ޔުއެފާ ނޭޝަންސް ލީގުގެ ގްރޫޕް ޑީގައި ބެލްޖިއަމާ ދެކޮޅަށް ކުޅުނު މެޗު ނެދަލެންޑްސްއިން ކާމިޔާބުކޮށްފިއެވެ.
ބެލްޖިއަމްގެ ދަނޑުގައި ކުޅުނު މި މެޗުން ނެދަލެންޑްސް މޮޅުވީ 1-4ންނެވެ. މި މެޗުގައި ރަނގަޅަށް ކުޅެފައިވަނީ ނެދަލެންޑްސްއިންނެވެ. އެ ޓީމުން މެޗުގައި ލީޑު ނެގީ 40 ވަނަ މިނެޓުގައެވެ. ފްރެންކީ ޑި ޔޯން ތަނަވަސްކޮށްދިން ފުރުސަތެއްގައި މި ލަނޑު ޖެހީ ސްޓީވެން ބާގްވެއިންއެވެ. ނެދަލެންޑްސްގެ އަނެއް ތިން ލަނޑު އެ ޓީމުން ޖެހީ ދެ ވަނަ ހާފުގައެވެ.
ދެ ވަނަ ހާފުގައި މެމްފިސް ޑިޕާއިގެ ދެ ގޯލާއި ޑެންޒެލް ޑަމްފްރީސް ޖެހި ގޯލުން ނެދަލެންޑްސް ހަތަރު ގޯލަށް ލީޑުފުޅާކުރިއެވެ. މީގެ އިތުރުން ވެސް މި މެޗުގައި ނެދަލެންޑްސް އަށް ގޯލު ޖަހަން ހުސް ފުރުސަތުތައް ލިބުނެވެ. ބެލްޖިއަމްގެ ޓިމޮތީ ކަސްޓާންޏާ ޖެހި ގޯލެއް ވީއޭއާރް އިން ބަލައިނުގަންނަން ނިންމިއިރު، އެ ޓީމުން ގޯލެއް ޖަހަން ކުރި މަސައްކަތް މެޗުގެ އިތުރު ވަގުތުގައި ކާމިޔާބުކުރި އެެވެ. މި ލަނޑު ޖެހީ ބަދަލަކަށް ކުޅެން ނުކުތް މިޝީ ބަޓްޝުއާޔީއެވެ.
މި ގްރޫޕްގެ އަނެއް މެޗުގައި މި މަހު އެއް ވަނަ ދުވަހު ޕޮލެންޑުން ވަނީ 2-1 އިން ވޭލްސް ބަލިކޮށްފައެވެ. ގްރޫޕްގެ އެއް ވަނަ މަގާމުގައި އޮތީ ނެދަލެންޑްސްއެވެ. ދެ ވަނަ މަގާމުގައި އޮތީ ޕޮލޭންޑެވެ. ތިން ވަނައިގައި ވޭލްސް އޮތްއިރު، ފުލުގައި އޮތީ ބެލްޖިއަމެވެ.
