މާލެ އަތޮޅުގެ 9 ރަށުގެ އިޖްތިމާއީ އަދި އިޤްތިސާދީ އެކިއެކި މައުލޫމާތުތަށް އާންމުންނަށް ފޯރުކޮށްދިނުމަށް 3 އޮންލައިން މީޑިއާއަކާއެކު މާލެއަތޮޅު ކައުންސިލިން އެއްބަސްވުމެއްގައި ސޮއިކޮށްފިއެވެ.
ތުލުސްދޫގައި ހުންނަ މާލެއަތޮޅު ކައުންސިލްގެ އިދާރާގައި އިއްޔެ ބޭއްވި ރަސްމިއްޔާތެއްގައި އެކައުންސިލުން އެއްބަސްވުމަކަށް އައިސްފައި ވަނީ ޚަބަރު އޮންލައިންގެ އިތުރުން އޮންލައިން ނޫސް "ވޮއިސް" އާއި އޮންލައިން ނޫސް "ދެން" އާއެކުއެވެ.
ބީލަން އުސޫލުން 3 މީޑިއާ ޕާޓްނަރުން ނެގުމަށް އެކައުންސިލުން ހިޅުވާލި ފުރުސަތުގައި ބިޑް ހުށަހަޅާފައިވަނީވެސް މި 3 އޮންލައިން މީޑިއާއެވެ.
މިކަމާ ގުޅޭގޮތުން އެ ކައުންސިލްގެ ރައީސް މުހައްމަދު ނިމާލް ވިދާޅުވީ، މިފަދަ އެއްބަސްވުމެއްގެ ބޭނުމަކީ މާލެ އަތިޅުގެ ރަށްތަކުގައި ހިނގާ ހާއްސަ އެކިއެކި ކަންކަން އާންމުނާ ހަމައަށް ގެނެސްދެވޭނެ ފަސޭހަ ގޮތްތަކެއަ ހަމަޖެއްސުން ކަމަށެވެ. އަދި މި އެއްބަސްވުންތަކާއެކު 3 މީޑިއާއިން ވެސް މާލެ އަތޮޅުގެ ރަށްރަށުގައި ހިނގާ އިޖްތިމާއީ ކަންކަމާއި އިޤްތިސާދީ ހަރަކާތްތަކުގެ މައުލޫމާތު ގެނެސް ދެވޭނެ ކަމަށް ނިމާލް ވިދާޅުވިއެވެ. އަދި މިކަމަކީ އެއްވެސް ވަރަކަށް ސިޔާސީ ކަމެއް ނޫން ކަމަށާއި ސިޔާސީ އެއްވެސް ޚަބަރެއް މި އެއަބަސްވުމުގެ ދަށުން އާންމުންނާ ހަމައަށް ނުގެނެސްދޭނެ ކަމަށްވެސް ނިމާލް ވިދާޅުވިއެވެ.
ނިމާލް ވިދާޅުވީ ކައުން ސިލްތަކަށް މިހާރު ލިބިދީފައިވާ ބާރުތަކުގެ ތެރެއިން މިފަދަ ގޮތަކަށް މައުލޫމާތު ހިއްސާކުރެވޭނެ ފަދަ އެއްބަސްވުންތަކެއް އެކުލަވާލި ފުރަތަމަ ކައުންސިލަކަށް މާލެ އަތޮޅު ކައުންސިލް ވެގެން ދާނެކަމަށެވެ.
