ރާއްޖެއަށް އަންނަ ތެޔޮ ޝިޕްމަންޓެއް އައުން ލަސްވުމާއި ގުޅިގެން، ވެލާނާ އިންޓަރނޭޝަނަލް އެއަރޕޯޓުން އެއަރލައިންތަކަށް ވިއްކާ ޖެޓް ފިއުލް ވިއްކުން ކޮންޓްރޯލް ކޮށްފިއެވެ.
އެއަރޕޯޓުން އެއަރލައިންތަކަށް ވިއްކާ ތެޔޮ ކޮންޓްރޯލް ކޮށްފައިވާކަން އެންމެ ފުރަތަމަ ހާމަވެފައިވަނީ، ވެލާނާ އިންޓަރނޭޝަނަލް އެއަރޕޯޓުން ތެޔޮ ވިއްކުން ކޮންޓްރޯލް ކޮށްފައިވާކަން އަންގާ، އެމްއޭސީއެލްއިން އެއަރަލައިންތަކަށް ފޮނުވާފައިވާ ސާރކިއުލާއެއް އާންމު ވުމާއި ގުޅިގެންނެވެ.
މި ސާކިއުލަރ އާންމު ވެފައިވަނިކޮށް، ރައްޔިތުންގެ މަޖިލިހުގެ ރައީސް މުހައްމަދު ނަޝީދުވެސް މިއަދުވަނީ، ޖެޓް ފިއުލް ލިބުމުގައި ދަތިކަން ކުރިމަތިވެ، މޯލްޑިވިއަންގެ ބައެއް ފްލައިޓްތައް މިއަދު ކެންސަލްކުރަން ޖެހިފައި ވާކަމަށް ވިދާޅުވެ އެމްޑީޕީގެ ގައުމީ މަޖިލިހުގެ ވަޓްސްއަޕް ގުރޫޕުގައި ލިޔުއްވާފައެވެ.
އެމްއޭސީއެލްގެ ފަރާތުން ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ، ޖެޓް ފިއުލް ލިބުމުގައި ކުރިމަތިވެފައިވާ ދަތިތަކުގެ ސަބަބުން އެއަރޕޯޓުން ވިއްކާ ޖެޓް ފިއުލް ވިއްކުން މިހާރުވަނީ ކޮންޓްރޯލް ކޮށްފައެވެ. މިގޮތުން މިހާރު ތެޔޮ ވިއްކަމުންދަނީ ފްލައިޓްތަކުން ދާންޖެހޭ މަންޒިލްތައް ބެލުމަށްފަހު ދާން ބޭނުންވާ މަންޒިލަށް ފޯރާވަަރަށް ސަމާލުކަން ދީގެންނެވެ.
މައުލޫމާތު ލިބިފައިވާ ގޮތުގައި ޖެޓް ފިއުލްގެ އަދަދު އެންމެ މަދުވެފައިވަނީ އައްޑޫ އެއަރޕޯޓާއި އަދި ކޫއްޑޫ އެއަރޕޯޓުގައެވެ. ނަތީޖާއެއްގެ ގޮތުން މި އެއަރޕޯޓުތަކުގެ ދަތުރުތަކުގެ ޝެޑިއުލްތަކަށް ވަނީ ބުރޫ އަރާފައެވެ.
