ބައިނަލްއަގުވާމީ ޔޯގާ ދުވަސް ފާހަގަ ކުރުމަށް ގަލޮޅު ދަނޑުގައި މިއަދު ބޭއްވި އިވެންޓް ހުއްޓުވުމުގައި ސަލަޖަމިއްޔަތުއް ސަލަފުގެ އެއްވެސް ބައިވެރިވުމެއް ނޯންނާނެ ކަމަށް އެ ޖަމިއްޔާ އިން ބުނެފިއެވެ.
މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓާއި، ރާއްޖޭގައި ހުންނަ އިންޑިއާ އެމްބަސީން އިންތިޒާމްކޮށްގެން މިއަދު ހެނދުނު 06:30ގައި ބޭއްވި ހަރަކާތާއި ދެކޮޅަށް ބަޔަކު ވަނީ އެސަރަހައްދަށް އެއްވެސް އަޑުއުފުލާފައެވެ. އަދި ފުލުހުންގެ ބެރިކޭޑްސްތައް ފޫއަޅުވާލައި އެއްވުމުގެ ބައިވެރިންވަނީ ގަލޮޅު ދަނޑަށް ވަދެ، އެ ހަރަކާތް ހުއްޓުވާފައެވެ.
ޔޫތު މިނިސްޓަރ އަހުމަދު މަހުލޫފް ވަނީ މިހަރަކާތް ހުއްޓުވުމަށް ހިންގި ހަމަނުޖެހުންތަކުގައި އިދިކޮޅު ޕީޕީއެމް އަދި ސަލަފް ޖަމިއްޔާއަށް ތުހުމަތުކޮށް ވާހަކަދައްކަވާފައެވެ. އެކަން ސަލަފް ޖަމިއްޔާއިން ވަނީ ކުށްވެރިކޮށްފައެވެ.
އެ ޖަމިއްޔާ އިން ބުނީ ރާއްޖޭގައި ޔޯގާގެ ކަންކަން ހިންގަން ފެށި ހިސާބުން ފެށިގެން އަބަދުވެސް އެކަމުގެ ހުކުމާ މެދު ރައްޔިތުން ހޭލުންތެރިކުރުމަށްއެ ޖަމިއްޔާއިން މަސައްކަތްކުރަމުންދިޔަ ކަމަށެވެ. އެކަމަކު އެ ޖަމިއްޔާއަކީ އެއްވެސް ހާލެއްގައި ޝަރުއީ ހުދޫދުން ބޭރުން ގައުމުގެ އަމަން އަމާންކަން ނަގާލައި ފަރުދުންނާއި ދައުލަތުގެ މުދަލަށް ގެއްލުންދީ ގައުމުގެ ސަލާމަތް ބަލަހައްޓާ ފަރާތްތަކާ ކުރިމަތިލާ ހިންގާ "ވަޔަލެންޓް" ހަރަކާތްތަކަށް ތާއީދުކުރާނެ ބައެއް ނޫން ސަލަފުން ބުންޏެވެ.
މަދަނީ ޖަމިއްޔާތަކުގެ ބެލެނިވެރިކަމުގެ މަގާމުގައި ހުންނަވައި ކަމުގެ ހަގީގަތް ބެލުމެއް ނެތި މިފަދަ ނުރައްކާތެރި ތުހުމަތެއް ކުރެއްވުމަކީ ޖަމިއްްޔަތުއް ސަލަފާ މެދު ރައްޔިތުންގެ ހިތްތަކުގައި ނަފްރަތު އުފެއްދުމުގެ ބޭނުމުގައި ކޮށްފައިވާ ވަރަށް ޒިންމާދާރުކަން ކުޑަ ނާތަހުޒީބް އަމަލެއްކަމުގައި އަޅުގަނޑުމެން ދެކެން.
– ސަލަފުން ބުނެފައިވެއެވެ.
މިހަރަކާތަށް ހުރަސް އަޅައި، ހިންގި ހަމަނުޖެހުންތަކާ ގުޅިގެން ރައީސުލްޖުމްހޫރިއްޔާ ކުރެއްވި ޓުވީޓުގައި ވިދާޅުވީ މިމައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީކޮށް، މިކަމުގައި ޝާމިލުވާ އެންމެން ޤާނޫނުގެ ކުރިމައްޗަށް ގެންނާނެކަމަށެވެ.
މި މައްސަލައާއި ގުޅިގެން ފުލުހުން ވަނީ މުޒާހަރާގެ ތެރެއިން 6 ފިރިހެނަކު ހައްޔަރުކޮށްފައެވެ. އަދި މި މައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނަކަމަށްވެސް ފުލުހުން ވަނީ ވިދާޅުވެފައެވެ. މި ހަރަކާތް ހުއްޓުވިއިރު ޔޫތު މިނިސްޓަރ އަޙްމަދު މަޚްލޫފާއި، އިންޑިއާ ހައިކޮމިޝަނަރާއި ބޭރު ޖަމްޢިއްޔާތަކުން ރާއްޖެއަށް ކަނޑައެޅުއްވި ބައެއް މަންދޫބުންވެސް އެތަނުގައި ތިއްބެވިއެވެ.
