މިހާރު އޮތް ކޯލިޝަންގެ ވެރިކަމަކީ ވެރިކަން ކުރާ މައި ޕާޓީ އެމްޑީޕީގެ ފިކުރާއި ވިސްނުމުގައި ހިނގާ ވެރިކަމެއް ނޫންކަމަށް ރައްޔިތުންގެ މަޖިލީހުގެ ނައިބް ރައީސް އީވާ ވިދާޅުވެއްޖެއެވެ.
އީވާ މިހެން ވިދާޅުވީ ޤާނޫނު އަސާސީއަށް އަހުމަދު ތޯރިގު ހުށަހެޅުއްވި އިސްލާހަށް ބަހުސް ކުރައްވަމުންނެވެ. ތޯރިގު ހުށަހެޅުއްވި އިސްލާހަކީ ޖޭއެސްސީގެ ކޮމްޕޮޒިޝަން ބަދަލު ކުރުމަށް ހުށަހެޅި އިސްލާހެކެވެ. މި އިސްލާހަށް ވާހަކަ ދައްކަވަމުން އީވާ ވިދާޅުވީ ޖޭއެސްސީއަށް އިސްލާހު ގެންނައިރު ޤާނޫނު އަސާސީއަށްވެސް އިސްލާހު ގެނައުމަކީ މުހިންމު ކަމެއްކަމަށެވެ.
މިހާރުއޮތް ވެރިކަމުގެ ނިޒާމަކީ އޮޅުން ބޮޑުން ގަނޑެއްގެ ތެރެއިން ހެޔޮ ވެރިކަމެއް ކޮށްދެވޭނެ ނިޒާމެއް ނޫންކަމަށް އީވާ ވިދާޅުވިއެވެ. މިވެރިކަމަކީ އެމްޑީޕީގެ ކޯލިޝަނެއް ނަމަވެސް ކޯލިޝަންގައި އެމްޑީޕީގެ ދައުރު ކުޑަކަމަށް އޭނާ ވިދާޅުވިއެވެ. އަދި ސަރުކާރު ހިނގަމުންދަނީ އެމްޑީޕީގެ ވިސްނުމާއި ފިކުރާއި އެއްގޮތަށް ނޫންކަމަށް އީވާ ވިދާޅުވިއެވެ.
ވެރިކަން އެބައޮތް، ކޯލިޝަން އެބައޮތް، އެހެން ނަމަވެސް މިކޯލިޝަންގައި ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އޮތީ މާކަ ހިތްހަމަ ޖެހިގެންކަން ބުނެވޭކަށް ނެތް. ރައީސް ނަޝީދަކީ އެމްޑީޕީގެ މިވެރިކަން ކުރާ ކޯލިޝަންގެ ބޮޑު ހިއްސާ އޮތް ޕާޓީގެ ރައީސް. މަނިކުފާނު މިޕާޓީގެ ހިއްސާ ވެރިކަމުގެ ތެރޭގައި އޮތް މިންވަރާއި ދޭތެރޭގައި ހިތްހަމަ ޖެހިވަޑައި ނުގަންނަވާކަން އެއީކީއެއް ސިއްރެއްނޫން.
މިވެރިކަމުގެ ތެރޭގައި ހިއްސާ އޮތްމިންވަރާމެދު ގަޔާނުވާކަމަށް އީވާ ވިދާޅުވިއެވެ. އަދި މިވެރިކަމަކީ އެމްޑީޕީގެ ވިސްނުމުގައި ހިނގާ ކޯލިޝަން ވެރިކަމެއް ނޫންކަމަށްވެސް އީވާ ވިދާޅުވިއެވެ. އަދި މިހާރު ވެރިކަންދާ ގޮތަކުން އެއްދުވަހު އިރުއަރާއިރު މިއީ އެމްއާރުއެމްގެ ވެރިކަމެއްކަމަށްވެސް ސިފަވާކަމަށެވެ. އަދި އިރުއޮއްސޭއިރު މިއީ ޖުމްހޫރީ ޕާޓީގެ ވެރިކަމެއްހެންވެސް ހީމާކަމަށެވެ. ވެރިކަން އޮތީ ބޮޑު އޮޅުން ސުވާލު ގަނޑެއްގެ ތެރޭގައިކަމަށް އީވާ ވިދާޅުވިއެވެ.
އީވާ ވިދާޅުވީ މިހުރިހާ ކަމެއް ދިމާވަނީ މިހާރު އޮތް ނިޒާމުގެ ތެރެއިންކަމަށެވެ. ރިޔާސީ ނިޒާމުގެ ތެރެއިން ހެޔޮ ވެރިކަމެއް ހޯދުމަކީ ކުރެވޭނެ ކަމެއް ނޫންކަމަށް އީވާ ވިދާޅުވިއެވެ. އޭނާ ވިދާޅުވީ ރައްޔިތުން ވޯޓު ނުދޭ ބަޔަކަށް ވެރިކަމުގެ ޕަސެންޓު ދީގެން ވެރިކަން ކުރުމަކީ ފަސޭހަ ކަމެއް ނޫންކަމަށެވެ.
