އުދަ އަރާ ގެއްލުންވެގެން ގިނަ ރަށްތަކަކުން ރިޕޯޓްކުރަމުންދާ ކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން ބުނެފިއެވެ.
އެންމެ ބޮޑަށް އުދައިގެ ސަބަބުން ގެއްލުން ވެފައިވަނީ ދެކުނުގެ ރަށްތަކަށެވެ. އުދަ އަރަމުންދަނީ މިއަދު މެންދުރުުން ފެށިގެންނެވެ. އުދަ އަރައިގެން މިހާތަނަށް އެންމެ ބޮޑު ގެއްލުމެއް ލިބުނުކަމަށް ޚަބަރު ލިބެނީ އައްޑޫ ސިޓީއަށެވެ.
އައްޑޫ ސިޓީގެ ކައުންސިލުން ބުނެފައިވަނީ އައްޑޫ ސިޓީގެ މަރަދޫއަށް ވަރަށް ބޮޑަށް އުދަ އަރަމުންދާކަމަށެވެ. ރާޅު އަރާ ގެއްލުންވުމުގެ ސަބަބުން ހަތަރު ވަރަކަށް ގެއިން މީހުން ހުސްކޮށްފައިވާކަމަށެވެ. މިގެތަކަށް ލޮނު ވަދެ އެ ގެތަކަށް ވަރަށް ބޮޑަށް ގެއްލުން ވަމުންދާކަމަށާއި، ފަރުނީޗަރާއި، އިލެކްޓްރޯނިކް ސާމާނާއި، ހިފާ ގެންގުޅޭ ތަކެއްޗަށްވެސް ވަރަށް ބޮޑަށް ގެއްލުން ލިބިފައިވާ ކަމަށެވެ.
ކައުންސިލުން މިހާރު ދަނީ، ގެއްލުން ލިބުނު ގެތަކުގެ ރައްޔިތުންނަށް އެހީވަމުންނެވެ. އެގޮތުން ތިން ހަތަރު ގެއިން މީހުން ހުސްކޮށް، އެމީހުންނަށް ވަގުތީ ބޯހިޔާވަހިކަން ފޯރުކޮށްދިނުމަށް ދަނީ މަސައްކަތް ކުރަމުންނެވެ.
ޑިޒާސްޓަރ މެނޭޖްމަންޓް އޮތޯރިޓީން ވިދާޅުވީ އައްޑޫގެ އިތުރުން، އެހެން ގިނަ ރަށްތަކަކުންވެސް އުދައަރައިގެން ރިޕޯޓް ކުރަމުންދާކަމަށެވެ. އެހެންކަމުން ކައުންސިލްތަކާއި ގުޅިގެން އެރަށްރަށުގެ ޙާލަތު ބަލަމުންދާ ކަމަށް އެ އޮތޯރިޓީން ބުނެއެވެ.
ރާއްޖޭގެ މޫސުން މިދުވަސްވަރު ގޯސްވާނެ ކަމަށް މެޓް އޮފީހުން ލަފާކުރެއެވެ. އެގޮތުން ރާއްޖޭގެ އެކި ސަރަޙައްދުތަކަށް ވިއްސާރަ ވުމާއި، އަދި ދިޔަވަރު ބޮޑުވާ ވަގުތުގައި އުދަ އަރާނެކަމަށް ލަފާކޮށް އެލަރޓްތައްވެސް ދަނީ ނެެރެމުންނެވެ. މޫސުން ގޯސްވެ ދިޔަވަރު ބޮޑުވާ ގަޑިތަކުގައި ރާޅުގެ އުސްމިން 4 ފޫޓާއި 7 ފޫޓަށް ހުންނާނެއެވެ.
