މޫސުން ގޯސްވުމުގެ ސަބަބުން ލިބެމުންދާ ގެއްލުންތައް ބަލައި އަވަސް އެހީތެރިކަމެއް ފޯރުކޮށްދިނުމަށް ޕީޕީއެމްގެ ނާއިބު ރައީސް އަދި ނައިފަރު ދާއިރާގެ މެންބަރު އަޙްމަދު ޝިޔާމް ސަރުކާރަށް ގޮވާލައްވައިފިއެވެ.
ޝިޔާމް މިކަމަށް ގޮވާލެއްވީ ރާއްޖެއަށް މޫސުންގޯސްވެ އެކި ރަށްރަށް އުދައަރާ ގެއްލުން ލިބެމުންދާތީއެވެ. ޝިޔާމް ވިދާޅުވީ، މޫސުން ގޯސްވެ ރާއްޖޭގެ އެކިކަންކޮޅުތަކަށް އުދައަރާ ރައްޔިތުންގެ ގޯތިގެދޮރަށާ ދަނޑުބިންތަކާ މުދަލަށް ލިބެމުންދާ ބޮޑެތިގެއްލުންތައް ގާތުންބައްލަވާ އަވަސްއެހީތެރިކަން ފޯރުކޮށްދެއްވުމަށް ސަރުކާރަށް ގޮވާލާކަމަށެވެ.
މިކާރިސާއިން އަވަހަށް އަރައިގަތުމުގެ ހެޔޮތަޢުފީޤު މިންވަރުކުރައްވާށި..
– ޝިޔާމް ކުރެއްވި ޓްވީޓްގައި ވެއެވެ.
މޫސުން ގޯސްވެ ރާއްޖޭގެ އެކިކަންކޮޅުތަކަށް އުދައަރާ ރައްޔިތުންގެ ގޯތިގެދޮރަށާ ދަނޑުބިންތަކާ މުދަލަށް ލިބެމުންދާ ބޮޑެތިގެއްލުންތައް ގާތުންބައްލަވާ އަވަސްއެހީތެރިކަން ފޯރުކޮށްދެއްވުމަށް ސަރުކާރަށް ގޮވާލަން.މިކާރިސާއިން އަވަހަށް އަރައިގަތުމުގެ ހެޔޮތަޢުފީޤު މިންވަރުކުރައްވާށި.އާމިން pic.twitter.com/haXBqZZaHT
— Ahmed Shiyam (@Shiyamaldives) July 2, 2022
ރާއްޖޭގެ ރަށްރަށް އުދަ އަރަމުންދާއިރު މިހާތަނަށް އެންމެ ބޮޑު ގެއްލުމެއްވީ ގދ.މަޑަވެއްޔަށެވެ. އެރަށުގެ ގިނަ ގޭގެއަށް ފެންވަދެ ބޮޑެތި ގެއްލުންތަކެއް ވަނީ ލިބިފައެވެ. މިއާއެކު ރައީސް ވަނީ އެރަށުގެ ހާލަތު ބައްލަވާ އެހީތެރިކަން ފޯރުކޮށްދެއްވާނެކަމަށް ވިދާޅުވެފައެވެ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ބުނީ ރާއްޖޭގެ ބޮޑު ބަޔަކަށް ރެއިން ފެށިގެން މޫސުން ގޯސްވެފައިވާއިރު ރާއްޖޭގެ ބޮޑު ސަރަހައްދަކަށް ވައިގަދަވެ ކެރީގެ އަސަރުކުރަމުންދާ ކަމަށެވެ. ރޭ ދަންވަރުން ފެށިގެން މިއަދު ހެނދުނުވެސް ދެކުނާއި މެދުރާއްޖެތެރެ އަދި އުތުރުގެ ބައެއް ސަރަހައްދުތަކަށް އުދައިގެ އަސަރުކޮށްފައިވާކަމަށް އެ އޮތޯރިޓީން ބުނެއެވެ. އަދި އުތުރުގެ ރަށްތަކަށް އުދައިގެ އަސަރު ކޮންމެވެސް ވަރަކަށް ކުރި ނަމަވެސް އާންމުން ދިރިއުޅޭ ސަރަހައްދުތަކަށް އަސަރުކޮށްފައި ނުވާކަމަށް އެ އޮތޯރިޓީން ފާހަގަކުރެއެވެ.
ކޮންމެ އަހަރެއްގެވެސް ޖޫން ޖުލައިއަކީ ރާއްޖެއަށް ހުޅަނގު މޫސުމުގެ ވިއްސާރަ ކުރާ ދުވަސްވަރެކެވެ. މި ދުވަސްވަރު މޫސުން ގޯސްވެ ރަށްރަށަށް އުދަ އެރުމާއި، އަދި ވިއްސާރަވެ، ރަށްރަށުގައި ފެންބޮޑުވުމުގެ ގިނަ ޙާދިސާތައް ހިނގައެވެ.
