ރެހެންދި ސްކޫލުގެ ޕީޓީއޭ އިން ބޭއްވި "ރެހެންދި ސޭލް" އިވެންޓުގައި މުޖުތަމައާ ނުގުޅޭ އަދި ޖިންސީ ކަންކަމަށް ހިތްވަރު ދޭ މެނޫއެއް ބެހެއްޓި މައްސަލަ ފެންމަތިވެއްޖެއެވެ.

އެ ސްކޫލްގެ ބެލެނިވެރިންގެ އެސޯސިއޭޝަން (ޕީޓީއޭ) އިން އިންތިޒާމްކޮށްގެން ބޭއްވި ސޭލް އިވެންޓްގައި ހުރި ސްޓޯލެއްގެ މެނޫއެއްގައި ރާ ބޮއި އަދި ޖިންސީ ގުޅުން ހިންގަން ހިތްވަރު ދޭ މެނޫއެއް ހިމަނާފައި ހުރުމުން ގިނަ ބެލެނިވެރިން ވަނީ ނުރުހުން ފާޅުކޮށްފަ އެވެ.

އޭގައި ރާ ބޮއެ ޖިންސީ ގުޅުން ހިންގަން ހިތްވަރުދޭ ނަން ނަން ހިމެނޭ ބުއިންތައް ހިމަނައިފައި ވެއެވެ. އޭގެ ތެރެއިން އެއް ބުއިމަކަށް ދީފައިވާ ނަމަކީ ރަލުގެ ބާވަތްތައް ހިމަނައިގެން ހަދާފައިވާ ކޮކްޓެއިލްއަަކަށް ކިޔާ ނަމެކެވެ.

އިޖުތިމާއީ މިންގަނޑާ ހިލާފު ނަންތަކެއް ދީފައިވާ މޮކްޓެއިލް ބުއިންތަކެއް އިޝްތިހާރު ކުރުމަށް ސްޓޯލް ކައިރީގައި ބަހައްޓާފައި ހުރި ބޯޑުގެ ފޮޓޯއެއް ސޯޝަލް މީޑިއާގައި އާންމުވެ، ގިނަ ބަޔަކު ވަނީ ސްކޫލަށް ފާޑުކިޔައިފައެވެ.

އެކަމާ ގުޅިގެން ސްކޫލުން ބުނީ، މިހާރު ކުރިއަށް ގެންދާ ސޭލްގެ ކެންޓީންގެ ކައިރީގައި ރޭގައި ބަހައްޓާފައި ހުރި މެނޫ ބޯޑުގައިވާ އިބާރާތްތަކަކީ ސްކޫލެއްގެ ތެރޭގައި ބެހެއްޓުން އެންމެ ރަނގަޅު އިބާރާތްތަކެއް އެކުލެވޭ ބޯޑެއް ނޫން ކަމަށް ސްކޫލުން ވެސް ދެކޭ ކަމަށެވެ.

ސްކޫލުން ބުނި ގޮތުގައި، އެ ބަޔަކު އެ ކަން ކުރީ "އިންޓަނޭޝަނަލް މެނޫ" އެއް ކަމަށް ވާތީ މާބޮޑަށް ވިސްނާލުމެއް ނެތި ކަމުގެ މައުލޫމާތު ވަނީ ލިބިފައެވެ. ނަމަވެސް އެ ކަން އެނގުނު ހިސާބުން ސްކޫލުގެ ޕީޓީއޭގެ އިންތިޒާމު ކޮމިޓީން ވަނީ އެ ބޯޑު ނަގައި އެކަން ނުކުރުމަށް އަންގައިފައެވެ.

ރެހެންދި ސްކޫލުން ބުނީ އެ ނަންތައް މޮކްޓެއިލް ބުއިންތަކަށް ދިނީ ސްކޫލަށް އެނގިގެން ނޫން ކަމަށާއި އެފަދަ ބޯޑެއް ސްކޫލުގެ ގޯތި ތެރޭގަައި ބެހެއްޓުން ކުށްވެރިކުރާ ކަމަށެވެ.