ކުރީގެ އިސްލާމިކް މިނިސްޓަރ ޑރ.ޝަހީމް އިސްކޮށް ހުންނަވައިގެން، ކީރިތި ޤުރުއާން ހިތު ދަސް 100 ޙާފިޒުންގެ އުފެއްދުމުގެ މަޝްރޫޢުގެ ފުރަތަމަ ސެމިސްޓަރގެ ކިޔެވުން ނިންމާލައިފިއެވެ.
100 ޙާފިޒުން އުފެއްދުމުގެ މަޝްރޫޢަކީ ދިވެހި މުޖުތަމަޢުގައި ކީރިތި ޤުރުއާނަށް އޮންނަ ލޯބި އިތުރުކޮށް ރާއްޖޭގައި ޙާފިޒުން އިތުރުކުރުމުގެ މަތިވެރި މަޤުޞަދުގައި ޢިލްމު އިންސްޓިޓިއުޓް ފޯ އިސްލާމިކް ސްޓަޑީސްގެ ފަރާތުން ކުރިއަށް ގެންދާ ޚާއްޞަ މަޝްރޫޢެކެވެ. މި މަޝްރޫޢުގެ ފިޒިކަލް ކުލާސްތައް މިވަގުތު ކުރިއަށް ދާނީ މާލޭގައި އެކަންޏެވެ. އޮންލައިން ކުލާސްތައް މުޅި ރާއްޖެއަށް އަމާޒުކޮށް ކުރިއަށް ގެންދެވޭނެއެވެ. ޢިލްމުގެ އަމާޒަކީ ރާއްޖޭގެ ކޮންމެ އަތޮޅެއްގައި ޢިލްމުގެ ފިޒިކަލް ޙިފްޒު ކެމްޕަސްއެއް ޤާއިމު ކުރުމެވެ.
ގިނަ އަދަދެއްގެ ބައިވެރިންނާއިއެކު ފަށާފައވާ މިމަޝްރޫޢުގެ ފުރަތަމަ ސެމިސްޓަރގެ ކިޔުން ނިންމި ބައިވެރިން ހާސިލްކޮށްފައިވާ މިންވަރާއިމެދު އުފާ ކުރައްވައި ޑރ.ޝަހީމް ކުރެއްވި ޓުވީޓުގައި ވިދާޅުވީ ޢިލްމު އިންސްޓިޓިއުޓުން ފެށި ޙާފިޒުން އުފެއްދުމުގެ މަޝްރޫޢު ކާމިޔާބުކަމާއެކު ކުރިއަށް ދިއުމަކީ ލިބޭ ވަރަށް މަތިވެރި އުފަލެއް ކަމަށެވެ. މަޝްރޫޢުގެ ފުރަތަމަ ސެމިސްޓަރ ނިމުން އިރު 8، 7، 6، 5؛ 4، ފޮތް ދަސްކޮށްފައިވާ ދަރިވަރުން ތިބިކަމީ ލިބޭ ވަރަށް ބޮޑު އުފަލެއްކަމަށް ޑރ.ޝަހީމް ވިދާޅުވިއެވެ.
ޢިލްމު އިންސްޓިޓިއުޓުން ފެށި ޙާފިޒުން އުފެއްދުމުގެ މަޝްރޫޢު ﷲ ގެ މަތިވެރި ރަޙުމަތުން ކާމިޔާބުކަމާއެކު ކުރިއަށް ދިއުމަކީ އަޅުގަނޑަށް ލިބޭ ވަރަށް މަތިވެރި އުފަލެއް. މަޝްރޫޢުގެ ފުރަތަމަ ސެމިސްޓަރ ނިމުން އިރު 8، 7، 6، 5؛ 4، ފޮތް ދަސްކޮށްފައިވާ ދަރިވަރުން ތިބި.
— Mohamed Shaheem Ali Saeed (@Mohamedshaheem1) July 11, 2022
މި މަޝްރޫޢަކީ ހަމައެކަނި ދަސްކޮށްދޭ މަޝްރޫޢެއްނޫނެވެ. ހިތު ދަސްކުރުމުގެ އިތުރުން، މި މަޝްރޫއުގައި ތަޖުވީދުގެ ހަމަތަކުން ރީތި ރާގުތަކަށް ހުނަރުވެރިކަމާއެކު ކިޔަވަން ދަސްކޮށްދެވޭނެއެވެ. ރާއްޖެއާއި ރާއްޖެއިން ބޭރުގެ ތަޖުރިބާކާރު ޙާފިޒުންނާއި މޮޅު ޤާރީންގެ ހުނަރުވެރިކަން ޙިއްސާކުރެވޭނެއެވެ.
މިޞްރު، ޖޯޑަން، ކުވައިތު، ސަޢުދީ ޢަރަބިއްޔާ، މެލޭޝިޔާ، އިންޑިއާ، ޕާކިސްތާން، އިންޑޮނޭޝިޔާ، މޮރޮކޯ ފަދަ ޤައުމުތަކުގެ ތަޖުރިބާކާރު އުސްތާޛުން އެކި މަރުޙަލާތަކުގައި މި މަޝްރޫޢުގެ ދަރިވަރުންނާ ބައްދަލުކުރާނެއެވެ. މި މަޝްރޫޢުގައި ދެ ޖިންސުގެ ޒުވާނުންނަށް ބައިވެރިވެވޭނެއެވެ. ކުލާސްތައް ކުރިއަށްދާނީ ވަކިންނެވެ.
