ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަކީ ޢިލްމުވެރިންގެ އަޑު އައްސަވާ ބޭފުޅެއްކަމަށާއި، ނަމަވެސް ޔޯގާ މައްސަލާގައި ރައީސުލްޖުމްހޫރިއްޔާ އިލްމުވެރިން ދައްކަވަމުން ގެންދެވި ވާހަކަތައް އަޑުނީވުނު ކަމަށް ދީނީ އިލްމުވެރިޔާ ޝައިޚު ޑރ.އިޔާޒު ވިދާޅުވެއްޖެއެވެ.
ގަލޮޅު ރަސްމީ ދަނޑުގައި އިއްޔެ ހެނދުނު ކުރިއަށްދިޔަ ޔޯގާ ހަރަކާތައް ހުރަސް އަޅައި އެ ހަރަކާތުގައި ބައިވެރިވި ބޭރު ގައުމުތަކުގެ ސަފީރުންނާއި ޑިޕްލޮމެޓުން އަދި އާންމުންނާ ދެކޮޅަށް، ބިރުވެރިކަން އުފެދޭ ގޮތަށް އެތަނަށް ބަޔަކު ވަދެގަނެ ބައެއް މީހުންނަށް ހަމަލާދީ، ތަކެއްޗަށް ގެއްލުން ވަނީ ދީފައެވެ. ޔޯގާ ދުވަހުގެ ގޮތުގައި އިއްޔެ ފާހަގަ ކުރަން އުޅުނު ދުވަހަކީ ދިނީ ގޮތުން ފާހަގަކުރުން އެހާ ރަނގަޅު ދުވަހެއް ނޫންކަމަށް އިލްމުވެރިން ދިޔައީ ތަކުރާރުކޮށް ވިދާޅުވަމުންނެވެ.
ސަރުކާރު ކޯލިޝަންގައި ހިމެނޭ އަދާލަތު ޕާޓީއަށް ނިސްބަތްވާ ޑރ.އިޔާޒު ވިދާޅުވީ ރައީސް އިބްރާހިމް މުހައްމަދު ޞާލިހަކީ މަޝްވަރާ އަށް ލޯބިކުރައްވާ އަދި ކަމުގެ ތަޖްރިބާހުރި ބޭފުޅުންގެ ނަޞޭޙަތް އަޑުއައްސަވާ ބޭފުޅެއްކަމަށެވެ. ނަމަވެސް ޔޯގާގެ މައްސަލާގައި ޢިލްމުވެރިން އިޚްލާޞްތެރިކަމާއިއެކު ދައްކަމުންގެންދެވި ވާހަކަތައް އިވިވަޑައެއް ނުގެންނެވި ކަމަށާއި، މިކަމުގެ ނަތީޖާ ފެނިގެންދިޔައީ ވަރަށް ހިތިކޮށް ކަމަށް ޑރ.އިޔާޒު ވިދާޅުވިއެވެ.
އަޅުގަނޑުމެން އެއްވެސް މީހަކު ދެކެން ބޭނުންނުވާ އަދި އަޑުއަހަން ފަސޭހަނޫން އެތައްކަމެއް ހިނގައި ނިމިއްޖެ. އުއްމީދަކީ ކުރިމަގުގައިވެސް ދީނީ ޢިލްމުވެރިން ދެއްވާ އިރުޝާދުގެ ބޭނުން ފުރިހަމަ ގޮތުގައި ހިއްޕެވުން. ޢިލްމުވެރިން ލަފާ އަރުވަނީ ދުނިޔަވީ މަންފާއެއް ބޭނުންވެގެންނެއް ނޫން. މާތްވި އިސްލާމްދީނާއި ޤައުމުގެ ޙައްޤުގައި. އެކަން ޔަޤީން ކުރައްވާ.
– ޑރ.އިޔާޒު ވިދާޅުވިއެވެ.
ބައިނަލްއަޤްވާމީ ޔޯގާ ދުވަސް ފާހަގަކުރުމަށް އިއްޔެ ބޭއްވި ހަރަކާތް ހުއްޓުވައި ހިންގި ހަމަނުޖެހުން ސަރުކާރުން އަންނަނީ ތަޙްޤިގުކުރުމުންނެވެ. މިގޮތުން މިކަމުގައި ޝާމިލްވާ މީހުން ކޯޓު އަމުރުގެދަށުން މިހާރު އަންނަނީ ހައްޔަރުކުރަމުންނެވެ. މިހާތަނަށް މިމައްސަލާގައި ވަނީ 9 މީހަކު ހައްޔަރު ކޮށްފައެވެ. އޭގެ ތެރޭގައި ދީނީ އިލްމުވެރިޔާ ޝައިޚު ފަޒުލޫންވެސް ހިމެނި ވަޑައިގަންނަވައެވެ.
ޔޯގާގެ ހަމަނުޖެހުމާއި ގުޅިގެން ރައީސް ޞާލިހު ވިދާޅުވެފައިވަނީ މިމައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީކޮށް، މިކަމުގައި ޝާމިލުވާ އެންމެން ޤާނޫނުގެ ކުރިމައްޗަށް ގެންނާނެކަމަށެވެ.
One Response
ބަލަން ޖެހޭނީ ސީރިޔަސް މައްސަލައެއްގެ ގޮތުގައިތާ އަޅުވެތިކަން ބޮޑުވީމަ ގެރިމޯދީ ރުއްސަން އެބަޖެހޭ ވިއްޔަ ގައުމުގަ ތިބި ޝައިޚުން ހައްޔަރު ކުރަން. މޯދީ އެންމެ އުފާވާ ކަމަކީ މުސްލިމުން ހައްޔަރުކޮށް އެމީހުނަށް އަދަބުދިނުމުން ކަމަށްވަނީ.
ރަސޫލާއަށް ފުރައްސާރަ ކުރުން ކަމަކަށް ނުވެފަ އދ.ހެދި ގަވައިދަކަށް ހުރުމަތްތެރިކޮށް ނުހިތީމަ މޯހުން ހިފާ ހައްޔަރު ކުރަނީ. ލާދީނީ ވީމަ މިފަދަ ހުރިހާ ކަމެއްވެސް ހިނގާނެ