ކޮންމެ ނަސްލެއްގެ ކޮންމެ ޖިންސެއްގެ އަދި ކޮންމެ އުމުރެއްގެ މީހެއް ނަމަވެސް ހަންގަނޑު އޮމާންކޮށް ރީތިކޮށް ބެހެއްޓުމަށް ހާއްސަ ސަމާލުކަމެއް ދެއެވެ. ތަފާތު އެތައް މަސައްކަތްތައް ކުރެއެވެ.
ހަންގަނޑު ތާޒާކޮށް ޒުވާންކޮށް ބެހެއްޓުމަށްޓަކައި އެންމެ މުހިއްމު ކަމަކީ މަސާޖު ކުރުމާއި، ސުކްރަބްކުރުން، ސާފު ކުރުމުގެ އިތުރުން ޓޯންކޮށް އަބަދުވެސް ހަންގަނޑު މޮއިސްޗަރައިޒް ކޮށްފައި ބެހެއްޓުމެވެ.
އާއްމުގޮތެއްގައި މޫނު ރީތިކުރުމަށް މި ކަންކަން ކުރުން ވަރަށް މުހިންމެވެ.
މަސާޖު ކުރުމަށްޓަކައި އަލްމަންޑު ތެޔޮކޮޅެއް ކުޑަކޮށް ހޫނުކޮށްލުމަށް ފަހު 5 މިނިޓް ނޫނީ 10 މިނިޓް ވަންދެން ރީތިކޮށް މޫނު މަސާޖުކުރާށެވެ. އަދި މަރުވެފައިވާ ހަންތައް ނައްތާލުމަށްޓަކައި ސުކްރަބް ކުރާށެވެ. ސުކްރަބް ކުރުމަށް އޮރެންޖެއް ނޫނީ ލުނބޮއެއް ފަޅާލުމަށްފަހު އޭގެ މައްޗަށް ހަކުރުކޮޅެއް އަޅައިގެން މޫނުގައި ރީތިކޮށް ހާކާށެވެ.
މޫނު ސާފުކުރުމަށްޓަކައި 2 ސަމުސާ ފުއް، ކުޑަ ރީނދޫކޮޅެއް އަދި 1 ސަމުސާ މާމުއި އަދި އެއް ސަމުސާ ލުނބޯ އަޅައިގެން ރީތިކޮށް އެއްކޮށްލައިގެން އޭގެން ރީތިކޮށް މޫނުދޮވެލާށެވެ. ފެންވަރައިގެން ނުކުތުމަށްފަހު މޫނު ޓޯން ކުރުމަށްޓަކައި ކަފަކޮޅެއް ބޭނުންކޮއްގެން މޫނުގައި ރޯސް ވޯޓާ ކޮޅެއް ހާކާލާށެވެ. އެއަށްފަހު ރަނގަޅު ހަންގަނޑާއި ގުޅޭ މޮއިސްޗަރައިޒާ އަކުން މޮއިސްޗަރައިޒް ކޮށްލާފައި ބެހެއްޓުން މުހިންމެވެ.
ކޮންމެ ދުވަހަކުވެސް ހެނދުނު ހޭލައިގެން އާދަވެގެން މި 5 ކަންތައް ކުރާނަމަ ހަންގަނޑު އޮމާންވެ ޒުވާންކަން މަތީގައި ދެމިހުރުމަށް އެހީތެރިވެދޭކަމަށް މުމްބާއީގެ ހެލްތު ކެއަރ ސެންޓަރެއް ކަމަށްވާ "ޑިމްޕަލް ޖަންގުދާ ގައިޑްސް" އިން ވަނީ ހާމަކޮއްފައެވެ.
