ވެރިކަން ކުރާ ކޯލިޝަންގައި ހިމެނޭ އަދާލަތު ޕާޓީއަކީ ދެތިން މީހެއްގެ އަމިއްލަ ފައިދާއަށް ގެންގުޅޭ ނަމެއް ކަމުގައި އިދިކޮޅު ޕްރޮގްރެސިވް ކޯލިޝަން، ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ މިފަހުން އަދާލަތު ޕާޓީގެ ރައީސް ޝައިޚު އިމްރާން އެޕާޓީގެ ދިފާއުގައި ކުރައްވަމުންދާ ޓުވީޓުތަކާއި ދައްކަވަމުންދާ ވާހަތަކަށް އިޝާރާތް ކުރައްވައެވެ. އިމްރާން ވަނީ އަދާލތު ޕާޓީ ފަހަތައް ޖައްސާލަން ބަޔަކު މަސައްކަތް ކުރި ނަމަވެސް އެކަން ނުވާނެކަމަށް ވިދާޅުވެފައެވެ.
އިމްރާންގެ ވާހަކަތަކަށް ރައްދު ދެއްވަމުން ޝިޔާމް ވިދާޅުވީ ސަރުކާރު ކޯލިޝަން ތެރޭގައި އަދަލާތު އޮންނަތާ 4 އަހަރު ވެފައިވާކަމަށެވެ. މި ހަތަރު އަހަރުގެ ތެރޭގައި މާތް ރަސޫލާއަށް ފުރައްސާރަކޮށް، ދީނަށް ހަޖޫ ޖަހައި އެތައް ކަމެއް ހިނގައިދާއިރުވެސް އަދާލަތު އޮތްކަމެއްވެސް ބަޔަކަށް ނެގޭކަމަށެވެ. މިއަދު މާބާރަށް އަޑުގަދަކޮށް ކަރު ކެހެމުންދަނީ 2023 ކައިރިވާތީ އަނެއްކާވެސް ސިޔާސީ މަންފާއަކަށް ކަމަށް ޝިޔާމް ވިދާޅުވިއެވެ.
ސަރުކާރެއްގައި އެލިގެން އޮންނަތާ 4 އަހަރު. އިސްލާމް ދީނަށް ފުރައްސާރަކޮށް މާތް ރަސޫލާއަށް ހަޖޫ ޖެހި އިރު އަދާލަތު ހިމޭނުން. ތީ ދެތިން މީހުންގެ މަންފާއަށް ގެންގުޅޭ ނަމެއްކަން އެންމެން ދަނޭ. 2023 ކައިރިވާތީ ޕާޓީއަށް ވަގަށް މެމްބަރުން ހަމަކޮށްގެން ތިމަންނާ އެބަހުރިކަން އަންގަން ތިޔަ ކެހެނީ ކަރު.
– ޝިޔާމް ވިދާޅުވިއެވެ.
އަދާލަތު ޕާޓީއަށް އެންމެ ބޮޑު ފާޑުކިޔުންތަކެއް އަމާޒުވެފައިވަނީ އިސްލާމްދީނާއި ޚިލާފް އެތައް ކަމެއް ރާއްޖޭގައި ހިންގަމުންދާއިރު އެކަންކަމާއި އެޕާޓީން މާބޮޑު އަޅާލުމެއް ނުބައްޓާތީއެވެ. މީގެ ކުރިން ދީނާއި ޚިލާފް ކަންކަން ކުރުމުގާއި، ނުހައްގުން ހިންގޭ އެކި ކަންމުގައި އަދާލަތު ޕާޓީ އަކީ ވަރަށް ވަރުގަދައަށް ރާއްޖޭގައި މަސައްކަތް ކުރި ޕާޓީއެކެވެ. ނަމަވެސް މިސަރުކާރުގެ އިސް މަޤާމުތަކުގައި އަދާލަތު ޕާޓީގެ ބޭފުޅުން ތިބެ ދީނާއި ޚިލާފް އެތައް ކަމެއް ހިންގަމުންދާއިރު އެކަންކަމަށް އެކެށީގެންވާ ފިޔަވަޅު ނޭޅޭ މައްސަލައަކީވެސް ގިނަ ބަޔަކު ފާހަގަ ކުރާކަމެކެވެ.
އަދާލަތު ޕާޓީއަކީ މީގެ ކުރިން ދީނީ ކަންކަން ފުޅާކޮށް ހިންގުމަށް ގިނަ ހަރަކާތްތަކެއް ރާއްޖޭގެ އެކި ކަންކޮޅުތަކުގައި ހިންގަމުންދިޔަ ޕާޓީއެއް ނަމަވެސް މިފަހުން އެޕާޓީގެ އެފަދަ ހަރަކާތްތައްވެސް ވަނީ ވަރަށް ބޮޑަށް މަދުވެފައެވެ.
