ހަށިގަނޑުގެ ރީތިކަމަކީ އަހަރެމެން އިންސާނުން އެކަމަކަށްޓަކައި އެންމެ ބޮޑު ސަމާލުކަމެއްދޭ އެއްކަންތަކެވެ. ހަންގަނޑު އޮމާންކޮށް ތާޒާކޮށް ބެހެއްޓުމަށްޓަކައި އާމްދަނީގެ ބޯޑު ބައެއް ހޭދަކުރާ މީހުންވެސް މަދެއްނޫނެވެ. އެހެން ނަމަވެސް އެފަދަ އަގުބޮޑެތި އެއްޗެހި ހޯދޭނެ ފެންވަރު ނެތް މީހުންނަކީ ހަށިގަނޑާ ދޭތެރޭގައި އެމީހުންފަދައިން ނުވިސްނާ ބައެއް ނޫނެވެ.

މިއަދު މި ގެނެސްދެނީ އާއްމުކޮށް އަހަރެމެން ގެގައި ގެންގުޅޭ ބައެއް ތަރުކާތީ އަދި މޭވާއިން ފަސޭހަކަމާއެކު ހަންގަނޑު އޮމާންކޮށްލެވޭނެ ގޮތްތަކެކެވެ. އަގުބޮޑެތި ބިއުޓީ ޕްރޮޑަކްޓްސްގެ ބަދަލުގައި މިތަކެތި ތަޖުރިބާ ކޮއްލުން ކިހިނެއްތޯއެވެ.

• ލުނބޯ

ލުނބޯއަކީ އޭގައި ހަންގަނޑަށް ބެނުންވާ ވިޓަމިން ސީ އަދި ބީ ވަރަށްގިނަ އެއްޗެކެވެ. ކުކުޅު ބިހެއްގެ ލޮނދިކޮޅުގެ ތެރެއަށް ލުނބޯ ހުތް ފެލާލައިގެން މޫނުގައި ނުވަތަ ހަށިގަނޑުގައި ބިހި ނަގާ ތަނެއްނަމަ އެތަނެއްގައި އުނގުޅާލާށެވެ. މިއީ އާދަވެގެން ކުރަން ފެށުމުން ވަރަށް އަވަހަށް އަސަރު ފެންނާނެ ކަމެކެވެ.

• ކެރެޓް

ކެރެޓަކީ އެކި ގޮތް ގޮތުން ހަށިގަނޑަށް ފައިދާ ކުރުވަނިވި އެއްޗެކެވެ. ކެރެޓުގައި ހިމެނޭ ވިޓަމިން ތަކުގެ ސަބަބުން ހަށިގަނޑުގެ ޓިޝޫތައް، ލޮލުގެ ފެނުން، ކަށިތަކާއި ދަތްތަކަށްވެސް އެތައް ފައިދާ ކުރެއެވެ. ކެރެޓް ޖޫސް ބުއިމަކީ ހަންގަނޑަށް ދިރުން ގެނުވާ ތާޒާ ކޮއްދޭ ކަމެކެވެ. ކެރެޓް ޖޫހަކީ އުފެދެމުންއަންނަ ތުއްތު ކުދިންނަށްވެސް ދިނުން ވަރަށް ރަނގަޅު ޖޫހެކެވެ.

• ޓޮމާޓޯ

ޝުކްދާ ހޮސްޕިޓަލްގެ ޑރ. މަނޯޖް ކޭ.އަހޫޖާ ބުނުއްވާ ގޮތުގައި ޓޮމާޓޯއަކީ ގުދުރަތީ ވިޓަމިން އަދި މިނެރަލްއެކެވެ.  ބިއުޓީ ދުނިޔޭގައި ޤުދުރަތީ ސަން ސްކުރީނެއްގެ ގޮތުގައިވެސް ބޭނުންކުރާ ޓޮމާޓޯއަކީ ހަންގަނޑަށް އުޖާލާކަން ގެނުވާ ތާޒާކޮއްދޭ އެއްޗެކެވެ. ޓޮމާޓޯއާއެކު އިތުރު އެއްޗެއް ބެނުންކުރާކަށް ނުޖެހެއެވެ. ޓޯމާޓޯ ފަޅާލުމަށްފަހު އުނގުޅާށެވެ. ނޫނީ ދިޔަ ފެލާލުމަށްފަހު ދިޔަ އުނގުޅާށެވެ.

• އޮރެންޖު ތޮށި

އޮރެންޖު ތޮށި މުގުރާލުމަށްފަހު ދެސަމުސާ ޔޯގަޓަށް އަޅައި އެއްކޮށްލައިގެން ކޮންމެ ދުވަހަކު ފޭސް ޕެކެއްގެ ގޮތުގައި ބޭނުން ކުރުމަށް ދިއްލީގެ ހަމުގެ ޑޮކްޓަރެއް ކަމަށްވާ ޑީޕާލީ ބަރްދުވާޖު ވެސް އިރުޝާދުދެއެވެ. ޑޮކްޓަރ ބުނާ ގޮތުގައި އޮރެންޖު ތޮށީގައި ހުންނަ ވިޓަމިން ސީގެ ގިނަކަމުން ހަންގަނޑުގައި ހުންނަ ބެކްޓީރިއާ އާއި މައިކްރީބިއަލް ނައްތާލުމުގެ ބާރު ލިބިގެންވެއެވެ. މިކަމުގެ ސަބަބުން ހަންގަނޑު ސާފުވެ ތާޒާވެއެވެ.

• އަލުވި

އަލުވިއަކީ ހަންގަނޑުގެ ކުލަ އަލިކޮށްދީ ލަކުނު ފިލުވުމަށް ވަރަށް ހާއްސަ އެއްޗެކެވެ. އަލުވި ފުނޑާލާފައި ކޮންމެ ދުވަހަކުވެސް 30 މިނެޓެއްހާއިރު ވަންދެން އުނގުޅާލާފައި ބަހައްޓާށެވެ. ނޫނީ ދިޔަ ފެލާލައިގެން ދިޔަ އުނގުޅިޔަސް ރަނގަޅުވާނެއެވެ.

މިލިޔުމަކީ އެންޑީޓީވީ ފުޑް އާއި ހަވާލާދީ ލިޔެފައިވާ ލިއުމެކެވެ.