މަޑަވެލި-ހޯނޑެއްދޫ މަރުކަޒީ އިންޖީނުގެ ބިންގާ އެޅުމަށް ބޭއްވި ހަފްލާ ގދ. އަތޮޅު ކައުންސިލުން ރައީސް ހަސަން ފައިހަތު ގުދުރަތުﷲ ބޮއިކޮޓުކޮށްފިއެވެ.
ކޯޒްވޭއަކުން ގުޅުވާލާފައިވާ މި ދެރަށުގެ ސަރަހައްދީ އިންޖީނުގެ ބިންގާ އެޅުމަށް ބޭއްވި ހަފްލާއަށް ފެނަކައިން ވަނީ ދައުވަތު ދީފައިކަމަށް މައުލޫމާތު ލިބެއެވެ. އަދި ދި ދައުވަތު ގަބޫލުކޮށް އެހަފްލާގައި ބައިވެރިވުމަށް ފައިހަތުއާއި އެކައުންސިލްގެ ޓީމެއް ވަނީ އެހަފްލާގައި ތިނަދޫއިން ބައިވެރިވާ ޓީމަކާއި އެކު އަތޮޅު ކައުންސިލްގެ ލޯންޗެއްގައި މަޑަވެއްޔަށްވެސް ގޮސްފައިވެއެވެ. ނަމަވެސް އެ ސަރަހައްދަށް ފައިހަތު ވަޑައިގަތުމަށްފަހު އެމްޑީޕީގެ ދިދަ ހުރުމުން ހަފްލާ ބޮއިކޮޓުކުރީކަމަށް އެކަމުގެ މައުލޫމާތު އިނގޭ މީހަކު ކިޔައިދިނެވެ.
ފައިހަތު ވިދާޅުވީ އެ ހަފްލާ ބޮއިކޮޓްކުރީ ސަރުކާރުން ޢާންމުނަށް ކޮށްދޭ ޒަރޫރީ ކަންކަމުގައި ޕާޓީގެ ދިދަ ބޭނުންކޮށްގެން ވާނެކަމަށް ނުދެކޭތީކަމަށެވެ. ފައިހަތުގެ އިތުރުން އެހެން ބައެއް ފަރާތްތަކުންވެސް އެ ހަފްލާ ބޮއިކޮޓްކޮށްފައިވެއެވެ. އޭގެ ތެރޭގައި މަޑަވެލި ކައުންސިލްގެ ރައީސާއި ނައިބް ރައީސް، މެންބަރުންގެ އިތުރުން ޑަބްލިޔު.ޑީ.ސީގެ މެންބަރުންވެސް ހިމެނެއެވެ.
