ޔުއެފާ ނޭޝަންސް ލީގުގައި ޔޫރަޕްގެ ޗެމްޕިއަން އިޓަލީ އަތުން 5-2 އިން ޖަރުމަނު ބޮޑު މޮޅެއް ހޯދައިފިއެވެ.
ރޭގެ މެޗުގެ ފުރަތަމަ ހާފް ޖަރުމަނުން ނިންމާލީ ޔޯޝުއާ ކިމިކް އާއި އިލްކާއި ގުންޑޮގާންގެ ޖެހި ގޯލްތަކުން ދެ ލަނޑުގެ ލީޑަކާ އެކު އެވެ. ހާފު ނިމެނިކޮށް ގުންޑޮގާން ކާމިޔާބުކުރި ލަނޑަކީ ލިބުނު ޕެނަލްޓީއަކުން ޖެހި ލަނޑެކެވެ. ޖަރުމަނުގެ ތިންވަނަ ލަނޑު 51 ވަނަ މިނިޓުގައި ޖަހައިދިނީ ތޯމަސް މުލާ އެވެ. އަދި 68 ވަނަ މިނިޓުގައި ޓިމޯ ވާނާ ވަނީ ގާތްގާތުގައި ދެ ލަނޑު ޖަހައި ފަސް ލަނޑުގެ ލީޑެއް ނަގައިދީފައެވެ.
އިޓަލީގެ ފުރަތަމަ ލަނޑު 78 ވަނަ މިނިޓުގައި ޖެހީ ސްވިޒަލެންޑުގެ ޒިއުރިކަށް ކުޅޭ 18 އަހަރުގެ ފޯވާޑް ވިލްފްރެއިޑް ޖިއޯންޓޯއެވެ. އަދި އިތުރު ވަގުތުގައި ދެވަނަ ލަނޑު ޖަހައިދިނީ ޑިފެންޑަރު އަލެސަންދްރޯ ބަސްޓޯނީއެވެ. މިއީ ނޭޝަންސް ލީގުގައި މިއަހަރު އިޓަލީ ބަލިވި ފުރަތަމަ މެޗެވެ. އެޓީމު އޮތީ ފަސް ޕޮއިންޓާ އެކު ގުރޫޕުގެ ތިންވަނައިގައެވެ.
މިއީ މި ފަހަރުގެ ނޭޝަންސް ލީގުގައި ޖަރުމަނުގެ ފުރަތަަމަ މޮޅެވެ. ޖަރުމަނުން ފުރަތަމަ ތިން މެޗު ވެސް ވަނީ އެއްވަރުވެފަ އެވެ. ޖަރުމަނުގެ ކޯޗުކަމާ ހަންސީ ފްލިކް ހަވާލުވި ފަހުން އެ ޓީމު މި ވަނީ ބަލިނުވެ، 13 މެޗު ފުރިހަމަކޮށްފައެވެ.
