ދިވެހި ރައްޔިތުންނަކީ މިނިވަންކަމާއި އުފަލުގަ ދިރިއުޅެމުން އައި ބައެއްކަމަށާއި، މިއަދު ބަޔަކު މީހުން މިރާއްޖޭގައި ޔޯގާ ހެދުމާއި ކަސްތަރަތު ކުރުމަކީ އިސްލާމް ދީނާއި ޚިލާފް ކަމެއްކަމަށް ބުނެ އާންމު ދިރިއުޅުމަށް ބުރޫ އަރުވާން ފަށައިފިނަމަ، ދެން އެދަނީ ސަލާމަތުގެ އައްސޭރިއަކަށް ނޫންކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅު ވެއްޖެއެވެ.

ނަޝީދު މިހެން ވިދާޅުވީ އެމްޑީޕީއަށް 17 އަހަރު ފުރުން ފާހަގަ ކުރުމަށް މިއަދު ބޭއްވި ދިދަ ނެގުމުގެ ރަސްމިއްޔާތަށްފަހު މި ރަސްމިއްޔާތަށް ވަޑައިގެންނެވި އެމްޑީޕީގެ އިސް ބައެއް ފަރާތްތަކާ މުޚާތަބުކޮށް ވާހަކަ ދައްކަވަމުންނެވެ.

މި ރަސްމިއްޔާތުގައި ވާހަކަ ދައްކަވަމުން ނަޝީދު ވިދާޅުވީ، ގައުމުތައް ހަލާކުގެ އައްސޭރިއަށް ދިޔަތަންވެސް ފެނިފައިވާ ކަމަށާއި، ގައުމުތައް ބާކީވެ އެކަހެރިވެގެން ދިޔަތަންވެސް ފެނިފައި ވާކަމަށެވެ. އަދި އެ ހާލަތަށް ރާއްޖެ ދިއުމަށް ޖާގަ ދެވިގެން ނުވާނެކަމުގައި ވިދާޅުވަމުން ނަޝީދު ވިދާޅުވެފައި ވަނީ، ރާއްޖޭގެ ރައްޔިތުން އެދޭ ދިވެހި ރާޖެއެއް ހޯދާ ދިނުމަކީ އެމްޑީޕީގެ އަބަދުގެވެސް އަމާޒު ކަމުގައެވެ.

ނަޝީދު ވިދާޅުވި ގޮތުގައި ކުރިޔަށް އޮތް ތަނުގައިވެސް އެމަގުސަދު ހާސިލް ކޮށްދޭނެ ޕާޓީއަކީ އެމްޑީޕީ ކަމުގައެވެ.

ޔޯގާއަކީ ހަރާމް ކަމެއްކަމަށް ބުނުމަކީ ސަލާމަތުގެ އައްސޭރިއަށް ދެވޭނެ މަގެއް ނޫންކަމުގައި ނަޝީދު ވިދާޅުވެފައި ވާއިރު، މިމަހުގެ 21ވަނަ ދުވަހު ގަޅޮޅު ދަނޑުގައި ޔޯގާ އިވެންޓް ޔޫތު މިނިސްޓްރީން ބާއްވާފައިވަނީ އެ ހަރަކާތް ބޭއްވުން އިސްލާމިކް މިނިސްޓްރީން މަނާކޮށްފައި ވަނިކޮށެވެ.

ބައިނަލްއަގުވާމީ ޔޯގާ ދުވަސް ފާހަގަކުރުމަށް އިންޑިއަން ކަލްޗްރަލް ސެންޓަރާއި ޔޫތު މިނިސްޓްރީ ގުޅިގެން ބާއްވަން ނިންމި ޔޯގާ ހަރަކާތް ހުއްޓުވަން އިސްލާމިކް މިނިސްޓްރީން އެންގި އެންގުމަށް ފުލުހުން އަމަލުކޮށްފައެއްނުވެއެވެ. އެ ހަރަކާތް ކުރިއަށްދިޔަވަގުތު އެކަމަކީ ހަރާމް ކަމެއްކަން ބަޔާންކޮށްދިނުމުގެ ގޮތުން އިލްމުވެރީން ކަމަށްވާ އާދަމް ނިޝާމާއި މުޙައްމަދު ފަޒްލޫން ވަނީ ގަލޮޅު ދަނޑު ކުރިމަތީ ހަރަކާތްތެރިވެވަޑައިގެންފައެވެ. އެ ދެ ބޭފުޅުން ހަރަކާތްތެރިވީ އެކަމާ ދެކޮޅަށް ޒުވާނުންގެ ބަޔަކު ކުރި އިހްތިޖާޖެއްގެ ތެރޭގައެވެ.

އެކަމަކީ އިސްލާމްދީނުގައި ހަރާމްކަމެއް ކަމަށް އެ ދެ ބޭފުޅުން ބަޔާންކޮށްދެއްވަމުން ދަނިކޮށް، އިހްތިޖާޖުގައި ބައިވެރިވި ޒުވާނުންގެ ލޭކެކި ގަލޮޅު ދަނޑަށް ގަދަކަމުން ވަދެ ހަމަނުޖެހުން ހިންގައި އެ ހަރަކާތް ވަނީ ހުއްޓުވާފައެވެ. ނަމަވެސް އެ ވަގުތު އެ ހަމަނުޖެހުން ކޮންޓްރޯލް ކުރުމަށް އެކަށީގެންވާ މަސައްކަތެއް ފުލުހުން ކޮށްފައެއް ނުވެއެވެ. އެ ހަމަނުޖެހުންތަކާ ގުޅިގެން 19 މީހަކު މިހާތަނަށް ވަނީ ހައްޔަރުކޮށްފައެވެ. އޭގެތެރޭގައި ޝައިޚް ނިޝާނާއި ފަޒްލޫން ވެސް ހިމެނިވަޑައިގަންނަވައެވެ.