ކޮންމެ ހެޔޮ ބަހަކީވެސް ސަދަގާތެއް ކަމަށާއި، ސަބަބަކީ މުޖަތަމައަށް އޭގެ ހެޔޮ އަސަރުކުރާ މިންވަރު ބޮޑު ކަމުން ކަމުގައި މިއަދުގެ ހުކުރު ޚުތުބާގައި ވިދާޅު ވެއްޖެއެވެ.
"ހެޔޮ ބަސް ބުނުން" މި މައުޟޫއުގެ މައްޗަށް މިއަދު ޚާއްސަ ކުރެވިގެންދިޔަ ހުކުރު ޚުތުބާގައި ބަޔާން ކޮށްފައިވާ ގޮތުގައި ހެޔޮ ބަހަކީ ރަގަޅު ގަހަކުން ނިކުންނަ މޭވާއެއްފަދަ ކަމެއް ކަމުގައެވެ. އަދި އެއީ ހިނިތުންވުން ގެނެސްދޭ ކަމެއްގެ އިތުރުން ހެޔޮ ބަސް ބުނެ އުޅުމަކީ ވާހަކަ ދައްކާ މީހާގެ ޝަޚުސިއްޔަތު އަގައިދޭ ކަމެއްކަމުގައިވެސް ޚުތުބާގައި ވިދާޅު ވެފައި ވެއެވެ.
އެއީ އޭނާގެ ފޭރާމެވެ. އެއީ މީސްތަކުންގެ ހިތްތައް ހުޅުވައިދޭ ތަޅުދަނޑިއެވެ. އެއީ މާތް ﷲގެ ހަޒުރަތަށް އޭނާގެ މެސެޖްތައް ގެންގޮސްދޭ ސަފީރެވެ. ހެޔޮ ބަހެއް މެނުވީ މާތްﷲގެ ހަޒުރަތަކަށް ނުފޯރާނެ އެވެ.
ޚުތުބާގައި ވިދާޅުވެފައި ވެއެވެ.
މީގެ އިތުރުންވެސް މިއަދު ހުކުރު ޚުތުބާގައި ވިދާޅުވެފައިވާ ގޮތުގައި ހެޔޮ ބަހެއް ބުނުމަކީ ބޮޑު ހޭދައެއް ނޫންކަމަށާއި، އެހެންކަމުން އޭގައި ހިމެނޭނީ އެބަސް ބުނާ މީހާއަށާއި، އަޑުއަހާ މީހާއަށް މަންފާއާއި ލާބައެއް ކަމުގައެވެ. އަދި އެބަހުގައި ފުރައްސާރަ ކުރުމެއް، ނެތި މޮށުމެއް، ހުތުރު އެއްޗިހި ކިޔުމެއް ނުހިމެނޭނެ ކަމަށާއި، ހެޔޮ ބަހަކީ މާތް ﷲ ހަނދުމަ ކުރުމާއި، ތަހްލީލާއި، ތަޙްމީދާއި، ތަސްބީހަ ކިޔުންކަންވެސް ޚުތުބާގައި ބަޔާން ކޮށްފައިވެއެވެ.
އެއި ފައިދާކުރަނިވި އިލްމެއް ފެތުރުމާއި، ހެޔޮ ކަންތަކަށް އަމުރު ކުރުމާއި، މުންކަރާތްތައް ނަހީ ކުރުމެވެ. އެއީ މީސްތަކުންނަށް ނަސޭހަތް ދިނުމާއި، ސީދާ މަގަށް މަގު ދެއްކުމެވެ. ހެޔޮ ބަހަކީ ހެޔޮ ގަހެއްފަދަ އެއްޗެކެވެ. އެގަހުގެ ހިޔާ ބޮޑެވެ. އެގަހުގެ މަންޒަރު ރީއްޗެވެ. އެގަހުގެ ވަސްމީރެވެ. އެގަހުގެ މޭވާ ފޮންޏެވެ. އެގަހުގެ ފައިދާ ގިނަގުނައެވެ.
ހެޔޮ ބަސް ބުނުމުގެ ފައިދާ ބަޔާން ކޮށްދެއްވަމުން މިއަދުގެހުކުރު ޚުތުބާގައި ވިދާޅުވެފައި ވެއެވެ.
ކޮންމެ މީހަކުވެސް ބުނާ ހެޔޮ ބަސްތަކަށް ސަވާބު ދެއްވާނޭކަން ބަޔާން ކުރައްވަމުން، ހެޔޮބަހަކީ ސަދަގާތެއްކަން ކީރިތި ރަސޫލާ ބަޔާން ކުރައްވާފައި ވާކަން ފާހަގަ ކުރައްވަމުން، ޚުތުބާގައި ވިދާޅުވެފައިވަނީ ބުނާ ބަހަކުން އަޅާ ފާފަވެރިވެ ނަރަކައަށްވެސް ވަންނަން ޖެހިދާ ފަދައިން ބަސްމަގު ރިވެތި ކުރުމަކީ ސުވަރުގެ ލިބުން ހައްގުވާ މަތިވެރި އަމަލެއްކަން ހަތީސުުން ސާބިތުވާ ކަމުގައެވެ.
