އިންޑިއާގެ ޓާޓާ ކުންފުނިން ކުރީގެ އޯޑިއޯން ބިމުގައި ތަރައްޤީކުރާ ލަގްޒަރީ އެޕާޓްމަންޓްތައް ގަތުމަށް ހުޅުވާލައިފިއެވެ.

މީގެ ހަފުތާއެއްހާ ދުވަސް ކުރިން މަސައްކަތް ފެށި އެ ފްލެޓްތައް ގަތުމަށް ހުޅުވާލިއިރު އޭގެ ތެރޭގައި ހިމެނެނީ އެއް ކޮޓަރި އާއި ތިން ކޮޓަރީގެ އެޕާޓްމަންޓްތަކެކެވެ.

"ލަގްޒަވަން – އޯޑިއޯން" ކޮމްޕްލެކްސްގެ އެންމެ ތިރިއާއި ފުރަތަމަ ފަންގިފިލާ ޚާއްސަކޮށްފައިވަނީ ވިޔަފާރީގެ ބޭނުމަށް ދޫކުރާ ސްލޮޓްތަކަށާއި، ސައިކަލް ޕާކުކުރުމަށެވެ. އަދި އެންމެ މަތި ޓެރެސްގައި ރޫފް ޓޮޕް ސުވިމިންގް ޕޫލާއި، އެންމެފަހުގެ ޒަމާނީ ވަޞީލަތްތަކާއެކު ތަރައްޤީކުރާ ޖިމަކާއި، ސްޕާގެ އިތުރުން ކުޑަކުދިން ކުޅޭ ސަރަޙައްދާއި، ވައިފައި ލައުންޖަކާއި ޔޯގާ ސެންޓަރެއް ހިމެނެއެވެ. ބާކީ 9 ފަންގިފިލާ ޚާއްސަކޮށްފައިވަނީ މީހުން ދިރިއުޅޭ އެޕާޓްމަންޓްތަކަށެވެ.

މި އެޕާޓްމަންޓްތަކުގެ ތެރެއިން އެއް ކޮޓަރީގެ އެޕާޓްމަންޓެއްގެ ބޮޑުމިނަކީ 415.17 އަކަފޫޓެވެ. މި ފްލެޓްތަކުގެ އަގު އުޅެނީ 2 މިލިއަން ރުފިޔާއާއި 2.1 މިލިއަން ރުފިޔާއާއި ދެމެދުގައެވެ. 3 ކޮޓަރީގެ އެޕާޓްމަންޓްތަކުގެ ތެރޭގައި 2 ސައިޒެއް ހިމެނެއެވެ. އެއީ 982 އަކަފޫޓުގެ އެޕާޓްމަންޓާއި، 1048.09 އަކަފޫޓުގެ އެޕާޓްމަންޓްތަކެވެ. މީގެ ތެރެއިން 982 އަކަފޫޓުގެ އެޕާޓްމަންޓެއްގެ އަގު އުޅެނީ 4.5 މިލިއަން ރުފިޔާއާއި 4.9 މިލިއަން ރުފިޔާއާއި ދެމެދުގައެވެ. އަދި 1048.09 އަކަފޫޓުގެ އެޕާޓްމަންޓްތަކުގެ އަގުތައް އުޅެނީ 5 މިލިއަނާއި 5.3 މިލިއަން ރުފިޔާއާއި ދެމެދުގައެވެ.

3 ކޮޓަރިއާއި މެއިޑްރޫމް ހިމެނޭ އެޕާޓްމަންޓަކުގެ ބޮޑުމިނަކީ 1141.85 އަކަފޫޓެވެ. މި އެޕާޓްމަންޓްތަކުގެ އަގުތައް އުޅެނީ 5 މިލިއަނާއި 6 މިލިއަން ރުފިޔާއާއި ދެމެދުގައެވެ. އޯޑިއޯންގައި ތަރައްޤީކުރާ އެޕާޓްމަންޓްތަކުގެ ތެރެއިން އެއް ކޮޓަރީގެ ތަންތަން ފިޔަވާ އެހެން ހުރިހާ އެޕާޓްމަންޓްތަކެއްވެސް ފަރުމާކޮށްފައިވަނީ ބެލްކަންޏެއްވެސް ހިމެނޭހެންނެވެ.

"ލަގްޒަވަން – އޯޑިއޯން"ގެ ނަމުގައި ޓާޓާއިން އޯޑިއޯން ބިމުގައި ތަރައްޤީކުރާ ލަގްޒަރީ އެޕާޓްމަންޓްތަކުގެ މަސައްކަތް ކުރަމުންދަނީ ރެއިންބޯ ކޮންސްޓްރަކްޝަނާއި ޙަވާލުކޮށްގެންނެވެ. އޯޑިއޯން ބިމުގައި ތަރައްޤީކުރަނީ 11 ފަންގިފިލާގެ ލަގްޒަރީ ކޮމްޕްލެކްސްއެކެވެ. މިތަނުގައި އެއް ކޮޓަރިއާއި، 3 ކޮޓަރީގެ އިތުރުން 3 ކޮޓަރިއާއި މެއިޑްރޫމް ހިމެނޭ އެޕާޓްމަންޓްތައް ހިމެނެއެވެ.

އޯޑިއޯނުން އެޕާޓްމަންޓް ގަންނަން ބޭނުންވާ ފަރާތްތަކަށް އެ ފުރުޞަތު މިހާރު ހުޅުވާލާފައިވާއިރު، ޑައުންޕޭމަންޓްގެ ގޮތުގައި މަދުވެގެން 100،000 (އެއްލައްކަ) ރުފިޔާ ދައްކަން ޖެހެއެވެ. އަދި ބާކީ ފައިސާ ދައްކަން ޖެހެނީ އެޕާޓްމަންޓްތަކުގެ މަސައްކަތް ކުރިއަށްދާ ވަރަކުން ބަހާލައިގެންނެވެ.

އެ އިމާރާތުގެ މަސައްކަތް އެއްކޮށް ނިމޭނެ ކަމަށް ލަފާކުރަނީ މާޗު 2025 އަށެވެ. މަސައްކަތް އެއްކޮށް ނިންމައި ހަވާލުކުރާއިރު ލިފްޓް ހަރުކޮށް، ފަރުނީޗަރު ވެސް ހުންނާނެއެވެ. އަދި އިމާރާތުގެ ތިރީގައި ފިހާރަތައް ހަދައި ފަސޭހައިން ވިޔަފާރިކުރެވޭނެ އިންތިޒާމު ހަމަޖައްސާނެ ކަމަށް އެ ކުންފުނިން ބުނެއެވެ.