެ. އެހެންކަމުން 5000 އާއިލާއަށް 48 ބިލިއަން ރުފިޔާގެ ބިން އިންސާފުވެރި ކަމާއިއެކީ ބެހޭނެ ކަމަށް ނުދެކޭތީއާއި މިބިންތައް ބީލަމަށް ލައިގެން ވިއްކައިފިނަމަ އަންދާޒާ ކުރެވޭ ފައިސާގެ އަދަދަކީ ކޮބައިކަން މަޖިލީހުން ބަލައިދޭން އެދޭކަމަށް ސިރާޖު ވިދާޅުވިއެވެ.
މާލޭ ރައްޔިތުންނަށް އެއްވެސް އަގަކާ ނުލައި ބިން ދޫކުރަން ސަރުކާރުން ނިންމާފައިވާތީ ބައެއް މީހުން އަންނަނީ އެކަމާ ދެކޮޅު ހަދަމުންނެވެ. އެގޮތުން ވަކި ރަށެއްގެ ބަޔަކަށް އެގޮތަށް ހިލޭ މާލޭން ބިން ދިނުމަކީ އިންސާފެއް ނޫން ކަމަށް އެ މީހުން ބުނެއެވެ.
